ވީއޭއާރް އަކީ ވާދަވެރިން ދައްކާ ބަހަނާއެއް: ޒިދާން

ވީޑިއޯ އެސިސްޓެންޑް ރެފުރީ (ވީއޭއާރް) އަކީ ރެއާލް މެޑްރިޑާއި ވާދަވެރި އެހެން ކްލަބުތަކުން ވަކި ބޭނުމެއްގައި ދައްކާ ބަހަނާއެއް ކަމަށް ރެއާލްގެ ކޯޗު ޒިނެދިން ޒިދާން ބުނެފިއެވެ.

ޒިދާން ބުނީ ވީއޭއާރް އަކީ ފުޓްބޯޅަ އިތުރު ހަރުފަތަކަށް ގެންދިޔުމުގެ ބޭނުމުގައި ތައާރަފުކުރި އެއްޗެއް ކަމަށާއި، ކޮންމެ މީހަކަށްވެސް އަމިއްލަ ވިސްނުމުގައި ވާހަކަ ދެއްކިދާނެ ކަމަށެވެ. އަދި މީހުން ދައްކާ ވާހަކަތަކަށް އޭނާ އަޅާ ނުލާ ކަމަށްވެސް ބުންޏެވެ.

ޒިދާން އިތުރަށް ބުނީ އޭނާގެ ވަޒީފާ އޮތީ ދަނޑުމަތީގައި ޓީމު މޮޅު ކޮށްދިނުމަށް ކަމަށާއި، އަދި އެކަން އޮގޮތަށް އޭނާ ކުރާތީ ރެއާލް އާއި ވާދަވެރި ކްލަބުތަކުން ވީއޭއާރްގެ ވާހަކަތައް މަތިކޮށް ވާހަކަދައްކަމުން އަންނަނީ ބަހަނާ ދެއްކުމުގެ ބޭނުމުގައި ކަމަށެވެ. އަދި ހަގީގަތަކީ ކޮންމެ މެޗަކުންވެސް ރެއާލް މޮޅުވަނީ ދަނޑުމަތީގައި ކުޅުންތެރިން އަރާ ދައްކާ މޮޅު ކުޅުމުން ކަމަށާއި، ރެއާލްގެ ތާރީޚު ބެލިކަމުގައިވިޔަސް ރެއާލަށް ކާމިޔާބު ލިބިފައިހުރީ ކުޅުންތެރިންގެ ކުރާ ބުރަ މަސައްކަތުންކަން ފެންނަން އޮންނާނެ ކަމަށްވެސް ބުންޏެވެ.

ލީގު ޗެމްޕިއަންކަން ހޯދުމުގެ ފުރުސަތު ވާދަވެރި ބާސެލޯނާއަށްވެސް އެބައޮތް ކަމަށާއި، ރެއާލަށް އަދި ލީގު ޗެމްޕިއަންކަން ކަށަވަރުނުވާ ކަމަށްވެސް ޒިދާން ވަނީ ބުނެފައެވެ.

ވީއޭއާރްގެ މައްސަލައިގައި ދާދިފަހުން ރެއާލްގެ ޑިފެންޑަރު ވަރާން ވެސް ވަނީ ވާހަކަ ދައްކާފައެވެ. ވަރާން ބުނީ ވީއޭއާރް އަކީ ރެއާލުން ކޮންޓްރޯލް ކުރާ އެއްޗެއް ނޫން ކަމަށާއި، މެޗުތަކުން ރެއާލް މޮޅުވަނީ ރެއާލްގެ ކުޅުންތެރިން މޮޅުވާން ކުރަމުން އަންނަ ބުރަ މަސައްކަތުން ކަމަށެވެ.

މެޗުތަކުން ރެއާލް މޮޅުވަނީ ވީއޭއާރުގެ އެހީގައި ކަމަށް ގިނަ ބަޔަކު ބުނަމުން އަންނައިރު، މީގެ ކުރިން އެތުލެޓިކޯ މެޑްރިޑްގެ ކޯޗު ޑިއޭގޯ ސިމިއޯނީ ވެސް ވަނީ މި ވާހަކަތަކަށް ރައްދުދީފައެވެ. އެގޮތުން ސިމިއޯނީ ބުނީ ރެއާލަށް މެޗުތަކުގައި ޕެނަލްޓީ ލިބެނީ ގިނަ އެޓޭކުތަކެއް ކުރާތީ ކަމަށާއި، ބްރޭކަށް ފަހު ރެއާލުން ތަފާތު މޮޅު ކުޅުމެއް ދައްކަމުން އަންނަ ކަމަށެވެ.

ސްޕެނިޝް ލީގު ތާވަލުގެ އެއްވަނައިގައި ރެއާލުން އޮތީ ކުޅުނު 36 މެޗުން ލިބުނު 83 ޕޮއިންޓާއިއެކުގައެވެ. ދެވަނައިގައި އޮތް ބާސެލޯނާއަށް 36 މެޗުން ލިބިފައިވަނީ 79 ޕޮއިންޓެވެ. ލީގު ޗެމްޕިއަންކަން ހޯދުމަށް ރެއާލްއަށް ބާކީ ބޭނުންވަނީ އެންމެ ދެ ޕޮއިންޓެވެ. އެހެންކަމުން ބުރާސްފަތި ދުވަހުގެރޭ ވިޔަރެއާލްއާ ދެކޮޅަށް ކުޅޭ މެޗު ކާމިޔާބުކޮށްގެން ރެއާލްއަށް ލީގު ޗެމްޕިއަންކަން ހޯދުމުގެ ފުރުސަތު އެބައޮތެވެ.