އެމެރިކާގެ ރައީސް ޑޮނަލްޑް ޓްރަމްޕް ނޮވެމްބަރު މަހު އޭޝިއާގެ ފަސް ޤައުމަކަށް ދަތުރުކުރައްވާނެ ކަމަށް ރިޕޯޓްތައް ބުނެފި އެވެ.
ވައިޓް ހައުސް އިން ބުނި ގޮތުގައި އެމެރިކާގެ ރައީސް ޓްރަމްޕް ވަޑައިގަންނަވާނީ ޖަޕާން، ސައުތު ކޮރެއާރ، ޗައިނާ، ވިއެޓްނާމް އަދި ފިލިޕީންސް އަށެވެ. އަދި މި ދަތުރުފުޅުގައި ޖުމްލަ 12 ދުވަސް ހޭދަކުރައްވާނެ ކަމަށްވެސް ވައިޓް ހައުސް އިން ވަނީ ބުނެފަ އެވެ.
މިއީ ޓްރަމްޕް ވެރިކަމަށް ވަޑައިގަތުމަށްފަހު އޭޝިއާގެ ޤައުމުތަކަށް ކުރައްވާ ފުރަތަމަ ދަތުރުފުޅެވެ.
ވައިޓް ހައުސް އިން ބުނީ މި ދަތުރުގެ މަޤްސަދަކީ އުތުރު ކޮރެއާގެ ފަރާތުން ކުރިމަތިވާ ބިރާއި ދެކޮޅަށް ބައިނަލްއަގްވާމީ ދުނިޔެ އެކުވެރިކޮށް ކޮރެއަން ޕެނިންސިއުލާއިން ނިއުކްލިޔަ ހަތިޔާރު ނައްތާލައި އެކަން ޔަގީން ކުރުން ކަމަށެވެ.
އެމެރިކާގެ ރައީސް ޓްރަމްޕް ވަނީ އދގެ އާންމު ޖަލްސާގައި އުތުރު ކޮރެއާގެ ލީޑަރު ކިމް ޖޮން އުން އަކީ "ރޮކެޓް މޭން" އެއް ކަމަށް ވިދާޅުވެފަ އެވެ. އަދި އުތުރު ކޮރެއާ "އެކީ ނައްތާލަން" ޖެހިދާނެ ކަމުގެ އިންޒާރު ވެސް ޓްރަމްޕް ވަނީ ދެއްވާފަ އެވެ.
މީގެ އިތުރުން މި ދަތުރުފުޅުގައި ޓްރަމްޕް އޭޝިއާގެ ޤައުމުތަކާއި އެއްކޮށް އިޤްތިސާދީ ގުޅުމާއި ބެހޭގޮތުން މަޝްވަރާ ކުރައްވާނެ އެވެ. އަދި ވިއެޓްނާމްގައި އޮންނަ "އޭޝިއާ ޕެސިފިކް އިކޮނޮމިކް ކޯޕަރޭޝަން ސަމިޓް" އާއި ޕިލިޕީންސްގައި އޮންނަ "ސައުތު އީސްޓް އޭޝިއަން ނޭޝަންސް ސަމިޓް" ގައި ބައިވެރިވެވަޑައިގަންނަވާނެ އެވެ.
