ޖޭޕީގެ ރައީސް ކަމުން އަލީ ވަހީދު ވަކިކުރަން ހުށައަޅައިފި
9 ޖުލައި 2020 | ބުރާސްފަތި 05:44ވަކިކުރަން ހުށަހަޅާފައިވަނީ ކުރެވިފައިވާ ތުހުމަތުތަކާއި ގުޅިގެން އިސްތިއުފާ ދެއްވުމަށް އަންގަވާފައިވާތީ
ޖޭޕީގެ ރައީސް އަލީ ވަހީދު އަދި ޓްރާންސްޕޯޓު މިނިސްޓަރ އައިޝަތު ނަހުލާ
ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ރައީސް ކަމުން އަލީ ވަހީދު ވަކިކުރަން އެ ޕާޓީގެ ކައުންސިލަށް ހުށައަޅަައިފިއެވެ.
ޖޭޕީގެ ރައީސްކަމުން އަލީ ވަހީދު ވަކި ކުރަން ހުށައެޅުއްވީ ޕާޓީގެ ކައުންސިލް މެމްބަރެކެވެ.
މައްސަލަ ހުށައެޅި ސަބަބެއް ކަމަށް ބުނެފައިވަނީ، އެ ޕާޓީގެ ރައީސް ކަމުގެ މަގާމުގައި ހުންނަވައިގެން ކައުންސިލް މެމްބަރު އަދި ޓްރާންސްޕޯޓް މިނިސްޓަރު އައިޝަތު ނަހުލާ އަށް ޖިންސީ ފުރައްސާރަ ކުރި އޯޑިއޯތަކެއް ލީކުވުމުގެ އިތުރުން ޓޫރިޒަމް މިނިސްޓްރީގެ މުވައްޒަފުންނަށް ޖިންސީ ގޯނާކުރި ކަމުގެ ތުހުމަތުތަކެއް ކުރެވި، މިނިސްޓަރު ކަމުގެ މަގާމުން އިސްތިއުފާ ދެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އަންގަވާފައިވާތީ ކަމަށެވެ. އަދި މި މައްސަލަ އަކީ ފުލުހުން ތަހުގީގު ކުރަމުންދާ މައްސަލައަކަށްވާތީ ކަމަށް ވެސް ހުށައެޅި ސަބަބުގައި ބުންޏެވެ.
މިނިސްޓަރު ނަހުލާއަށް ޖިންސީ ފުރުއްސާރަ ކުރި ކަމަށް ބުނާ އޯޑިއޯގެ މައްސަލައާ ގުޅިގެން ވެސް ޖޭޕީގެ ކައުންސިލަށް މައްސަލަ އަށް ހުށައެޅިއެވެ. އެކަމަކު ރައީސް ސޯލިހު އެކަމަށް ވަކިގޮތެއް ނުނިންމަަވާތީ ޖޭޕީން އަލީ ވަހީދަށް ފިޔަވަޅެއް ނާޅައެވެ.
އަލީ ވަހީދު އަށް ތުހުމަތުތައް ކުރި މުވައްޒަފުން ބުނާ ގޮތުން، އެ މުވައްޒަފުންނަށް ޖިންސީ ގޯނާކުރާތާ ގިނަ ދުވަސްތަކެއް ވަނީ ވެފައެވެ. ޖިންސީ ގޯނާ ކޮށްފައިވަނީ މިނިސްޓްރީގެ ދަތުރުތަކުގައި ރިސޯޓުތަކަށް ގެންގޮސްގެން ކަމަށް ވެސް މިނިސްޓްރީގެ މުވައްޒަފުން ބުނެއެވެ. އަދި އެ މައްސަލަ ފުލުހުން ބަލަން ފަށާފައިވާ ކަމަށް ވަނީ މައުލޫމާތު ލިބިފައެވެ.
