ރައީސުލްޖުމްހޫރިއްޔާ، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ކަމުގެ މަގާމަށް އައްޔަންކުރެއްވި މުހައްމަދު އަސްލަމަށް ރުހުން ދިނުމަށް ފެންނަ ކަމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީން ފާސްކޮށްފި އެވެ.
މިނިސްޓަރުކަމުގެ މަޤާމަށް އަސްލަމް އައްޔަންކުރައްވާ ރުހުން ހޯދެވުމަށް މަސައްލަ ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވެވީ، ކުރިން އަސްލަމް ހުންނެވި މިނިސްޓްރީގެ މަސްއޫލިއްޔަތުތައް ބަދަލުކުރައްވައި، ހައުސިން މިނިސްޓްރީ އާއި، ޕްލޭނިންގ މިނިސްޓްރީ އެއްކޮށް، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ނަމުގައި މިނިސްޓްރީ އެއް އުފެއްދެވުމާއި ގުޅިގެންނެވެ. ހައުސިންގ މިނިސްޓްރީ އުވާލައްވާ، ދެ މިނިސްޓްރީ އެއްކޮށްލެވީ ކުރިން ހައުސިންގ މިނިސްޓަރުކަމުގެ މަޤާމުގައި ހުންނެވި އާތިފާ ޝަކޫރު މަޤާމުން އިސްތިއުފާ ދެއްވުމާއި ގުޅިގެން މިމަހުގެ 11 ވަނަ ދުވަހު އެވެ.
އައު މިނިސްޓްރީގެ މިނިސްޓަރުކަމުގެ ފަތްކޮޅު އަސްލަމަށް އަރުއްވާފައިވަނީ މިމަހުގެ 14 ވަނަ ދުވަހު އެވެ.
އަސަލްމަށް ރުހުން ދިނުމުގެ މައްސަލަ ކޮމެޓީން ފާސްކޮށްފައިވަނީ ކޮމެޓީގައި ބައިވެރިވެވަޑައިގެންނެވި 6 މެމްބަރުންގެ އަޤުލަބިއްޔަތުންނެވެ. ކޮމެޓީން އަސްލަމްގެ ނަން ފާސްކުރެއްވުމާއެކު، ދެން އޮންނަ ރައްޔިތުންގެ މަޖިލީހުގެ ޖަލްސާގައި އަސްލަމްގެ ނަމަށް ވޯޓަށް އަހައި، ފާސްކުރާނެ އެވެ.
