ރައީސް ޔާމީންގެ ސަރުކާރުން މުޅި ރާއްޖެ ވިއްކާލާފައި ފިއްލަވަފާނެ އިޝާރާތްތަކެއް ދަނީ ފެންނަމުން: ޑރ. ޑީޑީ

މިރާއްޖެ ހިމާޔަތް ކުރުމަށް ވެސް އެމްޔޫއޯގެ ކެނޑިޑޭޓުންނަށް ވޯޓު ދޭން ޖެހޭ ކަމަށާއި ނޫން ނަމަ ރައީސް ޔާމީންގެ ސަރުކާރުން މުޅިރާއްޖެ ވިއްކާލާފައި 2018 ގައި ފިއްލަވާފާނެ ކަމުގެ އިޝާރާތްތަކެއް ދަނީ ފެންނަމުން ކަމަށް އެމްޑީޕީގެ ކުރީގެ ރައީސް ޑރ. އިބްރާހީމް ދީދީ (ޑރ. ޑީޑީ) ވިދާޅުވެއްޖެއެވެ.

އެމްޔޫއޯއިން އާދީއްތަ ދުވަހު އެމްޑީޕީ ހަރުގޭގައި ބޭއްވި ޖަލްސާގައި ވާހަކަ ދައްކަވަމުން ޑރ. ޑީޑީ ވިދާޅުވީ މިއަދު މިރާއްޖެއަށް ދިމާވެގެން މިއުޅޭ މައިގަނޑު މައްސަލަ ދިމާވެގެން މިއުޅޭ ސަބަބުގެ ގޮތުން ވެސް ލޯކަލް ކައުންސިލް އިންތިޚާބުގެ މެޖޯރިޓީ އެމަނިކުފާނުގެ ސަރުކާރަށް ބޭނުންވާ ސަބަބު ވަރަށް ސާފުކޮށް އެނގޭ ކަމަށާއި ރައީސް ޔާމީން އެއުޅުއްވަނީ ދަރަނިން އަރައި ނުގަނެވިގެން ކަމަށެވެ.

ދަރަނި އަދާކުރުމަށްޓަކައި މިއަދު އަނެއްކާ ވެސް ދަރަންޏަށް ލޯނު ނަގަމުންދާ ކަމަށާއި ދަރަންޏަށް ލޯނު ނަގައިގެން ވެސް ދަރަނި އަދާ ނުކުރެވުމުން ދެން ސަރުކާރުން ދެން އުޅެނީ އަތޮޅުތައް ވިއްކާލުމަށް ކަމަށް ޑީޑީ ވިދާޅުވިއެވެ.

ފ އަތޮޅުގެ ދެގޮނޑި ވެސް އޮތީ ރައީސް ޔާމީނަށް ކަމަށާއި ފ. އަތޮޅު ވިއްކާލުމުގެ މަސައްކަތް ރައީސް ޔާމީން އެކުރައްވަނީ އެހެންވެގެން ކަމަށް ޑރ. ޑީޑީ ވިދާޅުވިއެވެ.

ޑރ. ޑީޑީ ވިދާޅުވީ އެކަން އެހެން ވިޔަނުދިނުމަށްޓަކައި ރައްޔިތުންގެ ބާރުވެރިކަން ރައްޔިތުންގެ މުށުތެރޭގައި އޮތުން މުހިއްމުވާ ކަމަށާއި ލޯކަލް ކައުންސިލްގެ މެޖޯރިޓީ އެމްޔޫއޯއަށް ދޭން ޖެހެނީ އެހެންވެގެން ކަމަށެވެ.

ޑރ. ޑީޑީ ވިދާޅުވީ އެމްޔޫއޯގެ ކެންޑިޑޭޓުންނަށް ވޯޓު ދިނުމުން ރައްޔިތުންގެ ބާރުވެރިކަން ރައްޔިތުންނަށް ލިބިގެންދާނެ ކަމުގެ ކަށަވަރުކަމާ މެދު އެއްވެސް ޝައްކެތް ނެތް ކަމަށެވެ. އޭރުން ރައީސް ޔާމީން ބޭނުން ވާހާ ގޮތަކަށް ފަޅުތަކެއް، ރަށްތަކެއް ނުވިއްކޭނޭ ކަމަށް ވެސް ޑީޑީ ވިދާޅުވިއެވެ.

ރާއްޖެ ތަރައްޤީ ކުރެވޭނީ ލޯކަލް ކައުންސިލް މެޖޯރިޓީ ލިބިގެން ކަމަށް ރައީސް ޔާމީން ވިދާޅުވާ ވިދާޅުވުމަށް ރައްދު ދެއްވަމުން ޑރ. ޑީޑީ ވިދާޅުވީ މާލެ ސިޓީގައި އޮތީ ރައީސް ޔާމީނަށް މެޖޯރިޓީ އޮތް ކައުންސިލެއް ނޫން ކަމަށާއި މާލޭގައި ބޭކާރު އެތައް ޚަރަދެއް ކުރައްވަމުން ގެންދަވާ ކަމަށެވެ.