މީރާއިން ބަލައިގަންނަ ހުރިހާ ޓެކުހާއި ފައިސާ އޮންލައިންކޮށް ދެއްކޭނެ އިންތިޒާމު ހަމަޖައްސައިފި
14 ޖުލައި 2020 | އަންގާރަ 03:53ވާރުޕޭ މެދުވެރިކޮށް ފައިސާގެ ރަސީދު ޑައުންލޯޑް ކުރެވޭނެ
މޯލްޑިވްސް އިންލެންޑް ރެވެނިއު އޮތޯރިޓީ (މީރާ)
މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބަލައިގަންނަ ހުރިހާ ޓެކުހާއި ފައިސާ އޮންލައިންކޮށް ދެއްކޭނެ އިންތިޒާމު ހަމަޖައްސައިފިއެވެ.
މީރާ އިން ބުނީ ޓެކުހުގެ އިތުރުން މީރާއަށް ބަލައިގަންނަމުންދާ އެހެނިހެން ފައިސާގެ ތެރެއިން އޮންލައިންކޮށް ބައލިގަތުމުގެ އިންތިޒާމު ހަމަޖެހިފައިނުވާ ފައިސާ އޮންލައިންކޮށް ބަލައިގަތުމުގެ އިންތިޒާމު މިހާރު ހަމަޖެހިފައިވާ ކަމަށެވެ. އަދި ފައިސާ އޮންލައިންކޮށް ބަލައިގަތުމަށް ހަމަޖެހިފައިވަނީ ޓެކްސް ފިޔަވާ އެހެނިހެން ފައިސާ ބަލައިގަތުމަށް ހާއްސަކޮށްފައިވާ މިރާގެ އޮންލައިން ހިދުމަތް "ވާރުޕޭ" މެދުވެރިކޮށް ކަމަށް މީރާ އިން ބުންޏެވެ.
ވާރުޕޭ ހިދުމަތް މެދުވެރިކޮށް މީގެ ކުރިން ވެސް ކުންފުނިތަކުގެ އަހަރީ ފީ އާއި އެއްގަމު އުޅަނދު އަދި ކަނޑު އުޅަނދުގެ އަހަރީގެ ފީއާ ޓްރެފިކާއި ގުޅޭ ގޮތުން ކުރާ ޖޫރިމަނާގެ އިތުރުން މުދަލު ޒަކާތާއި މި ނޫންވެސް ބައެއް ފައިސާ މީރާ އިން ދިޔައީ ބަލައިގަންނަމުންނެވެ. މީގެ އިތުރުން ވާރުޕޭ މެދުވެރިކޮށް ފައިސާ ދައްކާ ފަރާތްތަކުން ފައިސާގެ ރަސީދު ގެއްލިގެން ނުވަތަ އެނޫން ވެސް ސަބަބަކާ ހުރެ ފައިސާގެ ރަސީދުގެ ކޮޕީއެއް ބޭނުންވެއްޖެނަމަ، ވާރުޕޭ މެދުވެރިކޮށް ފައިސާގެ ރަސީދު ޑައުންލޯޑް ކުރެވޭނެ ކަމަށާއި މީރާ ކަނެކްޓް ހިދުމަތަށް ރަޖިސްޓްރީ ކޮށްފައިނުވާ ފަރާތްތަކަށް ވެސް ވާރުޕޭ މެދުވެރިކޮށް ޖީއެސްޓީ ސުންބަޔާން ހުށަހެޅޭނެ ކަމަށް މިރާ އިން މައުލޫމާތުދެއެވެ.
ވާރުޕޭ މެދުވެރިކޮށް ފައިސާ ދެއްކޭނެ އިންތިޒާމު މީރާ އިން ހަމަޖައްސާފައިވާއިރު މީރާ ކަނެކްޓުން ފައިސާ ދައްކާ ފަރާތްތަކުން އެ މުއްދަތަށް ޓެކުހުގެ ގޮތުގައި ދައްކަން ޖެހޭ އަދަދު އެއްފަހަރާ ދައްކަން ދަތިނަމަ، އެ މީހަކަށް ދެއްކެން އޮތް އަދަދެއް މީރާ ކަނެކްޓް މެދުވެރިކޮށް ދެއްކޭނެ އިންތިޒާމު ހަމަޖެހިފައިވާ ކަަމަށް މީރާ އިން ބުންޏެވެ.
ކޮވިޑް-19 ގެ މި ހާލަތުގައި މީރާގެ ހިދުމަތްތައް ހުރިހާ ފަރާތްތަކުން ވެސް އޮންލައިންކޮށް ބޭނުން ކުރުމަށް އެ އިދާރާ އިން ވަނީ އެދިފައެވެ.
