މުދާ ލިބުމުގެ ދަތިތަކަމަށް ހައްލެއް: މޯލްޑިވިއަންގެ ކާގޯ ދަތުރުތައް ހުރިހާ ޑޮމެސްޓިކް އެއާޕޯޓްތަކަށް!
24 އެޕްރީލު 2020 | ހުކުރު 20:43ހުރިހާ ޑޮމެސްޓިކް އެއާރޕޯޓްތަކަށް ދަތުރުކުރާނެ
މޯލްޑިވިއަންގެ ފްލައިޓްއަށް ކާގޯ އަރުވަނީ
އަތޮޅުތަކުގެ ފިހާރަތަކަށް މުދާ ލިބުމުގެ ދަތިކަމަށް ހައްލެއް ހޯދުމަށްޓަކައި މޯލްޑިވިއަންގެ ކާގޯ ދަތުރުތަކެއް ހުރިހާ ޑޮމެސްޓިކް އެއާރޕޯޓްތަކަށް ކުރަން ނިންމާފައިވާކަމަށް ސަރުކާރުން ހާމަކޮށްފިއެވެ.
ހުކުރު ދުވަހުގެ ރޭ ދަރުބާރުގޭގައި ގާއިމްކޮށްފައިވާ ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ އަތޮޅު ތެރޭގައި ހުރި ފިހާރަތަކަށް މުދާ ލިބުމުގައި ހުރި ދަތިތައް ހައްލުކުރުމުގެ ގޮތުން މޯލްޑިވިއަންގެ ފަރާތުން ކާގޯ ބޯޓުތަކެއް ރާއްޖޭގެ ހުރިހާ ޑޮމެސްޓިކް އެއާރޕޯޓްތަކަށް އެޅުމަށް ނިންމާފައިވާކަމަށާއި ކޮންމެ ދުވަހަކުވެސް ގިނަ އަދަދެއްގެ ފްލައިޓްތަކެއް ދަތުރުކުރާނެކަމަށެވެ.
މަބްރޫކް ވިދާޅުވީ، މޯލްޑިވިއަނުން އެޅުމަށް ނިންމާފައިވާ ދަތުރުތަކުގައި އެ ރަށްތަކުގެ ރައްޔިތުންނަށް ބޭނުންވާ ކާބޯތަކެއްޗާއި އެހެނިހެން ބާވަތްތައް ގެންދެވޭނެކަމަށާއި މިކަންތަަކުގައި ކޯޑިނޭޓްކުރާނީ ރަށު ކައުންސިލްތަކާއި ލޯކަލް ގަވަރމެންޓް އޮތޯރިޓީ (އެލްޖީއޭ) ކަމަށެވެ. އެގޮތުން، ކައުންސިލްތަކުން ރަށްރަށައް ބޭނުންވާ ތަކެތީގެ ލިސްޓް އެލްޖީއޭއަށް ހިއްސާ ކުރުމުން ކަނޑައަޅާ ގޮތެއްގެ މަތީން އެލްޖީއޭއިން އެކަން ކުރަމުންދާނެކަމަށް މަބްރޫކް ވަނީ ވިދާޅުވެފައެވެ.
