މުޅި ދުނިޔޭގައިވެސް ފެތުރެމުންދާ ކޮވިޑް-19 އަށް މިއަހަރުގެ ސެޕްޓެމްބަރު މަހު ވެކްސިންއެއް ތައްޔާރުކުރެވިދާނެ ކަމަށް ޗައިނާގެ ސެންޓަރ ފޮރ ޑިޒީސް ޕްރިވެންޝަން އެންޑް ކޮންޓްރޯލްގެ ޑިރެކްޓަރ ޖެނެރަލް ޑރ. ގާއޯ ފޫ ވިދާޅުވެއްޖެއެވެ.
އެގޮތުން ކުރިއަށް އޮތް ފަސް މަސް ތެރޭގައި ވެކްސިންއެއް ތައްޔާރުކުރެވިދާނެ ކަން ފާހަގަކުރައްވާ ޑރ. ގާއޯ ވިދާޅުވީ މި ވެކްސިން ބޭނުން ކުރެވޭނީ ވައިރަސްގެ އައުޓްބްރޭކްއެއް އައުން ކަހަލަ ކުއްލި ހާލަތްްތަކުގައި ކަމަށެވެ.
ޗައިނާގެ ދައުލަތުގެ މީޑިއާއަށް ދެއްވި އިންޓަރވިއުއެއްގައި ޑރ. ގާއޯ ވިދާޅުވީ ވެކްސިންއެއް ނުވަތަ ވަކި ބޭހެއް ތައްޔާރުކުރުމަށް ވަގުތު ނަގާ ކަމަށެވެ. ސަބަބެއްގެ ގޮތުގައި ޑރ.ގާއޯ ވިދާޅުވީ ރަނގަޅު ވެކްސިންއެއް ތައްޔާރުކުރެވޭނީ ސިއްހަތު ރަނގަޅު މީހުން ގަޔަށް އެ ވެކްސިންޖަހާ، ޓެސްޓުކޮށްގެން ކަމަށްވާތީ ކަމަށެވެ.
ކުއްލި ހާލާތްތަކުގައި ބޭނުންކުރާ މި ވެކްސިން ފުރަތަމަ ދެވޭނީ ސިއްހީ ދާއިރާގައި މަސައްކަތްކުރާ ފަރާތްތަކަށް ކަމަށް ޑރ. ވިދާޅުވިއެވެ. އަދި ބޮޑެތި އާބާދީތަކަށް ވެކްސިންއެއް ތައްޔާރުކުރެވޭނެ ކަމަށް ބެލެވެނީ އަންނަ އަހަރުގެ ކުރީ ކޮޅު ކަމަށް ވެސް ވިދާޅުވިއެވެ.
މިހާތަނަށް 2.7 މިލިއަނަށް ވުރެ ގިނަ ކޭސް ރިޕޯޓުކުރެވިފައިވާއިރު 750000 އަށް ވުރެ ގިނަ މީހުން ވަނީ މި ބަލިން ފަސޭހަވެފައެވެ.
