އައްޑޫ ސިޓީ ކައުންސިލްގެ މޭޔަރ އަބްދުﷲ ސޯދިގް (ސޯބެ)ގެ މައްޗަށް އުފުލާފައިވާ ކޮރަޕްޝަނުގެ މައްސަލައަކީ ސީދާ އޭނާގެ ކެންޑިޑެސީ ބާތިލް ކުރުމަށްޓަކައި ކޮށްފައިވާ ދައުވާއެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ކުރީގެ ރައީސް ނަޝީދު ކުރައްވާފައިވާ ޓްވީޓެއްގައި ވިދާޅުވެފައިވަނީ، ކޮރަޕްޝަނުގެ މައްސަލައެއްގެ ތުހުމަތުގައި އައްޑޫ ސިޓީގެ މޭޔަރގެ މައްޗަށް ކޮށްފައިވާ ދައުވާއާމެދު ހިތާމަކުރައްވާ ކަމަށެވެ. މިފަދަ ދައުވާއެއް ސޯބެގެ މައްޗަށް ކޮށްފައިވަނީ އޭނާގެ ކެންޑިޑެސީ ބާތިލްކޮށް ޑިސްކޮލިފައި ކޮށްލުމުގެ މަގްސަދުގައި ކަމަށް ރައީސް ނަޝީދު  ވިދާޅުވި އެވެ.

ސޯބެގެ އިތުރުން އައްޑޫ ސިޓީ  ކައުންސިލްގެ ޑެޕިއުޓީ މޭޔަރ ހަސަން ޝާހިދުގެ މައްޗަށް ވެސް ވަނީ ކޮރަޕްޝަންގެ ދައުވާއެއް ދައުލަތުން އުފުލާފަ އެވެ.

ސޯބެ އާއި ޝާހިދުގެ މައްޗަށް ކުރަނީ މަޤާމުގެ ނުފޫޒު ބޭނުން ކޮށްގެން ނާޖައިޒު ފާއިދާއެއް ހޯދައި ދިނުމުގެ ކުށުގެ ދައުވާއެވެ. ދެބޭފުޅުންވެސް ދައުވާއަށް އިންކާރުކުރައްވާފައިވަނީ ހޯމަ ދުވަހު މެންދުރުފަހު ހިތަދޫ މެޖިސްޓްރޭޓް ކޯޓުގައި ބޭއްވި ޝަރީއަތުގެ ފުރަތަމަ އަޑު އެހުމުގައެވެ.

ކޯޓުން ވަނީ ދެބޭފުޅުންނަށްވެސް ވަކީލަކު އައްޔަނުކުރެއްވުމަށް 14 ދުވަހުގެ މުއްދަތެއް ދެއްވާފަ އެވެ.

ސޯބެ އާއި، ޝަހިދުގެ މައްޗަށް މަޤާމުގެ ނުފޫޒު ބޭނުންކޮށްގެން ނާޖައިޒު ފައިދާއެއް ހޯދައިދިނުމުގެ ދައުވާކުރަނީ، އައްޑޫ ސިޓީގައި ބޭއްވި 17 ވަނަ ސާކް ސަމިޓަށް އެ ސިޓީގެ އިކުއިޓޯރިއަލް ކޮންވެންޝަން ސެންޓަރުގައި ކުރެހުންތަކެއް ބަހައްޓަން ކޮރަޕްޝަނަށް މަގުފަހިވާ ގޮތަށް ބަޔަކާ ހަވާލުކުރި ކަމަށް ތުހުމަތު ކުރެވޭ މައްސަލައާ ގުޅިގެންނެވެ. އެކަމާ ގުޅިގެން އޭސީސީން ނެރުނު ބަޔާނެއްގައި ބުނެފައިވަނީ  އެއްބަސްވި އަދަދަށް ވުރެ އިތުރަށް ރިލީފް އާޓް ތައްޔާރުކޮށްފައިވާ ކަމަށާއި އެ މަސައްކަތް ކުރި ފަރާތަށް 336،000ރ. ދީފައިވާ ކަމަށް ލިޔެކިޔުންތަކުން އެނގޭ ކަމަށެވެ.