ނިޔާވި މީހާގެ ފިރިމީހާއަށް ފަރުވާ ދެމުންދަނީ ޑީއެޗް 11 ގައި، ހާލު ރަނގަޅު
1 މެއި 2020 | ހުކުރު 00:49އައިމިނަތު އާދަމް، ކޮވިޑް-19 ގައި ނިޔާވިއިރު އޭނާ އަށް އެ ބަލި ޖެހިފައިވާ ކަން ޔަގީނެއް ނުވޭ
ދަރުމަވަންތަ ހޮސްޕިޓަލް
ކޮވިޑް-19 ޖެހިގެން ރާއްޖޭގައި އެންމެ ފުރަތަމަ ނިޔާވި އަންހެން މީހާގެ ފިރިމީހާ އަށް ދަރުމަވަންތަ ހޮސްޕިޓަލްގެ އެގާރަ ވަނަ ފަންގިފިލާގައި ފަރުވާދެމުންދާ ކަމަށާއި އެމީހާގެ ހާލު ރަނގަޅުކަމަށް ކޮވިޑް-19 ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ ބުރާސްފަތި ދުވަހުގެ ވަގުތެއްގައި ނޭވާލާން އުނދަގޫވެގެން އުޅުނުކަމުގެ މައުލޫމާތު ލިބުނު ކަމަށާއި ނަމަވެސް އޭގެފަހުން ހާލު ސްޓޭބަލްކަމުގެ މައުލޫމާތު ލިބިފައިވާ ކަމަށެވެ.
އައިމިނަތު އާދަމް، ކޮވިޑް-19 ގައި ނިޔާވިއިރު އޭނާ އަށް އެ ބަލި ޖެހިފައިވާ ކަން ޔަގީނެއް ނުވެ އެވެ. ކޮވިޑް-19 ގެ ޓެސްޓުގެ ނަތީޖާ ލިބުނީ އަންހެން މީހާ ނިޔާވި ފަހުންނެވެ. ނޭވާލުމުގައި ދަތިތަކެއް ހުރިކަމުގެ ރިޕޯޓް ލިބިފައިވަނީ ބުދަ ދުވަހުގެ އިރުއޮއްސި 6:15 ހާއިރު ކަމަށް މަބްރޫކް ވަނީ ވިދާޅުވެފަ އެވެ. އަދި އައިޖީއެމްއެޗަށް ގެންދިޔަ އިރު ވެސް ނިޔާވެފައިވާ ކަމަށް މަބްރޫކް ވިދާޅުވި އެވެ.
އައިމިނަތު އާދަމްގެ ފިރިމީހާ ޕޮޒިޓިވް ވެފައިވަނީ އޭޕްރީލް މަހުގެ 23 ވަނަ ދުވަހު ކަމަށް މަބްރޫކް ވަނީ ވިދާޅުވެފަ އެވެ. މިއީ އެމްއެޗްއޭ ކްލަސްޓަރ ތެރޭގައި ހިމެނޭ މީހުންނެވެ. އައިމިނަތު އާދަމް ގެ ފިރިމީހާ ޕޮޒިޓިވްވެފައިވަނީ ކޭސް 72 ގެ ފަރާތުންނެވެ.
