ވެލެންސިއާގެ ކޯޗުގެ މަގާމުން ސެލަޑެސް ވަކިކޮށްފި

ސްޕެނިޝް ލީގުގައި ވާދަކުރަމުން އަންނަ ވެލެންސިއާގެ ކޯޗުގެ މަގާމުން އަލްބާޓް ސެލަޑެސް ވަކިކޮށްފިއެވެ.

މިދިޔަ އަހަރުގެ ސެޕްޓެމްބަރު މަހުގެ ތެރޭގައި ވެލެންސިއާއާ ހަވާލުވި ސެލަޑެސް މަގާމުން ވަކިކުރީ ހޯމަ ދުވަހުގެ ވަގުތެއްގައެވެ. އެއާއެކު އެޓީމުގެ ސްޕޯޓިންގ ޑިރެކްޓަރު ސެޒާ ސަންޗޭޒް ވަނީ މަގާމުން އިސްތިއުފާ ދީފައެވެ.

މިއީ 2014 ވަނަ އަހަރު ސިންގަޕޫރުގެ ބިލިއަނަރު ޕީޓާ ލިމް ވެލެންސިއާ ގަތް ފަހުން އެ ކްލަބުން ވަކިކުރި ހަވަނަ ކޯޗެވެ. އަދި މިއީ މި މުއްދަތުގައި އެ ޓީމުގެ ސްޕޯޓިންގ ޑިރެކްޓަރުގެ މަގާމު ހުސްވި ހަވަނަ ފަހަރެވެ.

ވެލެންސިއާގެ ކޯޗުގެ މަގާމުން ސެލަޑެސް ވަކިކުރިއިރު، އެޓީމުން ވަނީ އޭނާގެ އިރުޝާދުގެ ދަށުން 41 މެޗު ކުޅެފައެވެ. މީގެ ތެރެއިން 15 މެޗުން މޮޅުވެފައިވާއިރު، 14 މެޗުން ވަނީ ބަލިވެފައެވެ. އަދި އަނެއް 12 މެޗު ނިމުނީ އެއްވަރުވެގެންނެވެ.

ވެލެންސިއާގެ ކޯޗުގެ މަގާމުން އުމުރުން 44 އަހަރުގެ ސެލަޑެސް ވަކިކުރުމާއެކު، މި ސީޒަނުގެ ބާކީ އޮތް ބައިގައި އެޓީމަށް އިރުޝާދުދޭނީ ވޯރޯ ގޮންޒާލްވޭޒްއެވެ. މިއީ އޭނާ ވަގުތީ ގޮތުން ވެލެންސިއާއާ ހަވާލުވި ހަވަނަ ފަހަރެވެ. އެންމެ ފުރަތަމަ ވެލެންސިއާއާ ވޯރޯ ހަވާލުވީ 2008 ވަނަ އަހަރު އޭރުގެ ކޯޗުގެ މަގާމުން ރޮނާލްޑް ކޫމަން ވަކިކުރުމާ ގުޅިގެންނެވެ. އެފަހަރު ވޯރޯ ވަނީ ވެލެންސިއާ ދެވަނަ ޑިވިޝަނަށް ރެލިގޭޓްވުމުން ސަލާމަތް ކޮށްދީފައެވެ.

ސެލަޑެސް އަކީ ކޮރޯނާވައިރަސް (ކޮވިޑް-19) ށްފަހު ސްޕެނިޝް ލީގު އަލުން ފެށި ފަހުން، އެ ލީގުގެ ކްލަބަކުން ވަކިކުރި ތިންވަނަ ކޯޗެވެ. މީގެ ކުރިން ރެއާލް ބެޓިސްއިން އެޓީމުގެ ކޯޗުގެ މަގާމުން ޖޮއާން ފްރާންސެސް (ރުބީ) ވަކިކުރިއިރު، ދާދި ފަހުން އެސްޕަންޔޯލްއިން ވަނީ އެޓީމުގެ ކޯޗުގެ މަގާމުން އަބެލާޑޯ ފެނާންޑޭޒް ވަކިކޮށްފައެވެ.

ސްޕެނިޝް ލީގުގެ ތާވަލުގެ އަށްވަނައިގައި އޮތް ވެލެންސިއާއިން ލީގުގައި ދެން މެޗެއް ކުޅޭނީ ބުދަ ދުވަހުގެރޭއެވެ. އެރޭ ވެލެންސިއާ ނުކުންނާނީ އެތުލެޓިކް ބިލްބާއޯއާ ދެކޮޅަށެވެ.