ނޭކުރަންދޫ އާއި ކެލާގެ ކަނޑޫފާ މަރުވާ މައްސަލަ ހޯދުމަށް ސަރވޭއެއް ފަށައިފި
ކަނޑޫފާ މަރުވަމުންދާ ސަބަބު އެނގޭނީ ގިނަ ދިރާސާތަކެއް ކޮށްގެން
ކަނޑޫފާ މަރުވަމުންދާތީ ކަމާބެހޭ އިދާރާތަކުން ސާރވޭ ކުރިޔަށް ގެންދަނީ، ކެލާ
ހދ. ނޭކުރަންދޫ އަދި ހއ. ކެލާގެ ކަނޑޫފާ މަރުވާ މައްސަލަ ދެނެގަތުމަށް އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ) އާއި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އިން ދިރާސާއެއް ހަދަން ފަށައިފިއެވެ.
މިކަމާއި ގުޅިގެން އީޕީއޭއިން ކޮށްފައިވާ ޓުވީޓެއްގައި ބުނެފައިވަނީ، އަންގާރަ ދުވަހު ފެށުނު މަސައްކަތުގެ ދަށުން މިހާރު ކުރަމުންދާ މަސައްކަތަކީ ކަނޑޫފާ މަރުވާ ސަބަބުތައް ދެނެގަތުން ކަމަށާއި ހަފްތާ ބަންދު ތެރޭގައި ނޭކުރަންދޫގައި ދިމާވެފައިވާ މައްސަލަ ގާތުން ބަލާލެވޭނެ ކަމަށެވެ. ކަނޑޫފާތައް މަރުވަމުންދާ ސަބަބު އެނގޭނީ ގިނަ ދިރާސާތަކެއްކޮށް، އިތުރު ޓެސްޓްތަކެއް ހަދައިގެން ކަމަށް އީޕީއޭއިން ބުނެއެވެ.
ކަނޑޫފާތަކަކީ ރަށް ގިރުމާއި ފެން ބޮޑުވުމުގެ ހާދިސާތަކުން ރައްކާތެރިކޮށްދޭ ގުދުރަތީ ވަސީލަތެއް ކަމަށާއި، އެތަންތަން ނައްތާލުމުގެ ސަބަބުން ރަށްތަކަށް އެކަމުގެ ނޭދެވޭ އަސަރު ކުރެއެވެ.
ދިވެހިރާއްޖެ އަކީ މޫސުމަށް އަންނަ ބަދަލުތަކާއި ގުޅިގެން އެންމެ ހިރާސް ބޮޑު އެއް ގައުމުކަމަށް ވާއިރު، އިތުރު ގެއްލުމެއްވުމުގެ ކުރިން ދިވެހިރާއްޖޭގައި ހުރި ކަނޑޫފާތައް ހިމާޔަތް ކުރުމަށް ހިއުމަން ރައިޓްސް ވޮޗް (އެޗްއާރްޑަބްލިޔު) އިން ވަނީ ގޮވާލާފައެވެ. އަދި އަވަސް ފިޔަވަޅުތަކެއް އެޅުމަށް ވަނީ އިލްތިމާސްކޮށްފައެވެ.
