ހުކުރު ދުވަހު ޓްރަކެއް ބޭނުން ކޮށްގެން ސްވިޑަންގައި ދިން ޓެރަރިސްޓް ހަމަލާ ދިން ކަމަށް ތުހުމަތު ކުރެވޭ މީހާއަކީ ޑީޕޯޓްކުރެވުމުގެ މަރުހަލާގައި ހުރި މީހެއް ކަމަށާއި އަދި އޭނާއަކީ ހައްދުފަހަނައެޅުމުގެ ވިސްނުންތަކަށް ތާއީދުކުރާ މީހެއް ކަަމަށް އެގައުމުގެ ފުލުުހުން ބުނެފިއެވެ.

ސްވިޑަންގެ ވެރިރަށް ސްޓޮކްހޯމްގެ ބާޒާރުމަތީ މަގެއްގައި ހުކުރު ދުވަހު ގިނަ ބައެއްގެ ތެރެއަށް ޓްރަކެއް ބާރު ސްޕީޑުގައި ދުއްވާފައި ގޮސް ޑިޕާޓްމަންޓް ސްޓޯރެއްގައި ޖެހި ހަތަރު މީހުން މަރުވެ 15 މީހަކު ވަނީ ޒަޚަމްވެފައެވެ. ހާދިސާ ހިންގި މީހާ ކަމަށް ތުހުމަތު ކުރެވޭ މީހާއަކީ އުމުރުން 39 އަހަރުގެ، އުޒްބެކިސްތާންގެ ރައްޔިތެކެވެ.

ހަމަލާ ދިން ކަަމަށް ތުހުމަތު ކުރެވޭ މީހާ މިދިޔަ ޖޫން މަހު ސްވީޑަންގެ ރަށްވެހި ކަމަށް އެދުމުން ވަނީ ރިޖެކްޓްކޮށްފައެވެ. އަދި ފުލުހުން ބުނާ ގޮތުން އިމިގްރޭޝަން އޮފިޝަލުން ދިޔައީ އޭނާ ހޯދަމުންނެވެ.

ރިޕޯޓުތައް ބުނާ ގޮތުން ހަމަލާ ދިން ކަމަށް ތުހުމަތު ކުރެވޭ އިތުރު މީހަކު މިހާރު ހުރީ ހައްޔަރުކޮށްފައެވެ. ފުލުހުން ބުނާ ގޮތުން ތުހުމަތު ކުރެވޭ ދެވަނަ މީހާ ފުލުހުން ތުހުމަތު ކުރަމުން ދަނީ "ގަސްތުގައި މީހަކު މަރާލައިގެން ޓެރަރިސްޓް ހަމަލާއެއް" ދިން ކަމަށް ބަލައިގެންނެެވެ. ދެވަނަޔަށް ތުހުމަަތު ކުރެވޭ މީހާއާ ބެހޭ ގޮތުން ރޮއިޓާސް އިން ބުނެފައި ވަނީ ފުރަތަމައަށް "ތުހުމަތު ކުރެވުނު މީހާޔާ އަޅާ ބަލާއިރު، ދެވަނަޔަށް ތުހުމަތު ކުރެވޭ މީހާއަށް ޝައްކު ކުރެވޭ މިންވަރު ދަށް" ކަމަށެވެ. ހާދިސާ ފުލުހުން ތަހުގީގު ކުރަމުންދާުއިރު ފުލުހުން ކުރަމުން ދާ ތަހުގީގުގައި ފުލުހުން 500 އަށް ވުރެ ގިނަ މީހުންނާ ވަނީ އިންޓަވިއުކޮށްފައެވެ.