މޫސަލްގައި މާޗް މަހު ދިން ހަމަލާއެއްގައިި އާންމުން މަރުވި ކަަމަށް އެމެރިކާ އިން އިއުތިރާފުވެއްޖެ

އިރާގު މޫސަލް އަށް އެމެރިކާ އިން މާޗް މަހު ދިން ހަމަލާއެއްގައި މަދުވެެގެން އާންމުންގެ 105 މީހުން މަރުވެފައިވާ ކަމަށް އެމެރިކާ އިން އިއުތިރާފުވެއްޖެއެވެ.

އެމެރިކާގެ ސެންޓްރަލް ކޮމާންޑުން ބުނީ އެމެރިކާގެ އަސްކަރިއްޔާ އިން ހަމަލާ އަމާޒު ކުރީ އިސްލާމިކް ސްޓޭޓް (އައިއެސް) ގެ ދެ ސްނައިޕަރުންނަށް ކަމަށެވެ. އަސްކަރިއްޔާ އިން ދިން ހަމަލާ އިން އާންމުން މަރުވީ ހަނގުރާމަވެރިން އެމީހުން ތިބި އިމާރާތުގައި ބަހައްޓާފައިވާ ގޮވާތަކެތި، އަސްކަރިއްޔާ އިން ދިން ހަަމަލާގެ ސަބަބުން ގޮވުމުގެ ސަބަބުން ކަމަށެވެ. ހަމަލާގެ ސަބަބުން އިމާރާތުގެ ތިރީ ފަންގިފިލާގައި ތިބި އާންމުން މަރުވީ އިމާރާތް ބިމާ ހަމަވުމުގެ ސަބަބުންނެެވެ.

މާޗް މަހު އެމެރިކާ އިން ދިން ހަމަލާއާ ގުޅޭގޮތުން، އެމެރިކާގެ އަސްކަރިއްޔާ އިން ކުރިން ބުނެފައި ވަނީ އެމެރިކާގެ އަސްކަރިއްޔާ އިން ހަަމަލާ ދީފައި ވަނީ އިރާގު ސިފައިން ދިން މައުލޫމާތެއްގެ މައްޗަށް ބިނާކޮށް ކަމަށެވެ. އެމެރިކާގެ އަސްކަރިއްޔާ އިން ވަނީ ހަމަލާގެ ސަބަބުން އޭގެ ގެއްލުންވި ހުރިހާ ފަރާތްތަކަށް ހަމްދަރުދީ ފޮނުވާފައެެވެ. އަދި އައިއެސްއާ ހަނގުރާމަ ކުރަމުން ދަނީ ވީހާ ވެސް އާންމުންނަށް ގެއްލުން ނުވާނެ ގޮތަކަށް ބަލައިގެން ކަމަށް އަސްކަރިއްޔާ އިން ބުނެއެވެ.

އައިއެސް އަތުން މޫސަލް އެއްކޮށް މިނިވަން ކުރުމަށް ގުޅިފައިވާ ކޯލިޝަނުން ކުރަމުންދާ މަސައްކަތް އަދިވެސް ކާމިޔާބުވާ ގޮތް ވަނީ ނުވެފައެވެ.

އެމެރިކާ އާއި ގުޅިފައިވާ ކޯލިޝަނުން ބުރާސްފަތި ދުވަހު ދިން ހަމަލާއެއްގައި ވެސް އާންމުންގެ 35 މީހަކު ވަނީ މަރުވެފައެވެ.