ވަޒަން އެރި ގޮތް ބަލަންޖެހޭ، ފުލުހުން ތަޙްގީގް ނުކުރާތީ ކަންބޮޑުވޭ: ރިޔާޒު

ކ. ހިންމަފުށީ ގެއެއްގެ ދޮރަށް ވަޒަން އެރި ގޮތް ސީރިއަސް މައްސަލައެއްގެ ގޮތުގައި ދިވެހި ފުލުހުންނާއި ސިފައިން ބަލަންޖެހޭ ކަމަށް ކުރީގެ ޕޮލިސް ކޮމިޝަނަރު އަބްދުﷲ ރިޔާޒު ވިދާޅުވެއްޖެއެވެ.

ހިންމަފުށީ ލިލީމާގޭގެ ކުޑަ ދޮރަށް ވަޒަން އެރީ ބުދަ ދުވަހުގައެވެ. އެކަން ތަޙްގީގުކުރުމަށްފަހު އެމްއެންޑީއެފުން ބުނީ އެ ވަޒަނަކީ ކައިރީގައި އޮތް ގިރިފުށި ޓްރެއިނިންގ ސެންޓަރުން ފޯރާނެ ވައްތަރުގެ ވަޒަނެން ނޫން ކަމަށެވެ.

Advertisement

ރާއްޖެއެމްވީއަށް މައުލޫމާތު ދެމުން ކިނބިދޫ ދާއިރާގެ ރައްޔިތުންގެ މަޖިލީހުގެ މެމްބަރު އަބްދުﷲ ރިޔާޒު ވިދާޅުވީ ހިންމަފުށީ ގެއެއްގެ ދޮރަށް ވަޒަން އެރި މައްސަލައާ ގުޅިގެން އެމްއެންޑީއެފުން ނެރުނު ނޫސްބަޔާނާމެދު ކަންބޮޑުވާ ކަމަށެވެ. މިއީ އެފަދަ ދެވަނަ މައްސަލަ ކަމަށްވާއިރު، ވަޒަން މީހާކާ ދިމާވި ނަމަ މަރުވާނެ ކަމަށް ރިޔާޒު ވިދާޅުވިއެވެ.

އެމްއެންޑީއެފުން ބުނެފައި ވަނީ އެގޭގެ ދޮރަށް އެރި ވަޒަނަކީ ގިރިފުށި ޓްރެއިނިންގ ސެންޓަރުން ހިންމަފުށްޓަށް ފޯރާނެ ވައްތަރުގެ ވަޒަނެއް ނޫން ކަމަށާއި ހަތިޔާރާއި ވަޒަން ބޭނުންކޮށްގެން ހިންގާ ތަމްރީނުތަކަކީ އޭގެ ސަބަބުން އެއްވެސް މީހަކަށް ނުވަތަ މުދަލަށް އެއްވެސް ގެއްލުމެއް ނުވާނެ ގޮތަށް ސަލާމަތާއި ރައްކާތެރިކަމުގެ ފިޔަވަޅުތައް ކަށަވަރު ކުރެވިގެން ހިންގާ ތަމްރީނުތަކެއް ކަމަށެވެ.

ރިޔާޒު ވަނީ މިއީ ކިހިނެތް ކޮންތާކުން އައި ވަޒަނެއްތޯ ސުވާލު އުފައްދާފައެވެ. ހަތިޔާރު ގެންގުޅެނީ އެމްއެންޑީއެފުން ކަމަށްވާއިރު އެމީހުންގެ ތަމްރީނުތަކުގައި ބޭނުން ކުރާ ފަދަ ވަޒަނެން ނޫން ކަމަށް ބުނާނަމަ އިތުރު ބަޔަކު ހަތިޔާރު ގެންގުޅޭތޯ ވެސް ބަލަން ޖެހޭ ކަމަށް އޭނާ ވިދާޅުވިއެވެ. އަދި ފުލުހުން މިކަންކަމާމެދު ވިސްނައި ތަހްގީގް ކުރަންޖެހޭ ކަމަށް އެނާ ވިދާޅުވިއެވެ.

މީގެ ދެ އަހަރުކުރިންވެސް ހިންމަފުށީ ގެޔަކަށް ވަޒަނެއް އަރާފައިވެއެވެ. ހިންމަފުށީ ގެޔަކަށް ވަޒަން އަރާފައިވަނީ، އެ ރަށް ކައިރީގައި އޮންނަ އެމްއެންޑީއެފްގެ ތަމްރީންތައް ކުރިއަށްގެންދާ ގިރިފުށިންނެވެ.