ގަމު ކޮވިޑް ފެސިލިޓީން ޚިދުމަތް ދިނުމަށް ތައްޔާރު ވެއްޖެ
19 ޖުލައި 2020 | އާދީއްތަ 07:3324 ގަޑިއިރު ޚިދުމަތް ދޭނެ
ލ. ގަން ކޮވިޑް މެނޭޖްމަންޓް ފެސިލިޓީ: ކޮވިޑްގެ ކޭސްތަކަށް ފަރުވާދިނުމަށް ފުރިހަމައަށް ތައްޔާރުވެފައިވާ ކަމަށް މައުލޫމާތުދޭ
ކޮވިޑް-19 އާ ގުޅިގެން އަތޮޅުތެރޭގައި ގާއިމުކުރާ ފެސިލިޓީތަކުގެ ތެރެއިން ލ. ގަން ކޮވިޑް މެނޭޖުމަންޓް ފެސިލިޓީން ޚިދުމަތް ދިނުމަށް ތައްޔާރު ވެއްޖެއެވެ.
ގަމު ރީޖަނަލް ހޮސްޕިޓަލުން ބުނީ ބަލި މީހުންނަށް ފަރުވާދެވޭ ވަރަށް ގަމު ކޮވިޑް މެނޭޖުމަންޓް ފެސިލިޓީ ތައްޔާރު ވެފައިވާ ކަމަށެވެ.
24 ގަޑިއިރު އެ ފެސިލިޓީން ޚިދުމަތް ދިނުމަށް ނިންމާފައިވާއިރު، ފެސިލިޓީގައި 20 އައިސީޔޫ އެނދާއި 23 އައިސޮލޭޝަން އެނދު ހުންނާނެއެވެ.
ލ. ގަން ކޮވިޑް މެނޭޖްމަންޓް ފެސިލިޓީން ޚިދުމަތް ދިނުމަށް ތައްޔާރު ވެފައިވާކަން ހާމަކޮށްފައިވާއިރު، ށ. އަތޮޅު ފުނަދު އާއި ބ. އަތޮޅު އޭދަފުށީގައި ގާއިމުކޮށްފައިވާ ކޮވިޑް މެނޭޖުމަންޓް ފެސިލިޓީ ރަސްމީކޮށް ހުޅުވާފައިވަނީ މިމަހުގެ 16 ވަނަ ދުވަހުއެވެ.
އަތޮޅުތެރޭގައި ހަތް ފެސިލިޓީއެއް ގާއިމުކުރުމުގެ މަސައްކަތްތައް ހެލްތު މިނިސްޓްރީން ކުރިއަށްގެންދާއިރު، އޭގެ ތެރޭގައި ހިމެނެނީ ފަސް މެއިން ފެސިލިޓީ އާއި ދެ ޓްރާންސިޓް ފެސިލިޓީ ކަމަށް ހެލްތު އިމަރޖެންސީ އޮޕަރޭޝަންސް ސެންޓަރ (އެޗްއީއޯސީން) މީގެ ކުރިން ބުނެފައިވެއެވެ. އެގޮތުން ލ. އަތޮޅާއި އައްޑޫ ސިޓީގައި ގާއިމުކުރާ ފެސިލިޓީތައްވެސް ޚިދުމަތް ދެވޭ ފެންވަރަށް ތަރައްގީކުރެވި، ހުޅުވަން ތައްޔާރުވަމުންދާކަން އެޗްއީއޯސީން ހާމަކޮށްފައިވެއެވެ.
ރާއްޖޭގެ ފަސް ޒޯނެއްގައި ކޮވިޑް ޓްރީޓްމަންޓް މެއިން ފެސިލިޓީތައް ގާއިމު ކުރުމުގެ މަސައްކަތް ކުރަމުންދާއިރު، އޭގެ ތެރޭގައި ހިމެނެނީ އަލަށް ހުޅުވާފައިވާ ށ. ފުނަދު އާއި ބ. އޭދަފުށީ ސެންޓަރުގެ އިތުރުން، ލ. ގަމާއި، ގއ. ވިލިނގިލި އަދި އައްޑޫ ސިޓީގައި ގާއިމުކުރާ ފެސިލިޓީއެވެ.
