"ނުފޫޒު ފޯރުވީމަ ކުރާނީ ސަސްޕެންޑް. އެއީތޯ ހައްލަކީ؟"

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ށް އިތުރު ފަރާތަކުން ނުފޫޒު ފޯރުވައިގެން ރާއްޖެ ދުނިޔޭގެ ފުޓްބޯޅައިން ސަސްޕެންޑުވުމަކީ ހައްލެއް ނޫން ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

އެފްއޭއެމްގެ އިންތިޚާބު މިދިޔަ ހަފުތާގެ ބުރާސްފަތި ދުވަހު ބޭއްވިއިރު، ރައްޔިތުންގެ މަޖިލީހުގެ އިޖުތިމާޢީ ކޮމިޓީން ވަނީ އިންތިޚާބު ފަސްކޮށްދިނުމަށް ކުޅިވަރާ ބެހޭ ވުޒާރާގައި އެދިފައެވެ. އިޖުތިމާޢީ ކޮމިޓީން އެފްއޭއެމްގެ އިންތިޚާބު ފަސްކޮށްދިނުމަށް އެދުނީ އެފްއޭއެމްއާ ދޭތެރޭގައި ފިޔަވަޅު އަޅައިދިނުމަށް އެދި ރައްޔިތުންގެ މަޖިލީހަށް މެދު ހެންވޭރު ދާއިރާގެ މެންބަރު އަލީ އާޒިމް ހުށަހެޅުއްވި ކުއްލި މައްސަލަ އިތުރަށް ދިރާސާ ކުރަމުން އަންނާތީއެވެ.

ބުރާސްފަތި ދުވަހު އެފްއޭއެމްގެ އިންތިޚާބު ބޭއްވިއިރު، އިންތިޚާބު ފަސްކޮށްދިނުމަށް ރައްޔިތުންގެ މަޖިލީހުގެ އިޖުތިމާޢީ ކޮމިޓީން ވަނީ ކުޅިވަރާ ބެހޭ ވުޒާރާގައި އެދިފައެވެ. އެއާއެކު އެ ވުޒާރާއިން ވަނީ އިންތިޚާބު ފަސްކޮސްދިނުމަށް އެދި އެފްއޭއެމަށް ސިޓީއެއްވެސް ފޮނުވާފައެވެ. އެކަމަކު ފީފާގެ ހުއްދައާއެކު އެފްއޭއެމުން އިންތިޚާބު އެ ދުވަހު ބާއްވާ، އެ އިދާރާގެ ރައީސް މަގާމަށް ދެވަނަ ދައުރަކަށް ބައްސާމް އަދީލް ޖަލީލް ވަނީ އިންތިޚާބު ކޮށްފައެވެ.

އަންގާރަ ދވަހު އިޖުތިމާޢީ ކޮމިޓީން ބޭއްވި ބައްދަލުވުމުގައި ކުޅިވަރާ ބެހޭ ވަޒިރު އަޙްމަދު މަޙްލޫފް ވިދާޅުވީ ރާއްޖެ ސަސްޕެންޑް ކުރާވަރުގެ ކަމެއް ކޮށްގެން ނުވާނެ ކަމަށެވެ. އެގޮތުން މިސާލަކަށް ފުލުހުން ފޮނުވައިގެން އެފްއޭއެމްގެ އިންތިޚާބު ހުއްޓުވިނަމަ، ރާއްޖެ ސަސްޕެންޑް ކުރާނެކަން ޔަގީން ކަމަށާއި ސަސްޕެންޑް ކޮށްގެން އެއިން ނުކުންނާނެ ނަތީޖާއެއް ނެތް ކަމަށްވެސް ވަޒީރު ވިދާޅުވިއެވެ. އަދި ވިދާޅުވީ ރާއްޖެއަށް ފުޓްބޯޅަ ސަސްޕެންޝަނެއް އައުމުން އޭނާ އާއި ރައީސުލްޖުމްހޫރިއްޔާއަށް ވުރެން ނުބައި ބަޔަކު މި ގައުމުގައި ނުތިބޭނެ ކަމަށެވެ.

އެފްއޭއެމްގެ މައްސަލަ ރައްޔިތުންގެ މަޖިލީހުން ބަލަމުން އަންނައިރު، ބައްސާމް ވިދާޅުވީ ތިންވަނަ ފަރާތެއް އެފްއޭއެމްގެ ހިންގުމުގެ ތެރެއަށް ނުވަދެވޭނެކަން ބަޔާންކޮށްފައިވާ ކަމަށާއި، ބުރާސްފަތި ދުވަހުގެ އިންތިޚާބު ބޭއްވިގެން ދިޔައީ ފީފާގެ ރުހުން ލިބުމުން ކަމަށެވެ. އަދި އެފްއޭއެމްގެ މައްސަލަ ރައްޔިތުންގެ މަޖިލީހަށް ނުބެލޭނެ ކަމަށާއި، އެއްވެސް މައްސަލައެއް ބަލާނަމަ ސްޕޯޓްސް ކޮމިޝަން މެދުވެރިކޮށް އެކަކުރަން އެފްއޭއެމުން އަބަދުވެސް މަރުޙަބާ ކިޔާނެ ކަމަށްވެސް ވިދާޅުވިއެވެ.

އެފްއޭއެމްގެ މައްސަލަ ރައްޔިތުންގެ މަޖިލީހުން ބަލަން ފެށުމާއެކު، ތިންވަނަ ފަރާތަކުން ނުފޫޒު ފޯރުވާނަ ރާއްޖެ ސަސްޕެންޑް ކުރަން ޖެހިދާނެ ކަމުގެ އިންޒާރެއް ފީފާއިން ވަނީ ދީފައެވެ. މިއީ ރާއްޖެއަށް ދެ އަހަރުގެ ތެރޭގައި ކުރިމަތިވި މިފަދަ ދެވަނަ އިންޒާރެވެ. މީގެ ކުރިން، 2018 ވަނަ އަހަރުގެ ފަހުކޮޅު، ކުޅިވަރާ ބެހޭ ވުޒާރާއިން އޭއެފްސީ ކަޕުން ރާއްޖޭގެ ކްލަބުތަކަށް ފުރުސަތު ނުލިބުނު މައްސަލަ ބަލަން ކޮމިޓީއެއް އެކުލަވާލުވުމުން އިންޒާރު ދިނީ އޭޝިއާގެ ފުޓްބޯޅަ ޖަމިއްޔާ، އޭއެފްސީންނެވެ. އެއާއެކު އެ ވުޒާރާއިން އެ މަސައްކަތް ހުއްޓާލިއެވެ.