ކެމިކަލް ހަމަލާއަކީ އުފައްދައިގެން އުޅޭ ވާހަކައެއް: އަސަދު

ސީރިޔާގައި ސަރުކާރުގެ ފައުޖުތަކުން ކެމިކަލް ހަމަލާއެއް ދިން ކަމަށްބުނެ ދައްކާ ވާހަކައަކީ ކަނޑައެޅިގެން ހަދައިގެން ދައްކާ ވާހަކައެއް ކަމަށް ރައީސް ބަޝާރުލް އަސަދު ވިދާޅުވެއްޖެއެވެ.

އޭޖެންސް ފްރާންސް ޕްރެސްއަށް ދެއްވި ޚާއްސަ އިންޓަވިއުއެއްގައި އަސަދު ވިދާޅުވީ " އެއްވެސް ހަމަލާއެއް ދިނުމަށް އަމުރުކޮށްފައި ނުވާނެ" ކަމަށެވެ.

ހަނގުމަވެރިންގެ ބާރުގެ ދަށުގައި އޮތް އިދްލިބްގެ ޚާން ޝެއިޚޫންގައި އޭޕްރީމް މަހުގެ 4 ވަނަ ދުވަހު ދިން ހަމަލާގައި 80 އަށްވުރެ ގިނަ މީހުން މަރުވެފައިވާއިރު އެތައް ސަތޭކަ ބަޔަކު ވަނީ ނާވް އެޖެންޓްގެ ސަބަބުން ވާފަދަ އުނދަގޫތައް ތަހައްމަލް ކޮށްފައެވެ.

މަންޒަރުދުށް މީހުން ބުނާ ގޮތުގައި ހަނގުރާމަމަތީ ބޯޓުތަކުން އެ ޓައުނަށް ހަމަލާދިން މަންޒަރު ފެނުނެވެ. ނަމަވެސް ރަޝިއާއިން ބުނަނީ އިދިކޮޅު ހަނގުރާމަވެރިން ކެމިކަލް ހަތިޔާރު ރައްކާކޮށްފައި ހުރި ގުދަނަކަށް ހަމަލާއެއް އެރީ ކަމަށެވެ.

ވީޑިއޯތަކުން ފެންނަ ގޮތުގައި އެތައް ބައިވަރު ކުޑަކުދިންނާއި މީހުން ތުރުތުއަޅައި އަނގައިން ފޮނު ނުކުމެފައިވެއެވެ. ހަމަލާގެ އަސަރުކުރި މީހުން ތުރުކީގެ ސަރަހައްދީ ރޮނގުކައިރީގެ ހޮސްޕިޓަލްތަކަށް ގެންދެވުނުއިރު، އަސަދުގެ ސަރުކާރާ ދެކޮޅު އެ ގައުމުން ބުނަމުންދަނީ ނާވް އޭޖެންޓް ބޭނުންކޮށްފައިވާކަމުގެ ސާބިތު ހެކިތައް އެބަ ހުރި ކަމަށެވެ.

އޯގަނައިޒޭޝަން ފޯ ޕްރޮހިބިޝަން އޮފް ކެމިކަލް ވެޕަންސް (އޯޕީސީޑަބްލިއު) އިން ބުރާސްފަތި ދުވަހު ބުނީ ކެމިކަލް ހަމަލާއެއް ކަމަށް ކުރާ ތުހުމަތަކި ސައްހަ ތުހުމަތެއްކަން ފުރަތަމަ ހޯދުނު ހެކިތަކުން ވެސް ސާބިތުވާ ކަމަށެވެ.

އަސަދު ތުހުމަތު ކުރައްވާ ގޮތުގައި ޚާން ޝެއިޚޫންގައި ދިން ހަމަލާއަކީ ޝައިރަތު އެއާބޭސްއަށް މިސައިލް ހަމަލާދިނުމަށް ހުޅަނގުން ދެއްކި ބަހަނާއެކެވެ.

އޭޕްރީލް މަހުގެ 4 ވަނަ ދުވަހު ދިން ކެމިކަލް ހަމަލާގެ ބަދަލުގައި ހަވަނަ ދުވަހު އެމެރިކާއިންވަނީ އެ ހަމަލާދިނުމަށް ބޭނުންކުރި ވައިގެ މަރުކަޒަށް 59 މިސައިލް ހަމަލާ ފޮނުވާލާފައެވެ.

ކެމިކަލް ހަމަލާކަމަށް ބެލެވޭ ހަމަލާގައި އަސަރުކުރި މީހުންގެ ވީޑިއޯތަކަށް އިޝާރާތް ކުރައްވާ އަސަދު ވިދާޅުވީ އެއީ ޕްރޮޕަގަންޑާ ކަމަށެވެ. އަދި އެ ވީޑިއޯގެ ސައްހަ ކަމާމެދު އަސަދު ސުވާލު އުފެއްދެވިއެވެ.

އަސަދު ވިދާޅުވީ އެ ހާދިސާއަކީ ޑްރާމާއެއް ކަމަށާއި އޭގެ ފުރަތަމަ ބަޔަކީ ކެމިކަލް ހަމަލާ ކަމަށް ބުނާ ހަމަލާ ކަމަށާއި ދެވަނަ ބަޔަކީ އެގައުމަށް ދިން އަސްކަރީ ހަމަލާ ކަމަށެވެ.

އަސަދު ވަނީ 2013 ވަނަ އަހަރު ސީރިޔާ ސަރުކާރުން ކެމިކަލް ހަތިޔާރު ދޫކޮށްލައިފި ކަމަށާއި "އަދި ހުރި ނަމަވެސް ބޭނުން ނުކުރާނެ" ކަމަށެވެ.

ސީރިޔާގެ ސަރުކާރާއި އިދިކޮޅު ފަރާތްތަކުން 2013 ވަނަ އަހަރުން ފެށިގެން ކެމިކަލް ހަތިޔާރު ބޭނުން ކުރާ ކަމުގެ ތުހުމަތުތައް އަންނަނީ ކުރެވެމުންނެވެ.

ތުރުކީ އަދި އިނގިރޭސިވިލާތުން ބުނާގޮތުގައި ޓެސްޓްތަކުން ދައްކާގޮތުގައި ޚާން ޝެއިޚޫންގައި ދިން ހަމަލާގައި ސެރިން ނުވަތަ ސެރިން ފަދަ ބާވަތެއް އެކުލެވޭ މާއްދާއެއް ވަނީ ބޭނުންކޮށްފައެވެ.

މަނާކުރެވިފައިވާ ކެމިކަލް ހަތިޔާރު ބޭނުންކޮށްގެން ހަމަލާ ދެމުންދާކަމުގެ ތުހުމަތު ކުރެވިފައި ވީ ނަމަވެސް 2013 ވަނަ އަހަރުން ފެށިގެން މިހާ ފުޅާދާއިރާއެއްގައި ކެމިކަލް ހަތިޔާރު ބޭނުންކުރެވުނު މިއީ ފުރަތަމަ ފަހަރެވެ.