2017 ވަނަ އަހަރުގެ ޤައުމީ ޖޫނިއަރ އަދި ސީނިއަރ ސްކޮޑްގެ ފެތުންތެރިންގެ ނަންތައް އިއުލާންކޮށްފި އެވެ.
ބުރާސްފަތި ދުވަހު ޗަމްޕާ ސެންޓްރަލް ހޮޓެލްގައި ބޭއްވި ރަސްމިއްޔާތުގައި ޖޫނިއަރ އަދި ސީނިއަރ ސްކޮޑްގެ ފެތުންތެރިންގެ ނަންތައް އިއުލާންކޮށް ސެޓްޕިކެޓާއި ޖާރޒީ ވަނީ ހަވާލުކޮށްފައެވެ.
ރާއްޖެ އެމްވީއަށް މައުލޫމާތު ދެއްވަމުން ސްވިމިން އެސޯސިއޭޝަންގެ ނައިބް ރައީސް އިސްމާއިލް އަލީ ވިދާޅުވީ ގައުމީޓީމަށް ފެތުންތެރިން ނަގާފައިވަނީ އާންމުކޮށް ގައުމީ ފެންވަރުގައި ހުޅުވާލެވުނު ރޭންކިން ޓްރެއަލްއެއްގެ ދަށުން ކަމަށެވެ. ގައުމީ ސްކޮޑްގައި މިވަގުތު ރާއްޖޭގައި ތިބި އެންމެ މޮޅު ފެތުންތެރިން ހިމެނިފައިވާ ކަމަށް އޭނާ ވިދާޅުވިއެވެ.
ގައުމީ ސްކޮޑްތަކުގެ ޕްރެކްޓިސް ފެށުމަށް ހަމަޖެފައިވަނީ މިހިނގާ ޖެނުއަރީ މަހުގެ 10 ވަނަ ދުވަހުއެވެ.
ދެ ސްކޮޑް އެއްކޮށް ޖުމްލަ 60 ފެތުންތެރިން ހިމެނޭ އިރު، ސީނިއަރ އަދި ޖޫނިއަރ ސްކޮޑް ސޮޕޮންސަރ ކޮށްފައިވަނީ ސޮނީސްޕޯޓްސް ގެ ފަރާތުންނެވެ.
އިސްމާއިލް ވިދާޅުވީ ނިމިގެންދިޔަ 2016 ވަނަ އަހަރަކީ ވަރަށް ކާމިޔާބު އަހަރެއްކަމަށާއި ސަރަހައްދީ ފެންވަރުގައި ބްރޯންޒް މެޑަލް އާއި ސިލްވަރ މެޑަލް ލިބިގެން ދިޔަ އަހަރެއް ކަމަށެވެ. މީގެ އިތުރުން ބައިނަލް އަގްވާމީ ފެންވަރުގައިވެސް ބޮޑެތި މުބާރާތްތަކުގައި ވާދަކޮށް ރަނގަޅު ނަތީޖާ ތަކެއް ހޯދާފައި އޮތް އަހަރެއް ކަމަށް އޭނާ ވަނީ ފާހަގަ ކުރައްވާފައެވެ.
