ރާއްޖޭގެ ހުރިހާ ރައްޔިތުން ވެސް ހަފުތާއަކު އެއްދުވަހު އެމީހަކު ދިރިއުޅޭ ގެއާއި، ގޯތިތެރެ ސާފުކޮށް މަދިރި އުފެދޭ ތަންތަން ނައްތާލުމަށް އިލްތިމާސްކޮށްފިއެވެ.

ބުރާސްފަތި ދުވަހުގެ ރޭ ބޭއްވި ނޫސްވެރިން ބައްދަލުވުމުގައި ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް ވިދާޅުވީ ބަލިތަކުން ރައްކާތެރިވުމަށް އެޅޭނެ އެންމެ މުހިންމު ފިޔަވަޅަކީ ސާފުތާހިރުކަން އިތުރު ކުރުން ކަމަށެވެ. ކޮވިޑް-19ގެ ބިރުވެރިކަން ބޮޑުވެފައިވާ މިދަނޑިވަޅުގައި އިތުރަށް ސާފުތާހިރު ކަމަށް ސަމާލުކަން ދޭން ޖެހޭ ކަމަށް ޑރ. އަފްޒަލް ވިދާޅުވިއެވެ.

ޑރ. އަފްޒަލް ވިދާޅުވީ ކޮވިޑް-19ގެ ސަބަބުން ދިރިއުޅުމުގެ ވައްޓަފާޅިއަށް ބޮޑެތި ބަދަލުތަކެއް އައިސްފައިވާ މިދަނޑިވަޅުގައި ހަފުތާއަކު މަދުވެގެން އެއްފަހަރު ގެއާ ގޯތިތެރެ ސާފުކުރަންޖެހޭ ކަމަށެވެ.

މަދިރި އުފެދި އާލާވާ ތަންތަން ނައްތާލުމަށް ޚާއްޞަ ސަމާލުކަމެއް ދިނުމަށް ޑރ. އަފްޒަލް އިލްތިމާސްކުރެއްވިއެވެ. އަދި ވިދާޅުވީ މިއީ ހަމައެކަނި މާލެސިޓީގައި ދިރިއުޅޭ ރައްޔިތުން ކުރަންޖެހޭ ކަމެއް ނޫން ކަމަށާއި، މިއީ ރާއްޖޭގެ ހުރިހައި ޞަރަޙައްދެއްގެ ރައްޔިތުން ކުރަންޖެހޭ ކަމެއް ކަމަށެވެ.

ކޮންމެ ހަފުތާއަކު އެއްފަހަރު ގެއާ ގޯތިތެރެ ސާފުކޮށް، މަދިރި އުފެދޭ ތަންތަން ނައްތާލުމަށް އިލްތިމާސްކޮށްފައިވާއިރު، މިދުވަސްވަރަކީ ވިއްސާރަ މޫސުމަށްވެފައި މަދިރިން ސަލާމަތް ވުމަށް ޚާއްޞަ ސަމާލުކަމެއް ހުރިހާ ފަރާތްތަކަކުން ވެސް ދޭންޖެހޭނެ ކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރުވެސް ވިދާޅުވެފައިވެއެވެ.

މައިމޫނާ ވިދާޅުވީ ވިއްސާރަ މޫސުމާ ދިމާކޮށް އަބަދުވެސް އިރުޝާދު ދެމުން އަންނަނީ ޑެންގީ ފަދަ ބަލިތައް އަންނާތީ އެކަމަށް ޚާއްޞަ ސަމާލުކަމެއް ހުރިހާ އެންމެންވެސް ދިނުމަށްކަމަށެވެ. އިންފްލުއަންޒާގެ ޢަލާމާތްތައްވެސް މިހާރު ފެނުމާއެކީގައި ޓެސްޓްތައް ކުރެވެމުންދާކަމަށް މައިމޫނާ ވިދާޅުވި އެވެ. އަދި ޑެންގޫއަށް މިދުވަސްވަރު ޚާއްޞަ ސަމާލުކަމެއް ދޭންޖެހޭ ޙާލަތަށް އައިސްފައިވާ ކަމަށް މައިމޫނާ ވިދާޅުވިއެވެ.

ޑެންގީގައި ޢާންމުކޮށް ގަދަ ހުމެއް އައިސް، ބޮލުގައި ރިއްސާ، ހުޅުހުޅުގައި ރިއްސާއިރު، ޑެންގީން ރައްކާތެރިވުމަށް ހަށިގަނޑު ނިވާވާވަރަށް ހެދުން އެޅުމަށާއި، މަދިރި ލޯޝަން އަދި ސުޕްރޭ ފަދަ ތަކެތި ބޭނުންކުރުމަށް ވަނީ އެދިފައެވެ. މީގެ އިތުރުން ހެނދުނާއި ހަވީރުގެ ވަގުތުގައި ގޭގެ ދޮރު ލައްޕާފައި ބެހެއްޓުމަށާއި، ފެން ހަރުނުލާގޮތަށް އެއްޗެހި ބެހެއްޓުމަށް ސަމާލުކަން ދިނުމަށްވެސް ވަނީ އެދިފައެވެ.