ދުނިޔޭގެ ކަންކޮޅުތަކުގައި ހާލުގައި ޖެހިފައިވާ މީހުންނަށް ރޯދަ ވީއްލުމެއް ދިނުމުގެ ފުރުސަތު ހުޅުވާލައިފި
13 މެއި 2020 | ބުދަ 12:36ޕެންޑަމިކް ހާލަތާއި ގުޅިގެން ވަރަށް ގިނަ ބަޔަކު ހާލުގައި ދިރިއުޅެމުންދޭ
ވީހާ ވެސް ގިނަ ދިވެހިން އެހީވުމަށް އިންޓަނޭޝަނަލް އެއިޑްއިން އެދިފައިވޭ
ދުނިޔޭގެ އެކިކަންކޮޅުތަކުގައި ހާލުގައި ޖެހިފައިވާ މީހުންނަށް ރޯދަ ވީއްލުމެއް ދިނުމުގެ ފުރުސަތު އިންޓަނޭޝަނަލް އެއިޑް ކެމްޕޭން (އައިއޭސީ) އިން ހުޅުވާލައިފިއެވެ.
'އިފްތާރު ޕެކޭޖް' ހަދިޔާކުރުމާއި ބެހޭގޮތުން އައިއޭސީގެ އިންޓަނޭޝަނަލް ރިލޭޝަން ހެޑް މުހައްމަދު އަލީ ވިދާޅުވީ، ދުނިޔެއަށް ކުރިމަތިވެފައިވާ ޕެންޑެމިކް ހާލަތާއި ގުޅިގެން ވަރަށް އުނދަގޫ ހާލަތެއްގައި ގިނަ ބަޔަކު ދިރިއުޅެމުން ދާއިރު، މީގެކުރިން އެތައް އަހަރެއް ވަންދެން ހަމަނުޖެހުމާއި ފަގީރު ހާލަތުގައި ދިރިއުޅެމުން ދިޔަ ފަރާތްތަކުން އުޅެމުންދަނީ މާދަތި ހާލަތެއްގައި ކަމަށެވެ.
މީގެ އިތުރުން، އެހެން އަހަރުތަކޭ އެއްގޮތައް ރަމަޟާން މަހާއި ދިމާކޮށް ކުރިޔަށް ގެންދާ 'ލޮތްބާއެކު ކެމްޕޭނު' މި އަހަރު އަމާޒުކޮށްފައިވަނީ ދުނިޔަށް ކުރިމަތިވެފައިވާ ޕެންޑެމިކް ހާލަތާއި ގުޅިގެން ކަމަށްވުމާއެކު، މިއަހަރުގެ ކެމްޕޭން ކުރިޔަށް ގެންދަނީ ލޮތްބާއެކު 2020 ޕެންޑެމިކް ރިލީފްގެ ނަމުގައި ކަން މުހައްމަދު ހާމަކުރެއްވިއެވެ. އަދި ވިދާޅުވީ 'އިފްތާރު ޕެކޭޖް' ހަދިޔާ ކުރުމުގެ ބަޔަކީ ލޯތްބާއެކު 2020 ޕެންޑެމިކް ރިލީފް ކެމްޕޭނުގެ ތެރޭގައި ހިމެނޭ ބައެއް ކަމަށެވެ.
މީގެ އިތުރުން މުހައްމަދު ވިދާޅުވީ 'އިފްތާރު ޕެކޭޖް' ހަދިޔާކުރުމުން ފަގީރު ހާލުގައި ދިރިއުޅެމުންދާ މީހުންނަށް ވަރަށް ބޮޑު ހަދިޔާއަކަށް ވެގެން ދާނެއެވެ. އަދި މިކަމުގެ ސަބަބުން ދުނިޔޭގެ ކޮންމެވެސް ބަޔަކު އެމީހުންނާ މެދު ވިސްނަމުންދާކަން އިހުސާސްވާނެ ކަން މުހައްމަދު ވިދާޅުވިއެވެ.
އައިއޭސީއިން މައުލޫމާތުދޭ ގޮތުގައި ދިވެހި ރައްޔިތުންގެ ތެރެއިން ކޮންމެ މީހަކަށް ވެސް އައިއޭސީއިން އެހީވުމަށް ކަނޑައަޅާފައިވާ 6 ގައުމުގެ ތެރެއިން ކޮންމެވެސް އެއް ގައުމެއްގެ އެންމެ މަދުވެގެން 50 މީހެއްގެ އެއް ދުވަހުގެ ރޯދަ ވީއްލުމެއް ހަދިޔާ ކުރުމުގެ ފުރުސަތު އެބައޮތެވެ.
އައިއޭސީއިން ރޯދަ ވިއްލުމުގެ ޕެކޭޖްތައް ތައްޔާރު ކުރަނީ އެހީ ވުމަށް ކަނޑައަޅާފައިވާ ސަރަހައްދުތަކުގެ ތެރެއިން އެއް ސަރަހައްދަކަށް 100 މީހުންނަށް ވާވަރަށް 'އިފްތާރު ޕެކޭޖް' ހަމަވުމުންނެވެ. މީގެ އިތުރުން، ރޯދަ ވިއްލުން ހަދިޔާކުރުމުގެ ޑޮނޭޝަން ނަގަނީ މަދުވެގެން 50 މީހެއްގެ ރޯދަ ވިއްލުން ހަދިޔާކުރަން ބޭނުންވާ ފަރާތްތަކުންކަން އައިއޭސީއިން ހާމަކުރެއެވެ.
އައިއޭސީއިން 'އިފްތާރު ޕެކޭޖް' ހަދިޔާ ކުރުމުގެ ޕްރޮގްރާމް ކުރިޔަށް ގެންދަނީ މި ރަމަޟާން މަހު ފަގީރުންނަށް އެހީވުމުގައި ގިނަ ބަޔަކު ޝާމިލުކުރުމުގެ ބޭނުމުގައެވެ. ދުނިޔޭގެ ހާލުގައި ޖެހިފައިވާ ގައުމުތަކުގެ މީހުންނަށް 'އިފްތާރު ޕެކޭޖު' ހަދިޔާ ކުރުމަށް އިންޓަނޭޝަނަލް އެއިޑް ކެމްޕޭނުން ވަނީ ގޮވާލާފައެވެ.
'އިފްތާރު ޕެކޭޖް' ހަދިޔާ ކުރުމަށް ބޭނުންވާ މީހުން އައިއޭސީގެ ހޮޓްލައިން ނަންބަރު 9122121 އަށް ގުޅައިގެން، އިފްތާރު ޕެކޭޖްތަކުގެ އަގާއި އަދި ހަދިޔާ ކުރެވޭނެ ގައުމު ތަކުގެ މައުލޫމާތު ލިބޭނެއެވެ. އަދި މި ކެމްޕޭނަށް ހަދިޔާ ކުރުމަށް ބޭނުންވާ ފަރާތްތަކަށް އައިއޭސީގެ އެކައުންޓް ނަންބަރު 7770000026259 މެދުވެރިކޮށް މި ކެމްޕޭނަށް ޑޮނޭޓް ކުރުމުގެ ފުރުސަތު ވަނީ ހުޅުވާލާފައެވެ.
މިހާތަނަށް އިންޓަނޭޝަނަލް އެއިޑް ކެމްޕޭނުގެ ފަރާތުން ވަނީ ތުރުކީގެ ބޯޑަރު ސަރަހައްދުގައި ދިރިއުޅޭ ސީރިއާގެ ރެފިއުޖީންނަށް 500 'އިފްތާރު ޕެކޭޖް' ހަދިޔާކޮށްފައެވެ. މި 500 'އިފްތާރު ޕެކޭޖް' އަކީ ދިވެހިންތަކެއްގެ ހެޔޮއެދުމާއެކު ހަދިޔާކޮށްފައިވާ ޕެކޭޖްތަކެކެވެ.
އައިއޭސީއިން ކުރިޔަށްގެންދާ ލޯތްބާއެކު 2020 ޕެންޑެމިކް ރިލީފް ކެމްޕޭނަށް ގިނަ ބަޔެއްގެ ތަރުޙީބު ލިބިފައިވާއިރު، މި ކެމްޕޭނުގެ ތެރެއިން ޖުމުލަ 60 ޑޮލަރަަށް 6 މީހުންގެ އާއިލާއަކަށް އެއް މަސް ދުވަހުގެ ކާބޯތަކެތީގެ އިތުރުން އެއް މަހުގެ ސާފުތާހިރު ވުމަށް ބޭނުންވާ ސާމާނު ދޭނެ އިންތިޒާމު ހަމަޖައްސާފަވެއެވެ.
