ކުދި ވިޔަފާރިތަކުން ދައްކަންޖެހޭ ޓެކްސްއާ ގުޅޭ ހުރިހާ ޖޫރިމަނާތައް މަޢާފު ކޮށްދިނުމަށް ނިންމާފައިވާކަމަށް މީރާއިން ހާމަކޮށްފިއެވެ.
މޯލްޑިވްސް އިންލޭންޑް ރެވެނިއު އޮތޯރިޓީ މީރާއިންބުނީ، މިގޮތަށް ނިންމީ، ޖޫރިމަނާ މަޢާފު ކުރުމުގައި މިހާރު ޢަމަލު ކުރަމުންދާ ޢާއްމު އުސޫލުގެ އިތުރުން ކުދި ވިޔަފާރިތަކަށް ދެވޭ ޚާއްޞަ ޢިނާޔަތެއްގެ ގޮތުންކަމަށެވެ. އަދި އެފަދަ ފަރާތްތައް މި ނިޒާމުގެ ތެރެއަށް އެނބުރި އައުމަށްޓަކައި އެހީތެރިވެދިނުމުގެ ގޮތުން އަންނަ ޖޫންމަހުގެ 30 ނިޔަލަށް ދެވޭ ފުރުޞަތެއް ކަމަށްވެސް މީރާއިން ބުންޏެވެ.
މީރާއިން ބުނީ، ޖޫރިމަނާ މަޢާފުކޮށްދެވޭނީ ހުށަހަޅަންޖެހޭ ހުރިހައި ޓެކްސް ބަޔާންތަކެއް ހުށަހަޅާފައިވާ، މާފުކޮށްދޭ ޖޫރިމަނާ ފިޔަވައި އެފަރާތަކުން ދައްކަންޖެހޭ އެންމެހައި ފައިސާ ދައްކާފައިވާ ނުވަތަ ފައިސާދެއްކުމުގެ އެއްބަސްވުމަކަށް އައިސްފައިވާ ފަރާތްތަކަށާއި، ކޯޓުން ހުކުމެއް ކޮށްފައިވާ މައްސަލައަކާގުޅޭ ޖޫރިމަނާއަކަށް ނުވާ ފަރަތްތަކުގެ ޖޫރިމަނާތަައްކަމަށެވެ.
މި އުސޫލުގެ ދަށުން މަޢާފު ކޮށްދެވޭނީ، އަހަރަކު 10 މިލިއަން ރުފިޔާއަށް ވުރެ މަދުން އާމްދަނީ ލިބޭ ފަރާތްތަކުން، ބިޒްނަސް ޕްރޮފިޓް ޓެކްސް، ބީޕީޓީ އަދި މުދަލާއި ޚިދުމަތުގެ އަގުން ނެގޭ ޓެކްސް، ޖީއެސްޓީ އާ ގުޅިގެން މި މަހުގެ ނިޔަލަށް އަދާކުރަންޖެހޭ އެންމެހާ އިލްތިޒާމުތަކާ ގުޅޭ ޖޫރިމަނާތައް ލުއި ކޮށްދިނުމަށް އެދި، ކަނޑައެޅިފައިވާ މުއްދަތުގައި އެ އޮތޯރިޓީއަށް ހުށައެޅުމުން ކަމަށް މީރާއިން ބުނެއެވެ.
