ކޮވިޑް-19 އިން ފަސޭހަވެވަޑައިގެންނެވި އިނގިރޭސި ވިލާތުގެ ބޮޑުވަޒީރު ހޯމަ ދުވަހު އެނބުރި ވަޒީފާއަށް ނުކުމެވަޑައިގަންނަވާނެ ކަމަށް ރިޕޯޓުތަކުން ބުނެފި އެވެ.

ބޯރިސް ހޮސްޕިޓަލުން ދޫކޮށްލާފައިވާތާ ދެ ހަފުތާވެފައިވާއިރު ޙަބަރުތަކުން ބުނާގޮތުގައި އޮފީހަށް ނުކުމެވަޑައިގެން، އިނގިރޭސި ވިލާތުގެ ލޮކްޑައުންއާއި ގުޅިގެން އެޅިފައިވާ ފިޔަވަޅުތައް ލުއިކޮށްދޭނެ ތާރީޙަކާއި ގުޅިގެން ގޮތެއް ނިންމަވާނެ ކަމަށެވެ.

މީގެއިތުރުން، ޑައުނިންގ ސްޓްރީޓްގައި ބާއްވަމުންގެންދާ ނޫސްވެރިންގެ ބައްދަލުވުމުގައި ބޯރިސް ބައިވެރިވެވަޑައިގަންނަވާނެ ކަމަށްވެސް ރިޕޯޓުތަކުން ބުންޏެވެ. އެޑްވައިޒަރުންނާއި އެކު ބައްދަލުވުމެއް ބާއްވާފައިވާކަމަށާއި ބޯރިސް އޮފީހަށް ނުކުމެވަޑައިގަންނަވާނީ އިނގިރޭސިވިލާތުގެ ހެލްތު ސެކެޓްރީ މެޓް ހެންކޮކް އާއި މަޝްވަރާ ކުރެއްވުމަށްފަހުކަމަށް ވެސް ރިޕޯޓުތަކުން ބުނެއެވެ.

އިނގިރޭސި ބޮޑުވަޒީރު ބޮރިސް ޖޯންސަން ކޮވިޑް-19 އަށް ޕޮޒިޓިވްވި މާރޗްމަހުގެ 26 ވަނަ ދުވަހުއެވެ. އަދި ޖެހިގެން އައި ދުވަހު އެކަން އަމިއްލަފުޅަށް އިޢުލާނުކުރެއްވުމަށް ފަހު ޑައުނިންގް ސްޓްރީޓްގެ އެޕާޓްމެންޓެއްގައި އަމިއްލަފުޅަށް އެކަހެރިވެވަޑައިގެން ފަރުވާ ހޯއްދަވަން ފެއްޓެވި އެވެ. އަދި ނޭވާލުމުގެ މައްސަލައެއް ކުރިމަތިވުމާއި ގުޅިގެން އައިސީޔޫގައި ވެސް އެޑްމިޓް ކުރެވުނެވެ.