ރަމަޟާން މަހާ ގުޅިގެން އުފެދޭ ކުނި އުކާލުމަކީ ވިޔަފާރިއަކަށް ހަދައިގެން ނުވާނެ: ޝަމާއު
ރަމަޟާން މަހާއި ދިމާކޮށް މަގުތަކަށް ވަނީ ގިނަ އަދަދެއްގެ ކުނި އަޅާފަ
މަގުމައްޗަށް އުކާލާފައިވާ ކުނިތަކެއް
ރަމަޟާން މަހާއި ގުޅިގެން ކުނި އުފެދޭ މިންވަރު އެތައް ގުނައެއް އިތުރުވެގެންދާއިރު، އެ ކުނި އުކާލުމަކީ، ވިޔަފާރިއަކަށްވުރެ ބޮޑަށް މުނިސިޕަލް ޚިދުމަތެއް ކަމުގައި ދެކިގެން ކުރަން ޖެހޭ ކަމަށް މާލޭ ސިޓީ ކައުންސިލްގެ މެންބަރު ޝަމާއު ޝަރީފް ވިދާޅުވެއްޖެއެވެ.
ޝަމާއު ވިދާޅުވީ ރަމަޟާން މަހަށް ގެދޮރު ޒީނަތްތެރިކޮށް، ފަރުނީޗަރު ފަދަ ތަކެތި އާކުރުމާ ގުޅިގެން، އުފެދި، މަގުތަކުގައި ބެހެއްޓިފައި ހުރި ގިނަ އަދަދެއްގެ ކުނި މިހާރު އުކާލާފައިވާކަން ފާހަގަވާ ކަމަށާ، ނަމަވެސް ކުނި އުކުމަށް ބޮޑު އަގުތަކެއް ނަގަމުންދާ ކަމުގެ ޝަކުވާ ލިބިފައިވާ ކަމަށް އޭނާ ވިދާޅުވި އެވެ.
"މިފަހަރު ވަރަށް ބޮޑަށް ޝަކުވާތައް ރައްޔިތުންގެ ފަރާތުން އެބަ އުފުލާ ކުނި އުކުމުގަ ވަރަށް ބޮޑެތި އަގުތައް ނަގާ ކަމަށް. ރޯދަމަހާ ދިމާކޮށް ވަކިން ޚާއްސަކޮށް އެގޮތަށް ހިންގާ ސާފުކުރުމުގެ މަސައްކަތްތަކުގައި އުކާލާ ކުނިން އެހާ ބޮޑެތި އަގުތައް ރޯދަ މަސް ކުރިމަތީގަ އޮއްވާ ނެގީމަ ރައްޔިތުންނަށް ވަރަށް އެބަ ދަތިވޭ،"
ޝަމާއު ވިދާޅުވީ ރަމަޟާން މަހަކީ ކުނި އުފެދޭ މިންވަރު ވަރަށް ބޮޑަށް އިތުރުވެގެންދާ މަހަކަށް ވާއިރު، ކުނި އުކުމުގައި ރައްކާތެރިވުމަކީ ފަރުދީ ކަމެއްގެ ގޮތުގައި ދެކިގެން ހުރިހާ ފަރާތްތަކުންވެސް މަސައްކަތް ކުރަން ޖެހޭ ކަމަށެވެ. އަދި ޚާއްސަކޮށް މި ދުވަސްވަރަކީ ވިއްސާރަ ދުވަސްވަރަކަށް ވުމުން، މަގުމައްޗަށް ކުނި އުކުމުގެ ބަދަލުގައި ރައްކާތެރި ކަމާއެކު ކުނި ނައްތާލުމަށް ވިސްނަން ޖެހޭ ކަމަށް ޝަމާއު ވިދާޅުވިއެވެ.
