ހައިޑްރޮކްސިކްލޮރޯކުއިން އަކީ ކޮވިޑް-19ގެ ފަރުވާއެއްތޯ ބެލުމަށް ކުރިއަށްދާ ޓްރައަލްތައް މަޑުޖައްސާލާފައިވާ ކަމަށް ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯއިން ބުނެފި އެވެ.

ހޯމަ ދުވަހު އެ ޖަމިއްޔާއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އަދެނޯމް ވިދާޅުވީ މެލޭރިއާ ބައްޔަށް ދޭ ފަރުވާގެ ގޮތުގައި ބޭނުންކުރާ ގުޅަ ބޭހެއް ކަމުގައިވާ ހައިޑްރޮކްސިކްލޮރޯކުއިން ބޭނުން ކުރުމަކީ ކިހާ ރައްކާތެރިކަމެއްތޯ ކަށަވަރުކުރެވެންދެން އެ ބޭހަކީ ކޮވިޑް-19 ގެ ފަރުވާއެއްތޯ ބެލުމަށް ކުރިއަށްދާ ޓްރައަލްތައް މަޑުޖައްސާލާފައިވާ ކަމަށެވެ.

ޑަބްލިއުއެޗްއޯ އިން މީގެ ކުރިން ވަނީ ކްލިނިކަލް ޓްރައަލްތަކަށް ފިޔަވާ، ކޮވިޑް-19 އިން ރައްކާތެރިވުމަށާއި ވައިރަހަށް ފަރުވާ ކުރުމަށް ހައިޑްރޮކްސިކްލޮރޯކުއިން ބޭނުން ކުރުމަށް ލަފާދީފަ އެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ޑަބްލިއުއެޗްއޯގެ އިމަރޖެންސީ ޕްރޮގްރާމްގެ ހެޑް މައިކް ރަޔަން ވިދާޅުވީ ގައުމުތަކުން ލޮކްޑައުންއަށް ލުއިތަކެއް ދެމުންދާއިރު، އަދި ވައިރަހުގެ ފުރަތަމަ ރާޅު ނުނިމޭ ކަމަށެވެ. އަދި ވައިރަހުގެ ދެވަނަ ޕީކްއެއް ފެނިދާނެ ކަމުގެ އިންޒާރު ދެއްވާފައި ވެއެވެ.