ހޮނިހިރު ދުވަހު ފްރާންސުން ކޮވިޑް-19 ޖެހިގެން 166 މީހުން މަރުވެއްޖެ
ހުކުރު ދުވަހު އެ ޤައުމުން މަރުވެފައިވަނީ 218 މީހުން
ފްރާންސްގައި ބަލި ޖެހިގެން އެނދުމަތި ކުރެވޭ މީހުންގެ އަދަދުތައް ދަނީ ދަށްވަމުން
ފްރާންސުން ކޮވިޑް-19 ޖެހިގެން ހޮނިހިރު ދުވަހު އެކަނިވެސް 166 މީހުން މަރުވެއްޖެއެވެ.
ފްރާންސްގެ ހެލްތް މިނިސްޓްރީއާ ޙަވާލާދީ ރޮއިޓަރސްގައި ރިޕޯޓްކޮށްފައިވާ ގޮތުން ފްރާންސުން އިތުރު 166 މީހުން މަރުވެ، އެ ޤައުމުން މަރުވި މީހުންގެ ޖުމުލަ އަދަދު 24،760ށް އަރާފައިވާއިރު، ބަލި ޖެހިގެން އެ ޤައުމުގައި އެނދުމަތި ކުރެވޭ ފަރާތްތަކާއި، އައިސީޔޫގައި ފަރުވާދޭންޖެހޭ މީހުންގެ އަދަދު ފާއިތުވި ދުވަސްތަކުގައި ވަނީ ދަށްވެފައެވެ.
އެގޮތުން މިބީދައިން އަދަދުތައް ދަށްވަމުންދާތާ ދެ ހަފްތާވެފައިވާއިރު، ހުކުރު ދުވަހު އެ ޤައުމުން މަރުވެފައިވަނީ 218 މީހުންކަމަށްވެސް ރިޕޯޓްކޮށްފައިވެއެވެ. އަދި ކޮވިޑް-19 ޖެހިގެން އެނދުމަތި ކުރެވޭ ފަރާތްތަކުގެ އަދަދުވެސް 25،887ން 25,827ށް ވަނީ ދަށްވެފައެވެ.
ފްރާންސްގައި މި ވައިރަސް ފެތުރޭ މިންވަރު ކޮންޓްރޯލް ކުރުމަށް އަޅަމުންދާ ފިޔަވަޅުތަކުގެ ދަށުން އެ ޤައުމުން ވަނީ ދަތުރުފަތުރު ކޮށްފައި އެ ޤައުމަށް އެތެރެވާ ހުރިހާ ފަރާތެއްވެސް 14 ދުވަހުގެ ކަރަންޓީން މުއްދަތު ފުރިހަމަކުރާން ޖެހޭނެކަމަށް ބުނެފައެވެ. އެގޮތުން ފްރާންސްގެ ރައްޔިތުންވެސް މި މުއްދަތަށް ކަރަންޓީން ވާން ޖެހޭނެކަމަށް ބުނެފައިވެއެވެ.
އެހެން ނަމަވެސް، އެ ޤައުމުން ވަނީ ލޮކްޑައުންގެ ފިޔަވަޅުތަކަށް ލުއި ދިނުމަށް ނިންމާފައެވެ. އެގޮތުން މިހިނގާ މެއި މަހުގެ 11 ވަނަ ދުވަހުން ފެށިގެން ލޮކްޑައުންގެ ފިޔަވަޅުތަކަށް ލުއި ދިނުމަށް އެ ޤައުމުގެ ސަރުކާރުން ވަނީ ނިންމާފައެވެ.
