ކޮވިޑް19 އަށް ޕޮޒިޓިވްވެފައިވާ ބިދޭސީންގެ އަދަދު 100 އަށް ވުރެ މައްޗަށް
26 އެޕްރީލު 2020 | އާދީއްތަ 04:31މީގެ ތެރޭގައި ބަންގްލަދޭޝްގެ 75 މީހަކު ހިމެނޭ
ބިދޭސީ މަަސައްކަތްތެރިއެއް: ޕޮޒިޓިވްވީ މީހުންގެ ތެރޭގައި ތޮއްޖެހިގެން ދިރިއުޅޭ ބިދޭސީން ހިމެނޭ
ރާއްޖެއިން ފެނިފައިވާ ކޮވިޑް-19 ކޭސްތަކުގެ ތެރޭގައި ހިމެނޭ ބިދޭސީންގެ އަދަދު 102 ށް އަރައިފި އެވެ.
ބިދޭސީންގެ ތެރޭގައި ބަންގްލަދޭޝްގެ 75 މީހަކާއި، އިޓަލީވިލާތުގެ 11 މީހަކާއި، އިންޑިއާގެ 10 މީހަކާއި، ސްރީލަންކާގެ 2 މީހެއްގެ އިތުރުން ދެކުނު އެފްރިކާ، ތުރުކީވިލާތް، އިނގިރޭސިވިލާތް، ޖަރުމަންވިލާތް ހިމެނޭގޮތަށް ކޮންމެ ގައުމަކުން އެކަކު ވަނީ ފެނިފަ އެވެ.
މި އަދަދުގެ ތެރޭގައި ރާއްޖެއިން އެންމެ ފުރަތަމަ ފެނުނު އިމްޕޯޓަޑް ކޭސްތަކުގެ ތެރޭގައި ހިމެނޭ 10 ކޭސްއަކާއި، ކުރެއްދޫ އިން ފެނުނު ފަސް ކޭސްއަކާއި، މާލެ ސިޓީ ކޮމިއުނިޓީ ސްޕްރެޑްގެ ތެރެއިން ފެނިފައިވާ 87 ކޭސްއެއް ހިމެނެ އެވެ.
ބިދޭސީންގެ ތެރެއިން 13 މީހެއްގެ ބަލި ވަނީ ފަސޭހަވެފަ އެވެ. އެކްޓިވް ކޭސްތަކުގެ ތެރޭގައި ހިމެނޭ 87 ކޭސްގެ ތެރެއިން ރާއްޖޭގައި ފަރުވާ ހޯދަމުން އަންނަނީ 85 މީހެކެވެ. އަނެއް ދެ މީހުންނަކީ ރާއްޖެއިން ބޭރުގައި ބައްޔަށް ފަރުވާ ހޯދަމުން އަންނަ އިޓަލީގެ ދެ ފަރާތެކެވެ.
މާލެ ސިޓީ އިން ފެނިފައިވާ ކްލަސްޓަރތަކުގެ ތެރޭގައި ތޮއްޖެހިފައިވާ ތަންތަނުގައި ދިރިއުޅެން ޖެހިފައިވާ ގިނަ އަދަދެއްގެ ބިދޭސީން ހިމެނެ އެވެ. އެގޮތުން އެޗްޕީއޭއިން އާދިއްތަ ދުވަހުގެ ފަތިހުގެ ވަގުތެއްގައި އިއުލާންކުރި 36 ކޭސްގެ ތެރޭގައި، މިފަދަ ތިން ތަނެއްގައި ދިރިއުޅޭ 30 މީހަކު ހިމެނޭ ކަމަށް ވަނީ ބުނެފަ އެވެ.
އެޕްރީލް މަހުގެ 12 ވަނަ ދުވަހު، އިމިގްރޭޝަނުން ވަނީ ތޮއްޖެހިގެން ދިރިއުޅޭ ބިދޭސީން ހުޅުމާލެއަށް ބަދަލުކުރުމުގެ ޕްރޮގްރާމެއް ފަށާފަ އެވެ. މިފަދަ ފަރާތްތައް ބަދަލުކޮށްފައިވަނީ، ހުޅުމާލޭގައި އެކަމަށް ހާއްސަ ކޮށްފައިވާ ފެސިލިޓީއަކަށެވެ.
އެއަށް ފަހު، އެޕްރީލް މަހުގެ 21 ވަނަ ދުވަހު ފުލުހުން ވަނީ، ބަލިފެތުރިގެން ދިއުމުގެ ފުރުސަތު ބޮޑުކަމަށް ފާހަގަކުރެވޭ ހަ ތަނަކުން ވަދެ ނިކުމެ އުޅުން ކޮންޓްރޯލް ކުރަން ފަށާފަ އެވެ. އަދި ޒަރޫރީ ބޭނުންތަކުގައި ނޫނީ އެތަންތަނުގައި ދިރިއުޅޭ ފަރާތްތަކުން ވަދެ ނިކުތުން ވަނީ މަނާކޮށްފަ އެވެ.
ތޮއްޖެހިގެން ދިރިއުޅޭ ބިދޭސީންގެ ތެރެއިން އެއް ބަޔަކު ބައިތިއްބާފައިވަނީ އެޗްޑީސީއިން ހުޅުމާލޭގައި ބިދޭސީން ބޭތިއްބުމަށް ގާއިމްކޮށްފައިވާ 700 މީހުންގެ ޖާގައިގެ ފެސިލިޓީއަކާއި އަމީން ކޮންސްޓްރަކްޝަނުން ދީފައިވާ 1000 މީހުންގެ ޖާގައިގެ ފެސިލިޓީއެއްގަ އެވެ.
އޭގެ އިތުރުން ޖުމްލަ 6000 ބިދޭސީން ބޭތިއްބޭނެ ވަރުގެ ތަންތަން ގާއިމްކުރުމަށް ސަރުކާރުން އަންނަނީ މަސައްކަތްކުރަމުންނެވެ. އެގޮތުން ގުޅީފަޅުގައި 4000 ބިދޭސީން ބައިތިއްބާނެ ތަންތަނާއި ހުޅުމާލޭގައި 2000 ބިދޭސީން ބައިތިއްބާނެ ތަންތަން ގާއިމްކުރުމުގެ މަސައްކަތް މިހާރު ވެސް ކުރިއަށް އެބަދެ އެވެ
