މުޅި ދުނިޔެއިން ކޮވިޑް-19 ޖެހުނު މީހުންގެ އަދަދު 7 މިލިއަނަށްވުރެ މައްޗަށް، މަރުވި މީހުން 4 ލައްކައަށް!
އެމެރިކާއިން ޕޮޒިޓިވްވި މީހުންގެ ޖުމުލަ އަދަދު 2 މިލިއަނަށް އަރާފައިވޭ
ކޮވިޑް-19 އަށް ޓެސްޓް ކުރަނީ - ގިނަ ޤައުމުތަކުގައި ވައިރަސް ކޮންޓްރޯލް ކުރެވިފައި ވީ ނަމަވެސް، އަދިވެސް ބައެއް ޤައުމުތަކުގައި ހަލުވި ކަމާއެކު ވައިރަސް ފެތުރެމުންދޭ
މުޅި ދުނިޔެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު 7 މިލިއަނަށްވުރެ އިތުރުވެ، ބަލި ޖެހިގެން މަރުވި މީހުންގެ އަދަދު 4 ލައްކައަށް އަރައިފިއެވެ.
އެންމެ ފަހުގެ ތަފާސްހިސާބުތައް ދައްކާގޮތުން މިހާތަނަށް މުޅި ދުނިޔެއިން 7،050،556 (ހަތް މިލިއަން ފަންސާސް ހާސް ފަސް ސަތޭކަ ފަންސާސް ހަ) މީހުން ވައިރަސްއަށް ޕޮޒިޓިވް ވެފައިވާއިރު، މިހާތަނަށް 404،482 (ހަތަރު ލައްކަ ހަތަރުހާސް ހަތަރުސަތޭކަ ހައްޑިހަ ދެ) މީހުން ވައިރަސް ޖެހިގެން މަރުވެފައިވެއެވެ.
މިހާތަނަށް އެންމެ ގިނަ އަދަދެއްގެ ބަޔަކު ޕޮޒިޓިވްވެފައި ވަނީ ވެސް އަދި މަރުވެފައި ވަނީ ވެސް އެމެރިކާއިންނެވެ. އެގޮތުން އެމެރިކާއިން ޕޮޒިޓިވްވި މީހުންގެ ޖުމުލަ އަދަދު 2 މިލިއަނަށް އަރާފައިވާއިރު، ބަލި ޖެހިގެން މަރުވި މީހުންގެ އަދަދު ވަނީ 112،000 (އެއްލައްކަ ބާރަ ހާސް)ށް އަރާފައެވެ.
ދެވަނައަށް އެންމެ ގިނަ އަދަދެއްގެ މީހުން ޕޮޒިޓިވްވެފައި ވަނީ ބްރެޒިލްއިންނެވެ. އެގޮތުން ބްރެޒިލްގައި މިހާތަނަށް 678،000 (ހަލައްކަ ހަތްދިހަ އަށްހާސް)ށް ވުރެ ގިނަ މީހުން ޕޮޒިޓިވް ވެފައިވާއިރު، ބްރެޒިލްއަކީ މިހާތަނަށް އެންމެ ގިނަ އަދަދެއްގެ ބަޔަކު ބަލި ޖެހިގެން މަރުވި 3 ވަނަ ޤައުމެވެ. މުޅި ދުނިޔެއިން ދެވަނައަށް އެންމެ ގިނަ އަދަދެއްގެ ބަޔަކު މަރުވެފައި ވަނީ އިނގިރޭސިވިލާތުންނެވެ. އިނގިރޭސިވިލާތުން 40،000ށް ވުރެ ގިނަ މީހުން ބަލި ޖެހިގެން މަރުވެފައިވެއެވެ.
ފާއިތުވި 24 ގަޑިއިރު ތެރޭގައި އެންމެ ގިނަ އަދަދެއްގެ ޕޮޒިޓިވް ކޭސް ރިޕޯޓް ކުރެވުނު ޤައުމުތަކުގެ ތެރޭގައި އެމެރިކާ، އިންޑިއާ، ރަޝިއާ، ޗިލީ އަދި ބްރެޒިލް ފަދަ ޤައުމުތައް ހިމެނެއެވެ.
އޭގެ އިތުރުން، މުޅި ދުނިޔެއިން މި ބަލި ޖެހުނު މީހުންގެ ތެރެއިން 3،383،222 (ތިން މިލިއަން ތިންލައްކަ އައްޑިހަ ތިން ހާސް ދުއިސައްތަ ބާވީސް) މީހުން ވަނީ ރަނގަޅުވެސް ކުރެވިފައެވެ.
