ކޮވިޑް-19 ޖެހުނު މީހުންގެ އަދަދު 5 މިލިއަނަށް، ރަނގަޅުވި މީހުންގެ އަދަދު 2 މިލިއަނަށް!
ވައިރަސް ޖެހުނު މީހުންގެ ޖުމުލަ ޢަދަދު ހޯމަ ދުވަހު ވަނީ 5,057,080 ށް އަރާފަ
ކޮވިޑް-19 ޖެހިފައިވާ މީހަކަށް ޑޮކްޓަރުން ފަރުވާ ދެމުން ދަނީ
ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮވިޑް-19ށް މުޅި ދުނިޔެއިން ޕޮޒިޓިވްވީ މީހުންގެ ޢަދަދު 5 މިލިއަނަށް ވުރެ އިތުރުވެއްޖެ އެވެ.
އެންމެ ފަހުގެ ތަފާސް ހިސާބުތައް ދައްކާގޮތުން, ވައިރަސް ޖެހުނު މީހުންގެ ޖުމުލަ ޢަދަދު ހޯމަ ދުވަހު ވަނީ 5,057,080 (ފަސް މިލިއަން ފަންސާސް ހަތްހާސް އަށްޑިހަ) ށް އަރާފައެވެ. މި ބަލި ޖެހުނު މީހުންގެ ތެރެއިން 2,001,343 (ދެ މިލިއަން އެއްހާސް ތިންސަތޭކަ ސާޅީސް ތިނެއް) މީހުން ބަލިން ފަސޭހަވެފައި ވާއިރު 328,194 (ތިންލައްކަ އަށާވީސްހާސް އެއްސަތޭކަ ނުވަދިހަ ހަތަރެއް) މީހުން ވަނީ ކޮވިޑް-19 ޖެހިގެން މަރުވެފަ އެވެ.
ދުނިޔޭގެ 218 ޞަރަޙައްދަކުން ވައިރަސް ފެނިފައި ވާއިރު، އެމެރިކާ ފިޔަވައި ދެން އެންމެ ގިނަ ޢަދަދެއްގެ މީހުން ވައިރަސްއަށް ޕޮޒިޓިވްވެފައި ވަނީ ޔޫރަޕުގެ ޤައުމު ތަކުންނެވެ.
މިހާތަނަށް އެންމެ ގިނަ ކޭސް ރިޕޯޓުކޮށްފައިވަނީ އެމެރިކާއިންނެވެ. އެމެރިކާއިން ވައިރަހަށް ޕޮޒިޓިވްވި މީހުންގެ އަދަދު 1,586,716 (އެއް މިލިއަން ފަސްލައްކަ އަށްޑިހަ ހަހާސް ހަތްސަތޭކަ ސޯޅަ) ށް އަރާފައިވާއިރު ރަޝިއާ، ސްޕެއިން، އިޓަލީ، އިނގިރޭސި ވިލާތް އަދި ބްރެޒިލް އަކީ މުޅި ދުނިޔެއިން ވައިރަސްއަށް ޕޮޒިޓިވްވި މީހުންގެ އަދަދު ދެލައްކައަކަށްވުރެ އިތުރުވެފައިވާ ޤައުމުތަކެވެ.
