އިންޑިޔާގެ އެތެރޭގައި ފްލައިޓްތައް ހޯމަ ދުވަހު ފެށުމަށް ތައްޔާރު ވަމުންދާއިރު އެކަން ފަސްކުރުމަށް އިންޑިޔާގެ މައި ސްޓޭޓްތަކުން އެދިއްޖެ އެވެ.

އިންޑިޔާގެ މައި ސްޓޭޓްތަކުން މިގޮތަށް އެދުނީ ކޮވިޑް-19 ކޭސްތައް އާދިއްތަ ދުވަހު ގިނައިން ފެނުމާއި ގުޅިގެންނެވެ. ދެ މަސްދުވަސް ފަހުން ފްލައިޓްތައް އަލުން ފެށުމަށް ނިންމާފައި ވަނިކޮށް އާދިއްތަ ދުވަހު ވަނީ ރިކޯޑް އަދަދަކަށް މީހުންނަށް ވައިރަސް ޖެހިގެން ރިޕޯޓްކޮށްފަ އެވެ.

އާދިއްތަ އެގައުމުގެ 6767 މީހުންނަށް ވައިރަސް ޖެހިފައިވާއިރު މިހާރު އިންޑިޔާގެ 131،000 (އެއް ލައްކަ އެއްތިރީސް ހާސް) މީހުންނަށް ވަނީ ވައިރަސް ޖެހިފަ އެވެ.

އެއަރލައިން ތަކުން ހޯމަ ދުވަހު ފްލައިޓްތައް ފެށުމަށް ތައްޔާރު ވަމުންދާއިރު ފްލައިޓްތައް ޖެއްސުމުގެ ހުއްދަ ދޭނީ ކޮން ސްޓޭޓްތަކެއްތޯ އާއި ކަރަންޓީނު ކުރުމުގައި އަމަލުކުރާނެ ގޮތްތަކާއި ކަރަންޓީނު ކުރާނީ ކޮންތަނަކުން އަންނަ ފަސިންޖަރުން ކަމެއް އަދި އެއަރލައިންތަކުން ސާފުނުކުރާ ކަމަށް ރިޕޯޓްތައް ބުނެ އެވެ.

އިންޑިޔާގެ އެންމެ ހުޅަނގު މަހަރަޝްތްރަ، ތަމަލް ނާޑޫ އަދި ވެސްޓް ބެންގަލް އަކީ އިންޑިޔާގެ ވިޔަފާރީގެ މައި މަރުކަޒުތަކެވެ. އަދި އެންމެ ބިޒީ އެއަރޕޯޓްތައް އެތަންތާންގައި ހުރިއިރު އެ ތަންތަނުން ބުނެފައިވަނީ ފްލައިޓްތައް އަލުން ފެށުމަށް އެމީހުން ތައްޔާރު ނޫން ކަމަށެވެ.

މަހަރަޝްތްރައިގެ މުމްބާއީގެ ހާލަތު ގޯސްވެފައި ވާއިރު އެތަނުން މިހާތަނަށް 29،000 މީހުންނަށް ވައިރަސް ޖެހިގެން ވަނީ ރިޕޯޓްކޮށްފަ އެވެ. އެކަމާއި ގުޅިގެން މަހަރަޝްތްރައިގެ ހޯމް މިނިސްޓަރ ޓްވިޓަރގައި ވިދާޅުވެފައިވަނީ ވައިރަސްގެ ހާލަތު ގޯސް ހިސާބުތައް އަދި ވަކިން ޚާއްސަކޮށް ރެޑް ޒޯންގެ ގޮތުގައި ކަނޑައަޅާފައިވާ ހިސާބުތަކުގެ އެއަރޕޯޓްތައް ހުޅުވާލުމަށް ނިންމި ނިންމުމަކީ ރަނގަޅު ނިންމުމެއް ނޫންކަމަށެވެ.

އިންޑިޔާގެ ފެޑެރަލް ނިޒާމުގެ ދަށުން 28 ސްޓޭޓަކަށް އެމީހުން ބޭނުންވާ އުސޫލުތަކެއް އެކުލަވާލުމުގެ ފުރުސަތު ލިބިދެ އެވެ. އެހެންކަމުން ލޮކްޑައުންގައި އަޅާފައިވާ ފިޔަވަޅުތަކަށް ބޮޑުވަޒީރު ނަރެންދްރަ މޯދީގެ މައި ސަރުކާރުން ލުއިތަކެއް ދިނުމަށް ބޭނުންވި ނަމަވެސް އެކަން ކުރުމަށް ވަނީ ދަތިތަކާއި ދިމާވެފަ އެވެ.

ހޯމަ ދުވަހު ފްލައިޓްތައް ފެށުމަށް މަސައްކަތް ކުރަމުންދަނީ އިންޑިގޯ އާއި ސްޕައިސް ޖެޓް އަދި ވިސްތާރާ އެވެ.