ކޮވިޑް-19 ޖެހިފައިވާ މީހުން މަރުވުމުން އަމަލުކުރާނެ ގޮތް ބަޔާންކުރާ އެސްއޯޕީއެއް އެކުލަވާލައިފި
ކޮވިޑް 19 ބައްޔަށް ޝައްކުކުރެވޭ މީހަކު މަރުވެއްޖެނަމަ ކޮވިޑް -19 އަށް ޓެސްޓުކުރުމަށް އެމީހާގެ ސާންޕަލް ނަގަންވާނެ
ކޮވިޑް-19 ގައި މަރުވި މީހެއްގެ ޖަނާޒާގެ ކަންކަން ކުރިޔަށް ދަނީ
ކޮވިޑް-19 ޖެހިފައިވާ ނުވަތަ ބައްޔަށް ޝައްކުކުރެވޭ މީހުން މަރުވުމުން ކަށުކަމާކެމީގެ ކަންތައްތައް ކުރާނެ ގޮތުގެ ސްޓޭންޑަޑް އޮޕަރޭޓިންގް ޕްރޮސީޖަރ (އެސްއޯޕީ) އެއް އެކުލަވައިލައިފިއެވެ.
އެސްއޯޕީ އެކުލަވާލައިފައިވަނީ ކޮވިޑް-19 އާއި ގުޅިގެން އެކުލަވާލައިފައިވާ ޓެކްނިކަލް އެޑްވައިޒަރީ ގްރޫޕްގެ ފަންނީ ބޭފުޅުންގެ ނިންމުމާއި އިސްލާމިކް މިނިސްޓްރީން މި ހާލަތުގައި އަމަލުކުރުމަށް އިރުޝާދު ދީފައިވާ ގޮތަށް ބަލައިގެންނެވެ. އެގޮތުން، އެސްއޯޕީ އެކުލަވާލަފައިވާ މަގްސަދުތަކުގެ ތެރޭގައި ކޮވިޑް-19 ބަލިޖެހިފައިވާ ނުވަތަ ޝައްކުކުރެވޭ މީހަކު މަރުވުމުން އެބަލި ނުފެތުރޭގޮތަށް ރައްކާތެރިކަމާއެކު މައްޔިތާގެ ހަށިގަނޑު ގެންގުޅުމާއި، އުފުލުމާއި ވަޅުލުމުގެ ޢަމަލުކުރާނެ ގޮތްތަކެއް ވަނީ ކަނޑައަޅާފައެވެ.
ކޮވިޑް-19 ބަލި ޖެހިގެން ނުވަތަ އެބަލި ޖެހިފައިވާކަމަށް ޝައްކުކުރެވޭ މީހުން މަރުވުމުން ކަށުކަމާކެމީގެ ކަންތަކުގައި ޢަމަލުކުރާނެ ގޮތް ކަނޑައަޅައި މިގޮތަށް މަރުވާ މީހުން ވަޅުލުމުގައި އެއްހަމައެއް ގެންގުޅުމަށް އެސްއޯޕީގައި ވަނީ ބުނެފައެވެ.
ޕެންޑަމިކް ދުވަސްވަރުގައި ގޮތް ނޭނގޭ މަރަކުން ނުވަތަ ކޮވިޑް 19 ބައްޔަށް ޝައްކުކުރެވޭ މީހަކު މަރުވެއްޖެނަމަ ކޮވިޑް -19 އަށް ޓެސްޓުކުރުމަށް އެމީހާގެ ސާންޕަލް ނަގަންވާނެކަމަށް ވަނީ ބަޔާންކޮށްފައެވެ. އެގޮތުން، ޞިއްޙީ ޚިދުމަތްދޭ ތަނުގައި ނުވަތަ ސަހަރާގައި ނުވަތަ މޯޗަރީގައި މި ސާންޕަލް ނަގާނީ ޞިއްޙީ ޚިދުމަތްތެރިންކަމަށް ވަނީ ބަޔާންކޮށްފައެވެ. އަދި ނަތީޖާއަށް މަޑުނުކޮށް މައްޔިތާގެ ކަށުކަމާކެމީގެ ކަންތައްތައް ކުރިއަށްގެންދަން އެސްއޯޕީގައި ވަނީ ބުނެފައެވެ.
މީގެއިތުރުން، ކޮމިޔުނިޓީ ސްޕްރެޑެއްއޮތް ތަނެއް ގައި ނުވަތަ ރަށެއްގައި ވަކި ސަބަބެއް ނޭގި މަރުވާ މީހުންނަކީ ކޮވިޑް-19 އަށް ޝައްކުކުރެވޭ މީހުންކަމުގައި ބަލަންވާނެކަމަށް ވަނީ ބަޔާންކޮށްފައެވެ. އަދި ގޭގައި ނުވަތަ މަގުމަތީގައި މަރުވެއްޖެނަމަ އަމަލުކުރާނެ އުސޫލުތަކާއި ވަޅުލުމަށް ފަހު އަމަލުކުރާނެ އުސޫލުވެސް ވަނީ ބަޔާންކޮށްފައެވެ.
