ޔޫވީގެ ކާމިޔާބު ކޯޗު އާތީ އިސްތިއުފާ ދީފި

މިދިޔަ އަހަރުގެ އުރީދޫ ދިވެހި ލީގުގެ ހަތަރުވަނަ މަގާމު ޔުނައިޓަޑް ވިކްޓަރީ (ޔޫވީ) އަށް ހޯދައިދިން ތަޖުރިބާކާރު ކޯޗު މުހައްމަދު އާތިފް (އާތީ) އެޓީމުގެ ކޯޗުގެ މަގާމުން އިސްތިއުފާ ދީފި އެވެ.

ޔޫވީގެ ކޯޗު ކަމާ މިދިޔަ އަހަރު ހަވާލުވި އާތީ އެ މަގާމުން އިސްތިއުފާ ދިންކަން އޭނަ އިއުލާން ކުރީ އަންގާރަ ދުވަހު އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމެއްގަ އެވެ.

އާތީ ބުނީ، ޔޫވީގައި މަސައްކަތް ކުރެވޭނެ ރަނގަޅު މާހައުލެއް މިހާރު ފެންނަން ނެތް ކަމަށާއި އެޓީމުގައި މައްސަލަތަކެއް އެބަހުރި ކަމަށެވެ.

މީގެ އިތުރުން އާތީ ބުނީ މިފަހަރުގެ ސީޒަނުގައި ޔޫވީ ވާދަ ކުރާއިރު އެޓީމުގެ އެއްވެސް ޓާގެޓެއް ނެތް ކަމަށެވެ.

އާތީ ބުނީ، ކުރިއަށް އޮތްތަނުގައި ވެސް ކޯޗިންގެ ދާއިރާއިން ފެންނާނެ ކަމަށެވެ. އެހެން ނަމަވެސް އެއީ ކޮން ޑިވިޝަނެއްގެ ކޮން ކްލަބަކުން ކަމެއް އާތީ ހާމައެއް ނުކުރެ އެވެ.

މިއަހަރުގެ މާލޭ ލީގުގައި ޔޫވީ ކުޅުނު ދެ މެޗުން ވެސް ވަނީ ބަލިވެފަ އެވެ. އެގޮތުން ފުރަތަމަ މެޗުގައި ކްލަބް އީގަލްސް އަތުން 2-0 ލަނޑުން ބަލިވިއިރު، ދެ ވަނަ މެޗުން ބަލިވީ ނިއު ރޭޑިއަންޓްއާ ވަދަކޮށް 3-0 ލަނޑުން ނެވެ.

ރާއްޖޭގެ ފުރަތަމަ ޑިވިޝަންގެ ގިނަ ކުލަބްތަކަށާއި 16 އަހަރުންދަށުގެ ގައުމީ ޓީމަށް ވެސް މީގެ ކުރިން ކޯޗްކަން ކޮށްދީފައިވާ އާތީ އަކީ އޭ ލައިސަންސް ކޯޗެކެވެ. އަދި އޭނާ އަކީ ކުރިން ގައުމީ އަންހެން ފުޓްބޯޅަ ޓީމުގެ ހެޑް ކޯޗުކަން ވެސް ކޮށްފައިވާ ފަރާތެކެވެ.