ވެރިކަން ކުރާ މައި ޕާޓީ ޕީޕީއެމްގެ ރައީސަކީ އަދިވެސް ރައީސް މައުމޫން ކަމަށް ރައީސް ޔާމީން ފެކްޝަންގައި ހުންނެވުމަށްފަހު އިދިކޮޅު އިސްލާހީ ހަރަކާތާ ގުޅިވަޑައިގެންނެވި ރައްޔިތުންގެ މަޖިލީހުގެ ގއ ވިލިނގިލީ ދާއިރާގެ މެންބަރު ސައުދު ހުސައިން ވިދާޅުވެއްޖެއެވެ.
މެންބަރު ސައުދު މިހެން ވިދާޅުވީ ގުޅިފައިވާ އިދިކޮޅު ޕާޓީތަކާ ގުޅިވަޑައިގެންނެވިކަން ރާއްޖެ ޓީވީއަށް ކަށަވަރުކޮށްދެއްވާ ރާއްޖެ ޓީވީގެ 60 މިނިޓް ޕްރޮގްރާމަށް ދެއްވި އެކްސްކްލޫސިވް އިންޓަވިއުއެއްގައެވެ.
ރާއްޖެ ޓީވީއަށް ދެއްވި އިންޓަވިއުގައި ސައުދު ވިދާޅުވީ އޭނާ ޤަބޫލު ކުރައްވާ ގޮތުގައި ޕީޕީއެމްގެ ރައީސަކީ އަދިވެސް ރައީސް މައުމޫން ކަމަށެވެ. ސަބަބަކީ ޕީޕީއެމްގެ ކޮންގރެސްއަކުން ޕީޕީއެމްގެ ޢާއްމު މެންބަރުންގެ ވޯޓަކުން އިންތިޚާބު ކުރައްވާފައިވާ ރައީސަކީ ރައީސް މައުމޫން ކަމަށް ވުން ކަމަށް ސައުދު ވިދާޅުވިއެވެ. އެހެންކަމުން ޕީޕީއެމްގެ ރައީސްގެ ހައިސިއްޔަތުން ރައީސް މައުމޫން ކުރައްވާ ކަންތައްތަކާއެކު އެމަސައްކަތުގައި ކުރިއަށް ވަޑައިގަންނަވާނެ ކަމަށް ސައުދު ވިދާޅުވިއެވެ.
ސައުދު ވިދާޅުވީ ރައީސް މައުމޫނުގެ ޚިދުމަތްތައް މި ގައުމުން ފުހެ ނުލެވޭނެ ކަމަށެވެ.
ސައުދު ވިދާޅުވީ ސައުދުގެ ނިންމެވުމަކީ އެއީ ކަމަށާއި ރައީސް މައުމޫނާއެކު ރައީސް މައުމޫންގެ ޕާޓީ ކުރިއެރުވުމަށްޓަކައި ކުރައްވަން ޖެހޭ މަސައްކަތް ހުއްޓުމެއްނެތި ކުރިއަށް ގެންދަވާނެ ކަމަށެވެ.
އެގޮތުގައި ކިހާ ސާބިތު ކަމާއެކު ހުންނަވާނަންތޯ ރާއްޖެ ޓީވީން ދެންނެވުމުން ސައުދު ވިދާޅުވީ އަބަދުވެސް ހުންނަވަނީ ސާބިތު ކަމާއެކުގައި ކަމަށާއި ކުރިއަށް އޮތްތަނުގައިވެސް ހުންނަވާނީ އެގޮތުގައި ކަމަށެވެ.
