ކޮވިޑް-19ގެ މިޙާލަތުގައި ދޮށީ އުމުރުގެ މީހުންނަށް މިސްކިތަށް ނުދެވުމަކީ ވެސް ނަފުސާނީ ދުޅަހެޔޮ ކަމަށް ވަރަށް ބޮޑަށް އަސަރުކުރާ ކަމެއް ކަމަށް ނަފުސާނީ ބަލިތަކާބެހޭ ޑރ. އާރިފް މުޙައްމަދު ވިދާޅުވެއްޖެއެވެ.
އަންގާރަ ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރުގައި ވާހަކަ ދައްކަވަމުން ޑރ. އާރިފް ވިދާޅުވީ، ނަފުސާނީ އަސަރު އެކި މީހުންނަށް ކުރާނީ އެކި މިންވަރަށް ކަމަށެވެ. ނަމަވެސް ދޮށީ އުމުގެ މީހުންނަށް ނަފުސާނީ ބަލީގެ އަސަރު ކުރާވަރު ބޮޑުކަމަށެވެ.
މިޒަމާނުގެ ޓެކްނޯލޮޖީގެން ބޭނުންކޮށްގެން އެހެން އުމުރުފުރާގެ މީހުން މުނިފޫހުފިލުވުމާއި އަދި މުއާމަލާތުކުރިނަމަވެސް، ދޮށީ އުމުރުގެ މީހުންނަށް ދިރިއުޅުމަށް އެހާ ފަރިތަނުވާނެކަމަށެވެ. އެހެންކަމުން، ދޮށީ އުމުރުގެ މީހުންނަށް މަޢުލޫމާތު ހޯދުމާއި، ގުޅުންތައް ބަދަހި ކުރުމަށް ދަތިވާ ކަމަށެވެ. އަދި މިސްކިތްތަކަށް ނުދެވުމާއި، ގޭތެރޭގައި ބަންދުވުމަކީ ޖިސްމާނީ އަދި ނަފުސާނީ އަސަރު ވަރަށް ބޮޑަށް ކުރާނެ ކަމެއްގެ ގޮތުގައި ޑރ. އާރިފް ފާހަގަކުރެއްވިއެވެ. ވަކިން ޚާއްޞަކޮށް، މިދަނޑިވަޅުގައި ދޮށީ އުމުރުގެ މީހުންނަށް އަޅާލާ އޯގާތެރިވުމަކީ ވަރަށް މުހިންމު ކަމެއް ކަމަށް ޑރ.އާރިފް ވިދާޅުވިއެވެ.
ކަރަންޓީންގައި ނެތް މީހުންނަށް ކަމުގައި ވިޔަސް. އެބޭފުޅުންނަށް މައުލޫމާތު ހޯދަން ވެސް ބައެއް ފަހަރު ދަތިވޭ. އަދި ގުޅުންތައް ވެސް ބަދަހި ކުރުމަށް ދަތިވޭ. މިސްކިތްތައް ނުދެވުމާއި މިކަހަލަ އަސަރު ބޮޑަށް ދޮށީ އުމުރުގެ މީހުންނަށް ކޮށްފާނެ. އަދި ގޭތެރޭގައި ބަންދުވުމަކީ ބައެއް ފަހަރު ޖިސްމާނީ ގޮތުން ވެސް އެބޭފުުންނަށް އަސަރުކުރުން.ޑރ.އާރިފް މުހައްމަދު
ކުޑަކުދިންނަށް އަލިއަޅުއްވާލައްވާ ޑރ. އާރިފް ވިދާޅުވީ ޢާންމު ދިރިއުޅުމަށް ބޮޑެތި ބަދަލުތަކެއް އައިސްފައިވާ ކަމަށާއި، ގޭގައި ހުރިހާ ވަގުތެއް ހޭދަ ކުރަން ޖެހުމުން ކުޑަކުދިންނަށް ވެސް ނަފުސާނީ މައްސަލަތައް ދިމާވާ ކަމަށެވެ. ޑރ.އާރިފް ވިދާޅުވީ ކުދިން ނަފުސާނީ ބަލި މަޑު ކަމަށް ހުށައެޅިދާނެ ކަމުގެ ބިރު އޮތުމާއެކު އެކުދިންނަށް ޚާއްޞަ ސަމާލުކަމެއް ދޭން ޖެހޭކަމަށެވެ. އެގޮތުން ކުދިންނާ ގިނައިން މުޢާމަލާތުކުރަންޖެހޭ ކަމަށާއި، ކުދިންގެ އަޑު އަހަން ޖެހޭކަމަށް ވިދާޅުވިއެވެ. އަދި ކުދިންނަށް ހިއްވަރު ދިނުމާއި، ކުދިން ކަންކަމުގައި ބައިވެރި ކުރުމަށް ޑރ. އާރިފް އިލްތިމާސް ކުރައްވފައިވެއެވެ.
