ފޮރިން މިނިސްޓްރީ އަށް 2014 ވަނަ އަހަރު ލިބެންޖެހޭ ފައިސާގެ ހިސާބުކަށަވަރެއް ނުވޭ: އޮޑިޓް ރިޕޯޓް
ފޮރިން މިނިސްޓަރު އާސިމް
ރާއްޖެއިން ބޭރުގައި ގާއިމް ކޮށްފައިވާ މިޝަންތައް ހިންގުމަށް އިމާރާތްތައް ކުއްޔަށް ހިފާއިރު ސެކިޔުރިޓީ ޑިޕޮސިޓްގެ ގޮތުގައި ފައިސާ ނަގާ ކަމަށާއި އަދި އެ ފައިސާ އަކީ އަނބުރާ މިނިސްޓްރީ އަށް ލިބެން ޖެހޭ ފައިސާ ކަމަށްވާއިރު އެ ފައިސާގެ ހިސާބު ކަށަވަރު ނުވާ ކަމަށް އޮޑިޓަ ޖެނަރަލް ހަސަން ޒިޔަތު ވިދާޅުވެއްޖެއެވެ.
އޮޑިޓަ ޖެނަރަލް ހަސަން ޒިޔަތު ސޮއި ކުރައްވާ ނެރެފައިވާ ފޮރިން މިނިސްޓްރީގެ 2014 ވަނަ އަހަރުގެ އޮޑިޓް ރިޕޯޓުގައި ބުނެފައިވާ ގޮތުގައި މިނިސްޓްރީގެ މާލީ ބަޔާންތަކުގައި ހިމެނޭ މިލްކިއްޔާތު ބަޔާނުގައި އަހަރު ނިމުނުއިރު ސެކިޔުރިޓީ ޑިޕޮސިޓާއި އެޑްވާންސްގެ ގޮތުގައި އަނބުރާ ލިބެންޖެހޭ ފައިސާގެ ގޮތުގައި ހިމަނާފައިވާ 4،106،477 (ހަތަރު މިލިޔަން އެއް ސަތޭކަ ހަ ހާސް ހަތަރު ސަތޭކަ ހަތްދިހަ ހަތެއް) ރުފިޔާއަކީ ރާއްޖެއިން ބޭރުގައި ގާއިމްކޮށްފައިވާ 15 މިޝަންގެ ތެެރެއިން ހަމައެކަނި 12 މިޝަނުން ލިބިފައިވާ މައުލޫމާތުތަކުގެ މައްޗަށް ބިނާކޮށް ހިމަނާފައިވާ އަދަދެއް ކަމަށެވެ.
އޮޑިޓް ރިޕޯޓުގައި ބުނެފައި ވަނީ ބާކީ ހުރި ތިން މިޝަނުން ސެކިޔުރިޓީ ޑިޕޮޒިޓާއި އެޑްވާންސްގެ ގޮތުގައި ދީފައިވާ ފައިސާގެ މައުލޫމާތު މިނިސްޓްރީއަށް ފޮނުވާފައި ނުވާ ކަމަށެވެ. މިހެންވުމުގެ ސަބަބުން މިނިސްޓްރީގެ މާލީ ބަޔާންތަކުގައި ހިމެނޭ މިލްކިއްޔާތުގެ ބަޔާނުގައި އަހަރު ނިމުނުއިރު ސެކިޔުރިޓީ ޑިޕޮސިޓާއި އެޑްވާންސްގެ ގޮތުގައި ބަހައްޓާފައިވާ ކަމަށް ރެކޯޑް ކޮށްފައިވާ އަދަދަކީ ސައްހަ އަދަދުކަން ކަށަވަރު ނުވާ ކަމަށް އޮޑިޓް ރިޕޯޓުގައި ބުނެފައިވެއެވެ،
ދައުލަތުގެ މާލީއްޔަތުގެ ގަވާއިދުގެ ދަށުން ދައުލަތުގެ މަސައްކަތެއް ކުރުމަށް އެއްވެސް ފަރާތަކާއި ހަވާލު ކުރަން ވަނީ އެ މަސައްކަތެއް ކުރުވުމާ ބެހޭ ގޮތުން އެއްބަސްވުމެއްގައި ދެފަރާތުން ސޮއި ކުރުމަށް ފަހުގައި ކަމަށް ބަޔާން ކޮށްފައިވީ ނަމަވެސް މި ގަވާއިދުތަކާ ހިލާފަށް ފޮރިން މިނިސްޓްރީން ކުރުވާފައިވާ 25،000 ރުފިޔާ އިން ދަށުގެ މަސައްކަތްތައް ކުރުވާފައި ވަނީ އެއްބަސްވުމެއް ނެތި ކަމަށް އޮޑިޓް ރިޕޯޓުގައި ބުނެފައިވެއެވެ. މިގޮތުން 964،468 (ނުވަސަތޭކަ ފަސްދޮޅަސް ހަތަރު ހާސް ހަތަރުސަތޭކަ ފަސްދޮޅަސް އަށެއް) ރުފިޔާގެ މަސައްކަތް އެއބަސްވުމެއް ނެތި ކުރުވާފައިވާކަން އޮޑިޓް ރިޕޯޓުގައި ފާހަގަ ކޮށްފައިވެއެވެ.
ފޮރިންމިނިސްޓްރީގެ އޮޑިޓް ރިޕޯޓުގައި ބުނެފައިވާ ގޮތުގައި މިނިސްޓްރީއާއި މިނިސްޓްރީގެ ދަށުން ހިންގަމުން ގެންދާ މިޝަންތަކުގެ ތެރެއިން އދ. އަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މިޝަން އާއި މެލޭޝިޔާގައި ހުންނަ ދިވެހިރާއްޖޭގެ ހައިކޮމިޝަން އަދި ޗައިނާގައި ހުންނަ ދިވެހިރާއްޖޭގެ އެންބެސީގައި ހަރުމުދަލުގެ ރަޖިސްޓްރީ ދައުލަތުގެ މާލީއްޔަތު ގަވާއިދުގައި ބަޔާން ކޮށްފައިވާ ގޮތުގެ މަތިން ބަލަހައްޓާފައެއް ނުވެއެވެ، އެގޮތުން މުދަލުގެ އަގާއި މުދާ ލިބުނު ތާރީޙް އަދި މުދަލުގެ މޮޑެލް ނަންބަރާއި ސީރިއަލް ނަންބަރު ގަވާއިދާ އެއްގޮތަށް ހަރުމުދަލުގެ ރަޖިސްޓްރީގައި ހިމަނާފައި ނުވުމުން މާލީ ބަޔާންތަކުގައި ހިމެނޭ މިލްކީއްޔާތުގެ ބަޔާނުގައި 2014 ވަނަ އަހަރު ނިމުނުއިއިރު ހުރި ހަރަދުގެ އަގުގެ ގޮތުގައި ހިމަނާފައިވާ 20،2007،371 (ވިހިމިލިޔަން ދުވިސްތަ ހަތަރު ހާސް ތިންސަތޭކަ ހަތްދިހަ އެކެއް) ރުފިޔާގެ ސައްހަކަން ކަޝްވަރު ވެފައި ނުވާކަން ފާހަަގަ ކޮށްފައިވެއެވެ،
