ރަށްރަށުގައި ކުޅިވަރު ކުޅުމުގެ ހުއްދަ ދީފި

ރަށްރަށުގައި ކުޅިވަރު ކުޅުމުގެ ހުއްދަ ދޭން ކުޅިވަރާ ބެހޭ ވުޒާރާ އިން ނިންމައިފި އެވެ.

މިދިޔަ ހުކުރު ދުވަހުން ފެށިގެން މޮނިޓަރިންގެ ހާލަތު ނެތް ރަށްތަކުގެ މިސްކިތްތަކުގައި ޖަމާޢަތުގައި ނަމާދުކުރުމުގެ ހުއްދަ އިސްލާމިކް މިނިސްޓްރީން ވަނީ ދީފައެވެ. އެއާއެކު މިސްކިތްތައް ހުޅުވާފައިވާ ރަށްރަށުގައި ކުޅިވަރު ކުޅުމުގެ ހުއްދައަށް އެދި އެކިފަރާތްތަކުން ވަނީ އެދިފައެވެ.

ކުޅިވަރާ ބެހޭ ވުޒާރާ އިން އަންގާރަ ދުވަހު ނެރުނު ބަޔާނެއްގައި ބުނެފައިވަނީ ކޮރޯނާވައިރަސް (ކޮވިޑް-19) ފެތުރިފައި ނުވާ ރަށްތަކާއި މޮނިޓަރިންގެ ހާލަތު ނިމި 14 ދުވަސް ވެފައިވާ ރަށްތަކުގައި ކުޅިވަރު ކުޅުމުގެ ހުއްދައަށް ގިނަ އަދަދެއްގެ ޒުވާނުން އެދެމުން އަންނާތީ އެކަމާ ގުޅޭގޮތުން ޓެކްނިކަލް އެޑްވައިޒަރީ ގްރޫޕް (ޓެގް) އާއި ހެލްތު ޕްރޮޓެކްޝަން އޭޖެންޗީ (އެޗްޕީއޭ) އާއެކު މަޝްވަރާކޮށްފައިވާ ކަމަށެވެ.

އަދި ރަށު ކައުންސިލްތަކުން އެރަށެއްގައި ކުޅިވަރު ކުޅުން މަނާކުރި އުސޫލުގެ ދަށުން، ބަލި ފެތުރިފައި ނުވާ ރަށްތަކާއި މޮނިޓަރިންގެ ހާލަތު ނިމި 14 ދުވަސް ވެފައިވާ ރަށްތަކުގެ ކައުންސިލްތަކުން އެ ރަށް ރަށުގައި ކުޅިވަރު ކުޅުމުގެ ހުއްދަ ދިނުމާމެދު އިއުތިރާޒެއް ނެތް ކަމަށް ވަނީ ބުނެފައެވެ.

އެކަމަކު ގިނަ ބަޔަކު އެއްވެގެން ކުޅިވަރު ކުޅުން ފަދަ، ގިނަ ބަޔަކު އެއްވެގެން ހިންގާ އެއްވެސް ހަރަކާތަކަށް ހިތްވަރު ނުދޭ ކަމަށާއި ގައިދުރުކަމަށް އިސްކަންދޭން ހިތްވަރުދޭ ކަމަށް ޓެގް ޓީމުންނާއި އެޗްޕީއޭ އިން ފާހަގަކޮށްފައިވާ ކަމަށް ބަޔާނުގައި ވަނީ ހިމަނާފައެވެ. އަދި ކުޅިވަރު ކުޅުމުގެ ހުއްދަ ދިން ނަމަވެސް، ކޮންމެ ވަގުތެއްގައި ވެސް ކުޅިވަރު ކުޅޭ ތަންތަން އަލުން ބަންދުކުރަން ޖެހިދާނެ ކަމަށް ވެސް ވަނީ ބުނެފައެވެ.

މޮނިޓަރިންގެ ހާލަތު ނެތް ރަށްތަކުގެ ކުޅިވަރު ކުޅުމުގެއް ހުއްދަ ދިންއިރު، މީގެ ކުރިން ކުޅިވަރާ ބެހޭ ވުޒާރާއިން ވަނީ އެ ވުޒާރާގެ ދަށުގައިވާ ހުރިހާ ކުޅިވަރު ކުޅޭ ތަންތަނާއި މަރުކަޒުތައް މާޗު މަހުގެ 15 ވަނަ ދުވަހުން ފެށިގެން ބަންދު ކޮށްފައެވެ.

ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދާއިރު، މިހާތަނަށް ރާއްޖެއިން މި ވައިރަހަށް 1،395 މީހަކު ވަނީ ޕޮޒިޓިވް ވެފައެވެ. މި ވައިރަސް ޖެހިގެން ރާއްޖެއިން 4 މީހަކު މަރުވެފައިވާއިރު، 154 މީހަކު ވަނީ ވައިރަހުން ރަނގަޅު ވެފައެވެ.