ޝެއިޚް ހުސެއިން ޔޫސުފް އަވަހާރަވެއްޖެ
ރައްޔިތުންގެ މަޖިލީހުގެ މެންބަރުކަން ކުރައްވާފައިވޭ
ޝައިޚް ހުސައިން ޔޫސުފް
ސަރުކާރަށް ގިނަ ދުވަހު ޚިދުމަތް ކުރައްވާފައިވާ މ.ނޫހިރި އައްޝައިޚް ހުސައިން ޔޫސުފް އަވަހާރަ ވެއްޖެއެވެ.
ހުސައިން ޔޫސުފަކީ ތުޅާދޫ ދާއިރާގެ މެންބަަރު ހިސާން ހުސައިން އާއި ދިވެހިރާއްޖެ އިން އެމެރިކާ އަށް ކަނޑައަޅުއްވާފައި ހުންނަވާ ސަފީރު ތިލްމީޒާ ހުސައިންގެ ބައްޕާފުޅެވެ.
އައްޝައިޚް ހުސައިން ޔޫސުފް އަވަހާރަ ވެފައިވަނީ ގިނަ ދުވަހު އާލާސްކަންފުޅާއި އުޅުއްވުމަށްފަހު ބުދަ ދުވަހުގެ ރޭ އިންޑިއާގައެވެ.
ހުސައިން ޔޫސުފް އަވަހާރަވީއިރު އުމުރުފުޅަކީ 78 އަހަރެވެ. އަވަހާރަވިއިރު 7 ދަރިކަލުންނާއި އަނބިކަނބަލެއް ދުނިޔޭގައި އެބަ ތިއްބެވިއެވެ.
ހުސައިން ޔޫސުފަކީ ރައްޔިތުންގެ މަޖިލީހުގެ މެންބަރު ކަމާއި، ހައިކޯޓުގެ ފަނޑިޔާރު ކަމާއި ޖަސްޓިސް މިނިސްޓްރީގެ ޑީޖީގެ މަޤާމް އަދާކުރައްވާފައިވާ ބޭފުޅެކެވެ.
ބ. ހިތާދޫއަށް އުފަން ހުސައިން ޔޫސުފް ވަނީ ގިނަ ދުވަސްތަކެއްވަންދެން ހިލޭސާބަހަށް ކުދިންނަށް ތަޢުލީމް އުނގަންނައިދެއްވާފައިވެއެވެ. އަދި ހިތާދޫގެ ގިނަ ދަރިންތަކެއް ދީނީ ތަޢުލީމް ހާސިލް ކުރުމަށް ބޭރަށް ފޮނުއްވައި ހިތާދޫގައި އިސްލާމީ ތަޢުލީމް ދިނުމަށް މަދަރުސާއެއް ހުޅުއްވައިދެއްވައި ހިތާދޫގައި ގިނަ ތައުލީމީ ދަރިންތަކެއް އުފައްދަވާފައެވެ.
މީގެ އިތުރުން އައްޝައިޚް ހުސައިން ޔޫސުފް ރާއްޖޭގެ ސިޔާސީ މަޝްރަހު ބަދަލު ކުރެއްވުމަށް ގިނަގުނަ މަސައްކަތްތަކެއް ކުރައްވާފައެވެ. އެގޮތުން ހިތާދޫގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ޕްރޮމޯޓްކޮށް އެޕާޓީއަށް ތާއީދު ހޯއްދެވުމަށް ގިނަ މަސައްކަތްތަކެއްް ކުރައްވާފައި ވެއެވެ.
