ގަތަރާއި ގަލްފުގެ ގައުމުތަކާއި މެދު އުފެދިފައިވާ މައްސަލައަކީ "އައީލީ މައްސަލައެއް": އެމެރިކާ ސަރުކާރު

ގަތަރާއި ގަލްފުގެ ގައުމުތަކާއި މެދު އުފެދިފައިވާ މައްސަލައަކީ "އައީލީ މައްސަލައެއް" ގޮތުގައި އެމެރިކާ ސަރުކާރުން ސިފަކޮށްފިއެވެ.

އެމެރިކާ ވޮޝިންޓަންގައި އޮފް-ކެމެރާ ބްރީފިން އެއްގެ ތެރޭގައި ނޫސްވެރިންނަށް މައުލޫމާތު ދެއްވަމުން ވައިޓް ހައުސްގެ ތަރުޖަމާނު ޝޯން ސްޕައިސާ ވިދާޅުވީ ގަތަރުގެ މައްސަލާގައި ހިމެނޭ ގައުމުތަކަކީ އެއް އާއިލާއެއް ކަމަށާއި އެހެންކަމުން އެއީ އާއިލީ މައްސަލައެއް ކަމަށާއި އަދި އެކަން ރަނގަޅު ކުރުމަށް އާއިލާ އެކީ މަސައްކަތް ކުރަން ޖެހޭ ކަމަށެވެ.

ސައުދީ އަރަބިއްޔާ ހިމެނޭގޮތުން ގަލްފުގެ ހަގައުމަކުން ގަތަރާ ގުޅުން ކަނޑާލާފައިވާއިރު، ގުޅުން ކަނޑާލުމުގެ އިތުރަށް އަޅާފައިވާ އެހެނިހެންެް ފިޔަވަޅުތައްވެސް އުވާލެވޭނީ ގަތަރުން 13 ޑިމާންޑަކަަށް އެއްބަސްވުމުން ކަމަށް އެގައުމުތަކުން ބުނެއެވެ. ގަަތަރަށް ކޮށްފައިވާ 13 ޑިމާންޑްތަކުގެ ތެރޭގައި ގަތަރުގެ ދައުލަތުން ހިންގާ މަޝްހޫރު އަލްޖަޒީރާ ނިއުސް ނެޓްވާރކް ބަންދު ކުރުމާއި އަދި އިރާނާ ގުޅުން ކަނޑާލުން ހިމެނެއެވެ.

ގަތަރާ ގުޅުން ކަނޑާލި ގަލްފުގެ ގައުމުތަކަކީ އެމެރިކާ އާއި ވަރަށް ގުޅުން ބަދަހި ގައުމުތަކަކަށް ވާއިރު، ހުކުރު ދުވަހު ގަތަރަށް ގަލްފުގެ ގައުމުތަކުން ހުށަހެޅި ޑިމާންޑްތަކާ މެދު އެމެރިކާގެ ސްޓޭޭޓް ޑިޕާޓްމަންޓުން އަދި ސެކްރެޓަރީ އޮފް ސްޓޭޭޭޭޓް، ރަސްމީގޮތުން އެއްޗެއް ވިދާޚުވެފައެއް ނުވެއެވެ.

ގަތަރުން ޓެރަރިޒަމަށް ހިތްވަރު ދޭ ކަމަށް ބުނެ ގަތަރާ އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ކަނޑާލާފައިވާއިރު އެގައުމުތަކަކީ ސައުދީ އަރަބިއްޔާ، ޔޫއޭއީ، މިސްރު، ބަހްރައިން, ޔަމަން އަދި ލީބިޔާ އެވެ. ގަތަރާ މެދު ކުރެވޭ އެންމެހާ ތުހުމަތުތައް ގަތަރުން ދޮގު ކުރެއެވެ.ސައުދީ، ޔޫއޭއީ ބަހްރައިން އިން އިން ވަނީ ގަތަރާ އޮންނަ ޑިޕްލޮމެޓިކް ގުޅުން ކަނޑާލުމުގެ އިތުރަށް އެގައުމުތަކުގެ ވައި، ކަނޑު އަދި އެއްގަމު މަގުވެސް ގަަތަރަށް ބަންދުކޮށްފައެވެ.