ފެބްރުއަރީ މަހުގެ 4 ވަނަ ދުވަހު ހުޅުމާލޭގައި ބިދޭސީންތަކަކަށް ދިން ހަމަލާއަކީ ޓެރަރިޒަމާއި ދެކޮޅަށް ކުރާ މަސައްކަތައް ބަދަލުހިފުމަށް ދިން ހަމަލާއެއްކަމަށް މޯލްޑިވިސް ޕޮލިސް ސަރވިސް އިން ބުނެފިއެވެ.

ބުދަ ދުވަހުގެރޭ މޯލްޑިވިސް ޕޮލިސް ސާރވިސް އިން ބޭއްވި ނޫސްވެރިންގެ ބައްދަލުވުމުގައި، އެސިސްޓަންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ވިދާޅުވީ، ހުޅުމާލޭގައި ފެބްރުއަރީ 4 ވަނަ ވަނަ ދުވަހުގެރޭ 3 ފަތުރުވެރިއަކަށް ދިން ހަމަލާއަކީ، މިދިޔަ އަހަރު ކަމާގުޅޭ އިދާރާތައް ގުޅިގެން، ހަރުކަށި ފިކުރާއި ދެކޮޅަށް ކުރި މަސައްކަތަށް ބަދަލު ހިފުމަށް ދިން ހަމަލާއެއްކަމަށް މިހާތަނަށް ތަހުގީގުން ކަށަވަރުވެފައިވާކަމަށެވެ. އެގޮތުން އެއީ 2019 ވަނަ އަހަރު ތެރޭގައި ރ. މަޑުއްވަރީގައި ފުލުހުންނާއި ޖެންޑަރ މިނިސްޓްރީ ފަރާތުން ހިންގި ހާއްސަ އޮޕަރޭޝަނެއްގައި ދީނުގެ ނަމުގައި ހަރުކަށި ފިކުރު ގެންގުޅެ އެ ފިކުރު ފެތުރުމަށް މަސައްކަތްކުރާ ފަރާތްތައް ހައްޔަރުކޮށް އެފަދަ ބައެއް ފަރާތްތަކުގެ ދަރިންނާއިމެދު އިހުމާލުވާ މައްސަލަތަކުގައި އެކުދީން ދައުލަތުގެ ބެލުމުގެ ދަށަށް ގެންގޮސްފައިވާތީ އެކާމާއި ހިތްހަމަނުޖެހި މެސެޖެއްދީ އެކަން ހުއްޓުމަށް މަޖުބޫރުކުރަން ދިން ހަމަލާއެއްކަމަށް ފުލުހުން ބުންޏެވެ.

ތަފްސީލް ހިއްސާކުރައްވަމުން އޭސީޕީ ރިޔާޒު ވިދާޅުވީ، ހާދިސާގެ މައުލޫމާތު ލިބުމާއި އެކު ފެބްރުއަރީ 4 ވަނަ ދުވަހުގެ ރޭ ހުޅުމާލެއަށް ތަހުގީގު ޓީމެއް ފޮނުވާފައިވާނެކަމަށާއި އަނިޔާ ލިބުނު މީހުން ހޮސްޕިޓަލަށް ގެންދިޔަ ފަރާތްތަކާއި އަނިޔާ ލިބުނު ފަރާތްތަކާއި ވާހަކަ ދެއްކިކަމަށެވެ. އެގޮތުން، ހާދިސާ ހިނގި ގޮތް ފުލުހުންނަށް ދެނެގަނެވިފައިވަކަމަށް އޭނާ ފާހަގަކުރެއްވިއެވެ. އޭނާ ވިދާޅުވީ، އެ އަމަލު ހިންގި ތަންތަން ލޮކޭޓްކޮށް، ލިބެން ހުރި ފުޓޭޖްތަކާއި ހުރިހާ ހެއްކެއް ދިރާސާކޮށް މައްސަލައިގެ ތުހުމަތު ކުރެވުނު ފަރާތްތައް ދެނެގަނެވުނު ކަމަށެވެ.

ފުލުހުން ބުނެފައިވަނީ، މި މައްސަލައިގެ ތުހުމަތުގައި މިހާތަނަށް 8 މީހަކު ހައްޔަރުކުރެވިފައިވާކަމަށާއި އޭގެތެރެއިން 6 މީހަކު ފެބްރުއަރީ 13 ވަނަ ދުވަހު ހައްޔަރުކުރެވުނު ކަމަށެވެ. ފެބްރުއަރީ 13 ވަނަ ދުވަހު އެ މައްސަލައާއި ގުޅިގެން ހުޅުމާލެއިން 22 އަހަރުގެ ހަރުކަށި ފިކުރުގެ ދިވެހި ފިރިހެނެއް ހައްޔަރުކޮށްފައިވާއިރު، އެ މައްސަލައިގައި ފުލުހުން ވަނީ ހަރުކަށި ފިކުރުމުގެ 6 މީހަކު ހައްޔަރުކޮށްފައެވެ.

ފުލުހުން ބުނެފައިވަނީ މާރޗް މަހުގެ 2 ވަނަ ދުވަހު އެ މައްސަލައިގައި ހިމެނޭ 8 ވަނަ މީހާ ތ. ތިމަރަފުށިން ހައްޔަރުކުރިކަމަށެވެ.

ފުލުހުން އިތުރަށް ބުނެފައިވަނީ، މިހާތަނަށް ތަހުގީގަށް ފާހަގަވެފައިވާގޮތުން، ފެބްރުއަރީ މަހުގެ 4 ވަނަ ދުވަހުގެ ރޭ ހުޅުމާލޭގައި ފަތުރުވެރިއަކާއި ރާއްޖޭގައި މަސައްކަތް ކުރާ އޮސްޓްރޭލިއާ އަދި ޗައިނާގެ މީހަކަށް ވަޅިން ހަމަލާދިން މައްސަލައިގައި އަމަލީ ގޮތުން 4 މީހަކު ބައިވެރިވެފައިވާކަމަށް ފާހަގަކުރެވުނު ކަމަށެވެ. އެމީހުން ހަމަލާދިނުމަށް ބޭނުންކުރި ސައިކަލްތަކުގެ ނަންބޯޑުތަކާއި ބޭނުންކުރި ވަޅި އަދި އެވަގުތު އެމީހުން ލައިގެން ތިބި އަންނައުނުވެސް ހޯޯދާފައިވާކަމަށް ފުލުހުން ވަނީ ބުނެފައެވެ.

މީގެއިތުރުން، އެ ފަރާތްތައް ދިރިއުޅޭ ތަންތަން ބަލައި ފާސްކޮށް، ގެންގުޅޭ ބައެއް ޑިޖިޓަލް ޑިވައިސްތަކުން މައްސަލައާއި ގުޅުންހުރި، ޓެރަރިޒަމަށް ހިއްވަރުދޭ އަދި ޕްރޮމޯޓްކުރުމަށް ބޭނުންކޮށްފައިހުރި ބައެއް މުއާމަލާތްތައް ފެނިފައިވާކަމަށެވެ. އޭސީޕީ ވިދާޅުވީ ، މި ހަމަލާއަކީ މާލެ ސަރަހައްދުގައި އުޅޭ ހަރަކަށި ފިކުރުގެ ސެލްއެއްގެ ބަޔަކު ހިންގައިގެން އުޅޭކަމެއް ކަމަށާއި އެމީހުން ހަމަލާދިން ތަންތަނާއި ހުޅުމާލެއަށް ދިޔަ ރޫޓްވެސް އެނގިފައިވާކަމަށެވެ.

ހަމަަލާދިން މައްސަލައިގެ ތަހުގީގު ފުރިހަމަކޮށް ޕީޖީ އޮފީހަށް ދައުވާކުރުމަށް އޭޕްރީލް މަހުގެ 19 ވަނަ ދުވަހު ފޮނުވާފައިވާކަމަށް ފުލުހުން ވަނީ ބުނެފައެވެ.