އެކި އެކި ނަންނަމުގައި ހިންގާ ޕްރޮމޯޝަންތައް ކަމަށް ބުނެ އޮޅުވާލައިގެން ބޭންކް އޮފް މޯލްޑިވްސްގެ ބައެއް ކަސްޓަމަރުންނަށް ގުޅައި އެކައުންޓުގެ މަޢުލޫމާތު ހޯދާ، އެ އެކައުންޓަށް ފައިސާ ފޮނުވުމަށް އެދެމުންދާކަމުގެ ރިޕޯރޓް ތައް ލިބެމުންދާ ކަމަށް ބޭންކް އޮފް މޯލްޑިވްސް އިން ހާމަ ކޮށްފިއެވެ.

އާދިއްތަ ދުވަހުގެ ރޭ ބޭންކުން ސޯޝަލް މީޑީއާގައި އާއްމު ކުރި ބަޔާނެއްގައި ބުނެފައިވަނީ، މިފަދަ ކޯލްތަކަކީ ސައްހަ ނޫން ކޯލްތަކަށްވާތީ ކަސްޓަމަރުން މިކަމަށް އިތުރަށް ސަމާލުވެ ހުރިހާ ވަގުތެއްގައިވެސް މިފަދަ ކަންކަމުން ރައްކާތެރިވުމަށް އިލްތިމާސް ކުރާ ކަމަށެވެ.

ބޭންކް އޮފް މޯލްޑިވްސް އިން ކަސްޓަމަރުންގެ ކިބައިން އެދިފައި ވަނީ ފޯން ނުވަތަ އީމެއިލް މެދުވެރިކޮށް އެކައުންޓްގެ މައުލޫމާތު ހޯދުމަށް މީހަކު އެދުނު ނަމަވެސް އެ މައުލޫމާތު ހިއްސާ ނުކުރުމަށާއި ފައިސާ ފޮނުވުމުގެ އެއްވެސް މުޢާމަލާތެއް ނުކުރުމަށެވެ.

އެކައުންޓާ ބެހޭ މައުލޫމާތު އެހެން މީހުންނާ ހިއްސާ ކުރުމަކީ، ކުށެއްގައި ނޭގި ހުރެ ބެދިދާނެ ކަމެއް ކަމުގައިވާތީ، އެކައުންޓުގެ މައުލޫމާތު އެހެން ފަރާތްތަކަށް ހިއްސާ ނުކުރުމަށް ބޭންކް އޮފް މޯލްޑިވްސް އިން ކަސްޓަމަރުންގެ ކިބައިން އެދެއެވެ.

ރާއްޖެ އެމްވީއަށް އެނގިފައިވާ ގޮތުގައި، ދަންނަ މީހުންނަށް ގުޅާ، އެކައުންޓުގެ މައުލޫމާތު ހޯދުމަށްފަހު، އެ އެކައުންޓަށް ގޮތްނޭގޭ ގޮތައް ފައިސާ އެހެން މީހަކު ލައްވާ ޖަމާ ކުރުވުމަށްފަހު، ފޯނުން ގުޅި މީހާ އެކައުންޓުގެ ވެރި ފަރާތައް ގުޅާ އެ ފައިސާ ހޯދަނީއެވެ. އެގޮތައް ކަންތައް ކުރަނީ، ފޯނުން ގުޅި މީހާގެ ރެކޯޑެއް ނޯންނާނެ ގޮތައް އޮޅުވާލުމުގެ ގޮތުން ކަމަށްވެސް އެނގިފައިވެއެވެ.

އޮޅުވާލާއިގެން ފައިސާ ހޯދުމުގެ ކަންކަމަކީ ދޭތެރެ ދޭތެރެއިން މިހާރަކަށް އައިސް ރާއްޖޭގައި ފެންމަތިވަމުން އަންނަ މައްސަލައެއްކަން ފާހަގަ ކުރެވެއެވެ.