ދަރުމަވަންތަ ހޮސްޕިޓަލުގައި ޖުމްލަ 6 މީހަކަށް ފަރުވާ އެބަދޭ، އެކަކު ވެންޓިލޭޓަރުގައި!
4 މެއި 2020 | ހޯމަ 17:45ދަރުމަވަންތަ ހޮސްޕިޓަލުގައި ފަރުވާދެމުންދާ 6 މީހުންގެ ތެރެއިން 3 މީހުން ސްޓޭބަލް
ދަރުމަވަންތަ ހޮސްޕިޓަލް
ޖުމްލަ 6 މީހަކަށް ދަރުމަވަންތަ ހޮސްޕިޓަލުގައި ފަރުވާ ދެމުންދާކަމަށާއި އޭގެތެރެއިން އެކަކަށް ވެންޓިލޭޓަރުގައި ފަރުވާދެމުންދާކަމަށް ޑރ އިބްރާހިމް އަފްޒަލް ވިދާޅުވެއްޖެއެވެ.
ދަރުބާރުގޭގައި ގާއިމްކޮށްފައިވާ ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ޑރ އަފްޒަލް ވިދާޅުވީ، ދަރުމަވަންތަ ހޮސްޕިޓަލުގައި ފަރުވާދެމުންދާ 6 މީހުންގެ ތެރެއިން 3 މީހުން ސްޓޭބަލްކަމަށެވެ.
ޑރ ވިދާޅުވީ ހޮސްޕިޓަލުގައި ފަރުވާ ދެމުންދާ މީހުންގެ ތެރެއިން، 80 އަހަރުގެ ފިރިހެނަކާއި 70 އަހަރުގެ ފިރިހެނަކަށް އޮކްސިޖަން ދޭން ފަށާފައިވާކަމަށެވެ. ޑރ ވިދާޅުވީ 88 އަހަރުގެ ފިރިހެނަކަށް ވެންޓިލޭޓަރުގައި ފަރުވާދެމުން ގެންދާކަމަށާއި އަދި ވެންޓިލޭޓަރުން ނަގައި ފަރުވާ ދެވޭވަރަށް އެމީހާގެ ހާލަތު އަދި ބަދަލުނުވާކަމަށެވެ.
ނޫސްވެރިންގެ ބައްދަލުވުމުގައި އިތުރަށް ވާހަކަ ދައްކަވަމުން ޑރ އަފްޒަލް އިތުރަށް ވިދާޅުވީ، 6 މީހުންގެ ތެރެއިން 58 އަހަރުގެ އަންހެން މީހާ އާއި 48 އަހަރުގެ ފިރިހެން މީހާ ޙާލު ސްޓޭބަލްކަމަށެވެ. އަދި އެހެން ކަމަކާ ޑޮކްޓަރަށް ދެއްކި އަންހެން މީހާގެ ޙާލު ސްޓޭބަލްކަމަށެވެ.
މީގެކުރިން ބޭއްވި ނޫސްވެރިންގެ ބައްދަލުވުމުގައި އެޗްޕީއޭއިން ވަނީ، އެހެން ގައުމުތަކުގެ ތަފާސް ހިސާބްތަކަށް ބަލާއިރު ގާތްގަނޑަކަށް 2 އިންސައްތަ ނިޔާވާކަމަށާއި ރާއްޖޭގައި މިހާތަނަށް ޖުމްލަ ޕޮޒިޓިވްވި އަދަދަށް ރިއާޔަތްކޮށް ހަދާފައިވާ އަންދާޒާ ހިސާބުތަކަށް ބަލާނަމަ ގާތްގަނޑަކަށް 15 އިންސައްތަ މީހުން ކޮމްޕްލިކޭޝަންސް އަލާމާތްތަކެއް ނުވަތަ ބަލި އިތުރަށް ބޮޑުވެއްޖެނަމަ 40 ޕޭޝަންޓުން އެޑްމިޓް ކުރަންޖެހޭނެކަމަށް ބުނެފައެވެ. އަދި އޭގެތެރިން 14 ޕޭޝަންޓުން އައިސީޔޫގައި ފަރުވާ ދޭންޖެހޭނެކަމަށް އަންދާޒާކުރެވޭކަމަށެވެ.
