ކޮވިޑް-19ގެ ސަބަބުން މާލެސިޓީގައި އިއުލާނުކޮށްފައިވާ ފުރަބަންދަށް ލުއިތަކެއް ދީ، ދެވޭ ހުއްދަތައް ނަހަމަ ގޮތުގައި ބޭނުން ނުކުރުމަށް ހޯމް މިނިސްޓަރ އިމްރާން އަބްދުﷲ އިލްތިމާސް ކުރައްވައިފި އެވެ.

މިނިސްޓަރ އިމްރާން ކުރެއްވި ޓްވީޓެއްގައި ވިދާޅުވީ، ރައްޔިތުންގެ ޒަރޫރީ ބޭނުންތައް ފުއްދުމަށް ލުއި ދެވުނު ނަމަވެސް ކޮވިޑް-19ގެެ ނުރައްކާ ކުޑަނުވާ ކަމަށެވެ. މިނިސްޓަރ ވަނީ ކަމާގުޅޭ އިދާރާތަކުން ދޭ އިރުޝާދުތަކަށް ތަބާވެ، ކޮންމެހެން ނިކުންނަން ނުޖެހޭނަމަ ނުނިކުތަމަށް އިލްތިމާސް ކުރައްވާފަ އެވެ. އަދި ދެވޭ ހުއްދަތައް "އެބިއުސް" ނުކުރުމަށް ރައްޔިތުންގެ ކިބައިން އެދިވަޑައިގެންފަ އެވެ.

ފުރަބަންދުގެ، ލުއިތައް ދިނުމުގެ ފުރަތަމަ ފިޔަވަހީގައި ލުއި ދެވުނީ މީހުންނަށް ނިކުމެ އުޅެވޭނެ ގޮތާއި، އިގްތިސާދީ ހަރަކާތްތަކަށް ފުރުސަތު ދިނުމާއި، ވިޔަފާރިކުރުމަށް ލިބޭނެ ޖާގަ ދިނުމާއި، މާލޭ ސަރަހައްދުގައި ދަތުރުފަތުރު ކުރުމަށް ލިބޭ ލުއިތަކާއި ސިއްހީ ޚިދުމަތްތައް ފޯރުކޮށްދިނުމަށް ހުރި ޖާގައިގެ މައްޗަށެވެ.

އާންމުންނަށް ނިކުމެ އުޅުމުގައި ދެވޭ ލުއިތަކުގެ ތެރޭގައި ކޮންމެ ގޭބިސީއަކުން ދެ މީހަކަށް ދެ ގަޑިއިރަށް ބޭރަށް ދިއުމުގެ ފުރުސަތު ލިބޭނެ އެވެ. މި ހުރިހާ ފަރާތަކަށް ވެސް މަގުމައްޗަށް ނިކުމެ އުޅެވޭނީ ފުލުހުންގެ ހުއްދަ ލިބިގެންނެވެ. ހުއްދަ ލިބިގެން ނިކުންނަ ފަރާތްތަކަށް ދެވޭ ސަރަހައްދުތައް ވެސް އިތުރުވާނެ އެވެ.

ލުއި ދިނުމުގެ ސަބަބުން ބަލި ފެތުރުން ހުއްޓުނީ ކަމަކަށް ބަލައިގެން ނުވާނެ ކަމަށާއި ރައްކާތެރިކަމުގެ ފިޔަވަޅުތައް އެޅުމަށް ކަމާބެހޭ އިދާރާތަކުން ވަނީ އެދިފަ އެވެ. އަދި ޑޮކްޓަރުންގެ ޓީމުން ވަނީ، ލޮކްޑައުންއިން ބޭރަށް ނިކުންނައިރު ސިއްހީ އިދާރާތަކުން ދޭ އިރުޝާދުތަކަށް އަމަލު ނުކޮށްފިނަމަ އަނެއްކާވެސް ކޭސްތައް ގިނަވެ މިހާރު ހުރި ވަސީލަތްތަކުން ވެސް ނުފުދިދާނެ ކަމުގެ އިންޒާރު ދީފަ އެވެ.