މަޑަގަސްކަރާގައި މާސްކު ނާޅާ މީހުންގެ އަދަބަކީ މަގުމަތި ސާފުކުރުން

މަޑަގަސްކަރާގެ މަގު މައްޗަށް މާސްކު ނާޅާ ނިކުންނަ މީހުންނަށް އަދަބެއްގެ ގޮތުން މަގުމަތި ސާފުކުރަން ޖެހޭ ގޮތަށް އުސޫލެއް އެކުލަވައިލައިފިއެވެ.

ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން ވެރިރަށް އަންތަނަނަރީވޯ، ފިނަރަނަންސޫގެ އިތުރުން ބޮޑެތި އެހެން ސިޓީތަކުގައި މާސްކު އެޅުމަށް ވަނީ މަޖުބޫރް ކޮށްފައެވެ. އަލަށް އަމަލުކުރަން ފެށި މި ގާނޫނަށް ހޯމަ ދުވަހުން ފެށިގެން އަމަލުކުރަން ފަށާފައިވާއިރު، ބޮޑު ތިން ސިޓީގައި ލޮކްޑައުންގެ ފިޔަވަޅުތަކަށް މަޑު މަޑުން ދޫދޭން ވަނީ ފަށާފައެވެ.

ކޮވިޑް-19 އޮޕަރޭޝަންސްގެ ޖެނެރަލް ވިދާޅުވީ، މަގު މައްޗަށް ނިކުމެ އުޅޭ 70 އިންސައްތަ މީހުން ގަވާއިދަށް ބޯލަނބައި މާސްކު އަޅައިގެން އުޅޭ ކަމަށެވެ. ސަބަބަކީ، މަގުމަތި ސާފުކުރަން ޖެހިދާނެތީ އެމީހުން އެކަމާއި ފަސް ޖެހޭތީ ކަމަށް ވިދާޅުވިއެވެ. އަންތަނަނަރީވޯގެ ކޮމިޝަނަރ ހެކްޓަރ ރަޒަފިންޑްރަޒަކާ ވިދާޅުވީ، މާސްކު ނާޅާ އުޅުނު 25 މީހަކު ލައްވާ މަގުމަތި ސާފުކުރަވާފައިވާ ކަމަށެވެ.

އިންޑިއާ ކަނޑުގައި އޮންނަ މަޑަގަސްކަރާގެ 128 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. އޭގެ ތެރެއިން 75 މީހަކު ވަނީ ބަލިން ފަސޭހަވެފައެވެ.