ފުލުހުންގެ ވަޒީފާއަށް ކުރިމަތިލުމުގެ ފުުރުސަތު ހުޅުވާލައިފި
ފުލުހުންގެ ވަޒީފާއަށް އެދި ކުރިމަތިލުމުގެ ފުރުސަތު އަންނަ ފެބުރުއަރީ މަހުގެ 23 ވަނަ ދުވަހުގެ ނިއަލަށް
ފުލުސް މައި އިދާރާ، ހުސައިން އާދަމް ބިލްޑިންގ
ފުލުހުންގެ ވަޒީފާއަށް އެދި ކުރިމަތިލުމުގެ ފުރުސަތު މޯލްޑިވްސް ޕޮލިސް ސަރވިސް އިން ހުޅުވާލައިފި އެވެ.
ފުލުހުންގެ ވަޒީފާއަށް އެދި ކުރިމަތިލުމުގެ ފުރުސަތު އަންނަ ފެބުރުއަރީ މަހުގެ 23 ވަނަ ދުވަހުގެ ނިއަލަށް ވަނީ ހުޅުވާލާފަ އެވެ.
ފުލުހުންގެ ވަޒީފާއަށް ކުރިމަތިލާ ފަރާތްތަކަކީ ޖީސީއީ އޯ ލެވެލް އިމްތިޙާނުން ނުވަތަ ސެކަންޑަރީ ސްކޫލް ސެޓްފިކެޓް އިމްތިޙާނުގެ ތިން މާއްދާއިން ސީ ފާސް ހޯދާފައިވާ ފަރާތަކަށް ވާންޖެހޭނެ ކަމަށް ފުލުހުން ބުނެ އެވެ. ހަމައެއާއެކު 18 އަހަރާއި 25 އަހަރާ ދެމެދުގެ މީހަކަށްވުމާއި އިސްކޮޅު ފިރިހެނެއްނަމަ 5 ފޫޓް 3 އިންޗި، އަންހެނެއްނަމަ 5 ފޫޓަށްވުރެ ކުރުނުވުން ފުލުހުންގެ މަޤާމުގެ ޝަރުތުތަކުގެ ތެރޭގައި ހިމެނެ އެވެ. އަދި ވަޒީފާއަށް ކުރިމަތިލާ ފަރާތަކީ އިސްލާމްދީނުގައި ހައްދެއް ކަނޑައެޅިފައިވާ ކުށެއް ކުރިކަން ވޭތުވެދިޔަ ފަސް އަހަރުދުވަހުގެ ތެރޭގައި ޝަރީޢަތަށް ސާބިތުވެފައިވާ މީހަކު ކަމުގައި ވެގެން ނުވާނެ ކަމަށް ފުލުހުންގެ އިދާރާ އިން ބުނެ އެވެ.
ވަޒީފާއަށް މީހުން ހޮވުމުގައި ވަޒީފާއަށް ކުރިމަތިލާ ފަރާތްތަކަށް ދެވޭ އެޕްޓިޓިއުޓް ޓެސްޓުން ފާސްވުމާއި ހަށިހެޔޮކަން ދެނެގަތުމަށް ދެވޭ ފިޒިކަލް ފިޓްނަސްއާ ފެތުމުގެ ޓެސްޓުން ފާސްވުމުގެ އިތުރުން މެޑިކަލް އެގްޒަމިނޭޝަނަށް ބެލެވޭނެ ކަމަށް ފުލުހުން ބުނެ އެވެ.
