ހުޅުމާލޭގައި ހެދި މެޑިކަލް ފެސިލިޓީ ނިންމައި، އައިޖީއެމްއެޗާ ހަވާލުކޮށްފި
24 މެއި 2020 | އާދީއްތަ 16:10މިފެސިލީޓީގައި 300 އެނދު ހުންނާނެ
ހުޅުމާލޭގައި ހެދި މެޑިކަލް ފެސިލިޓީ ހަވާލުކުރުމުގެ ރަސްމިއްޔާތުގެ ތެރެއިން
ހުޅުމާލެގައި ހުންނަ ޓްރީޓޮޕް ހޮސްޕިޓަލް ކައިރީގައި ހެދި މެޑިކަލް ފެސިލިޓީގެ މަސައްކަތް ނިންމައި އެތަން އައިޖީއެމްއެޗާ ހަވާލުކޮށްފިއެވެ.
ހުޅުމާލޭގައި މެޑިކަލް ފެސިލިޓީ ނިންމައި، އައިޖީއެމްއެޗާ ހަވާލުކުރުމަށް އާދިއްތަ ދުވަހުގެ ހަވީރު ވަނީ ރަސްމިއްޔާތެއް ބާއްވާފަ އެވެ. މިރަސްމިއްޔާތުގައި ޑިފެންސް މިނިސްޓަރ މާރިޔާ އަހްމަދު ދީދީ އާއި، ޗީފް އޮފް ޑިފެންސް ފޯސް އަބްދުﷲ ޝަމާލް އާއި ސިފައިންގެ ވެރިންނާއި ފެނަކަ ކޯޕަރޭޝަނާއި އައިޖީއެމްއެޗްގެ އިސްވެރިން ބައިވެރިވެވަޑައި ގެންނެވިއެވެ.
ހުޅުމާލޭ މެޑިކަލް ފެސިލިޓީ ހެދުމުގެ މަސައްކަތް އިސްވެ، ކޮށްފައިވަނީ ސިފައިންނެވެ. މީގެއިތުރުން ވެސް ސަރުކާރުގެ ބައެއް އިދާރާތަކާއި ބައެއް ކުންފުނިތަކުން ވެސް ބައިވެރިވެފައިވެއެވެ.
ހުޅުމާލެ މެޑިކަލް ފެސިޓީގެ މަސައްކަތް ކުރަމުންދިޔަ ބައެއް މީހުން ކޮވިޑް-19 އަށް ޕޮޒިޓިވްވުމާ ގުޅިގެން، މަސައްކަތް ކުޑަ ދުވަސް ކޮޅަކަށް މެދުކަނޑާލަން ޖެހުމުނެވެ. އެހެންކަމުން މިމަސައްކަތް ނިންމާލެވިފައިވަނީ ކުރިން ކަނޑައެޅި ތާރީހަށްވުރެ ފަހުންނެވެ.
މީގެ ދެ ހަފްތާ ކުރިން ނޭޝަނަލް އިމަޖެންސީ އޮޕަރޭޝަން ސެންޓަރުގައި (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، އެ ސެންޓަރުގެ ތަރުޖަމާނު މަބްރޫކް ޢަޒީޒު ވެސް ވަނީ އެ މަސައްކަތް ނިންމަން ދެ ހަފްތާވަރު ނަގާނެ ކަމަށް ވިދާޅުވެފަ އެވެ.
ހުޅުމާލެ މެޑިކަލް ފެސިލީޓީގައި 300 އެނދު ހުންނާނެ ކަމަށް ވެއެވެ. އަދި މިއީ ކޮވިޑް-19 ވައިރަސް ފެތުރި ގިނަ ޢަދަދެއްގެ މީހުންނަށް އެއްފަހަރާ ފަރުވާދޭން ޖެހިއްޖެ ޙާލަތަކަށް ތައްޔާރުވުމުގެ ގޮތުން ހެދި މެޑިކަލް ފެސިލިޓީ އެކެވެ.
ކޮވިޑް-19 އާ ދެކޮޅަށް މަސައްކަތް ކުރުމަށް ޤާއިމުކުރާ ފެސިލިޓީއަށް 40 މިލިއަން ޚަރަދު ކުރުމަށް ވަނީ ނިންމާފައެވެ.
މެޑިކަލް ފެސިލިޓީއަށް ޚަރަދު ކުރާ 40 މިލިއަން ރުފިޔާގެ ތެރެއިން 12 މިލިއަން ރުފިޔާ އަކީ އެތަނުގެ ކޮންސްޓްރަކްޝަނަށްދާ ޚަރަދެވެ. އަދި ބާކީ 28 މިލިއަން ރުފިޔާ އަކީ އެތަނަށް ބޭނުންވާ ޞިއްޙީ އާލާތްތަކަށް ޚަރަދު ކުރާ ފައިސާއެވެ.
