ފެންނަ ކޭސްތަކުގެ އަދަދު އިތުރުވީ ލޮކްޑައުން އަށް ލުއި ދީގެނެއް ނޫން: ޑރ. އަފްޒަލް

ފެންނަ ކޭސްތަކުގެ އަދަދު ކުއްލިއަކަށް އިތުރުވުމަކީ މައްސަލައެއް ނޫން ކަމަށާއި، ކޭސްތައް އިތުރުވަނީ ފުރަބަންދަށް ލުއި ދީގެން ނޫން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވެއްޖެ އެވެ.

އާދިއްތަ ދުވަހު އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި، އިތުރު 101 ކޭސް އެއް ފެނިފައިވާ ކަން ވަނީ ހާމަކޮށްފަ އެވެ. މިއީ ރާއްޖެ އިން މިހާތަނަށް ރިޕޯޓްކުރެވުނު އަދަދުތަކަށް ބަލާއިރު، އެއް ދުވަހުގެ ތެރޭގައި 100ށް ވުރެ އިތުރަށް ކޭސްތައް ރިޕޯޓްކުރެވުނު ދެވަނަ ފަހަރެވެ.

މިއީ ކަންބޮޑުވާންޖެހޭ ކަމެއްތޯ ނޫސްވެރިއަކު ކުރި ސުވާލަކަށް ޖަވާބުދެއްވަމުން ޑރ. އަފްޒަލް ވިދާޅުވީ މިހާރު ފެންނަ ކޭސްތަކަށް ބަލާއިރު، ހާލަތު އިތުރަށް ގޯސްވާ ހާލަތެއް ނުފެންނަ ކަމަށެވެ. ސަބަބެއް ކަމަށް ވިދާޅުވީ، މިހާރު ފެންނަ ކޭސްތަކުގެ ޕެޓަރން އެވެ. އެންމެ ފަހުން ރިޕޯޓްކުރެވުނު ކޭސްތަކުގެ ތެރޭގައި ގިނައީ އެއް ކްލަސްޓަރ އަކަށް ނުވަތަ ކުރިން ދެނެގަނެވިފައިވާ ކްލަސްޓަރއެއް ނުވަތަ ޕޮޒިޓިވް ކޭސްތަކުގެ ކޮންޓެކްޓްސް އެވެ.

ޑރ. އަފްޒަލް ވިދާޅުވީ، ފެނުނު ކޭސްތަކުގެ ތެރެއިން އިންޑިޕެންޑެންޓް ކޭސް ނުވަތަ ކުރިން ދެނެގަނެވިފައިވާ ކްލަސްޓަރއަކާއި ގުޅުމެއް ނެތް ދެ ކޭސް ކަމަށެވެ. ބަލި ފެތުރޭ މިންވަރުގެ އިންޑިކޭޓަރތަކަށް ބަލާއިރު، އިންޑިޕެންޑެންޓް ކޭސްތަކުގެ އަދަދު އިތުރުވުމާއި، ސާރީ ކޭސްތަކުގެ އަދަދު އިތުރުވުން ހިމެނެ އެވެ.