ފ. އަތޮޅަށް ހަދަން އުޅޭ ގޮތް ސާފުކޮށްދިނުމަށް ގޮވާލާ ޓްރާންސްޕޭރަންސީން ހަރަކާތަތްތަކެއް ފަށައިފި

ފ. އަތޮޅު ވިއްކާލުމަށް ސަރުކާރުން ނިންމާފައިވާކަމުގެ އަޑުތައް ފެތުރިފައިވާއިރު، ފ. އަތޮޅަށް ހަދަން އުޅޭ ގޮތް ސާފުކޮށްދިނުމަށް ގޮވާލައި ޓްރާންސްޕޭރަންސީ މޯލްޑިވްސް އިން ސޯޝަލް މީޑިއާ ކެމްޕޭނެއް ފަށައިފި އެވެ.

އާންމުވެފައިވާ ބައެއް މައުލޫމާތުތައް ބުނާ ގޮތުން ސަރުކާރުން ވަނީ ފ. އަތޮޅު ވިއްކާލުމަށް ނިންމާފަ އެވެ. ނަމަވެސް އެކަމާ ގުޅޭ ގޮތުން ސަރުކާރުން އެއްވެސް އެއްޗެއް ބުނެފައިނުވާއިރު، އެކަމުގެ ކަންބޮޑުވުން ފާޅުކޮށް ޓްރާންސްޕޭރަންސީން ސޯޝަލް މީޑިއާގައި ވަނީ ފ. އަތޮޅަށް ހަދަން އުޅެނީ ކިހިނެއްތޯ ސުވާލު އުފައްދާފަ އެވެ.

ޓްރާންސްޕޭރަންސީން ވަނީ ފ. އަތޮޅުގައި ދިވެހިންގެ އުއްމީދެއް ނެތީތޯ ސުވާލު އުފައްދާފަ އެވެ. އެ އަތޮޅުގެ ރައްޔިތުންނަށްވެސް ބަސްބުނުމުގެ ހައްގުނެތީތޯ އެ ޖަމިއްޔާއިން ސުވާލު އުފައްދާފައިވެއެވެ. އެ ސުވާލުތައް އުފެއްދުމަށްފަހު، ޓްރާންސްޕޭރަންސީން ވަނީ ފ. އަތޮޅަށް ހަދަން އުޅޭގޮތް ރައްޔިތުންނަށް ސާފުކޮށްދިނުމަށް ދިވެހި ސަރުކާރަށް ގޮވާލާފަ އެވެ.

ޓްރާންސްޕޭރަންސީން ކޮށްފައިވާ އެ ޕޯސްޓްތަކުގައި ވަނީ ފ. އަތޮޅު ވިއްކާލުމަށް ނިންމާފައިވާކަން ދޭހަވާ ގޮތަށް ރައީސް އަބްދުﷲ ޔާމީން ދައްކަވާފައިވާ ބައެއް ވާހަކަތައްވެސް ފާހަގަކޮށްފަ އެވެ. އެގޮތުން ފ. އަތޮޅަކީ ސައުދީ އަރަބިއްޔާގެ ސަރުކާރުގެ އިސްކޮށް ތިއްބެވި ބޭފުޅުންގެ ފަރާތުން ވަރަށް ހާއްސަ ޝައުގުވެރިކަމެއް އޮތް އަތޮޅެއް ކަމަށް ރައީސް ޔާމީން ވިދާޅުވި ވާހަކަފުޅު އެ ޖަމިއްޔާއިން ފާހަގަކޮށްފައިވެއެވެ.

ދިވެހިރާއްޖޭގެ އަތޮޅެއް ވިއްކާލުމުގެ އަޑުތައް ފެތުރިފައިވާއިރު، މިއީ މިފަދަ ގޮތަކަށް ދިވެހިރާއްޖޭގެ އަތޮޅެއް ވިއްކާލެވޭ ފުރަތަމަ ފަހަރަށްވެގެންދާނެ އެވެ. ނަމަވެސް މިއިން އެއްވެސް ވާހަކައަކާއި ގުޅޭ ގޮތުން ސަރުކަރުން އެއްވެސް ބަހެއް ހާމަކޮށްފައެއް ނުވެ އެވެ. އެއްވެސް ވާހަކައެއް ދޮގުކޮށްފަ އެއްނުވެއެވެ.

މީޑިއާ ރިޕޯޓްތައް ބުނާގޮތުން ސައުދީ ރަސްގެފާނު އަންނަ މަހުގައި ރާއްޖެ ވަޑައިގަންނަވާނެ އެވެ.