އެމެރިކާ ސަރުކާރުން ކަނޑައަޅާފައިވާ  މުސާރައިގެ ލިމިޓްތަކުގެ ސަބަބުން މިއަންނަ ސެޕްޓެމްބަރު މަހުން ފެށިގެން ސީކްރެޓް ސާވިސްގެ 1،100 މުވައްޒަފަކު އޯވާޓައިމް މަސައްކަތުގެ ފައިސާ ނުދެވޭނެ ކަމަށް އެ އިދާރާގެ އިސްވެރިޔާ ވިދާޅުވެއްޖެއެވެ.

ސީކްރެޓް ސާވިސްގެ ޑައިރެކްޓާ ރެންޑޮލްފް އެލީސް ނެރުއްވި ބަޔާނެއްގައި ވިދާޅުވީ ފައިސާގެ ތާށިކަން ދިމާވެގެން އުޅެނީ  ރައީސް ޑޮނަލްޑް ޓްރަމްޕް އާއި އެމަނިކުފާނުގެ އާއިލާ ރައްކާތެރިކޮށް ސެކިޔުރިޓީ ބެލެހެއްޓުމަށާއި އަދި އޮޕަރޭޝަންސް އަށް ކުރަން ޖެހޭ ޚަރަދުތައް ކުރުމަށް ކަމަށެވެ. އެލީސް އިތުރަށް ވިދާޅުވީ ފައިސާގެ ދަތިކަން ދިމާވެގެން އުޅެނީ ރައީސް ޓްރަމްޕްގެ ދައުރުގައި ނޫން ކަމަށާއި މިކަން ދިމާވެގެން އުޅޭތާ 10 ވަރަކަށް އަހަރު ވެދާނެ ކަަމަށެވެ. 

އެމެރިކާގެ ދުވަހު ނޫހެއް ކަމަަށްވާ  ޔޫއެސްއޭ ޓުޑޭ އަށް ސީކްރެޓް ސާވިސްގެ ޑައިރެކްޓާ އެލީސް ވިދާޅުވީ ސީކްރެޓް ސާވިސްގެ ކަންކަން މަތިކޮށްފައި ވަނީ ގާނޫނަކުން ކަމަށާއި  އެއްވެސް ކަމެއް ބަދަލުކޮށް ލިމިޓު ކުރުމުގެ ބާރު އެމަނިކުފާނަށް ލިބިގެން ނުވާ ކަަމަށެވެ. އެލީސް ވިދާޅުވީ އެމެރިކާގެ ރައީސްގެ ބޮޑު އާއިލާއެއް އޮންނަ ކަމަށާއި، އެ އާއިލާ އާއި މެދު ސީކްރެޓް ސާވިސްގެ ޒިންމާ ކަނޑައަޅާފައި ވަނީ ގާނޫނަކުން ކަމަށެވެ. 

އެމެރިކާގެ ގާނޫނު ހަދާ މަޖިލީހުން މުސާރައިގެ ލިމިޓްތަކަށް ބަދަލު ނުގެންނަހާ ހިނދަކު މިއަންނަ ސެޕްޓެމްބަރު މަހުން ފެށިގެން ސީކްރެޓް ސާވިސްގެ ބައެއް މުވައްޒަފުންނަށް އޯވާޓައިމް ފައިސާ ނުލިބޭނެއެވެ. 

ވައިޓް ހައުސް އިން ނެރެފައިވާ ބަޔާނެއްގައި ބުނެފައި ވަނީ ދިމާވެގެން މިއުޅޭ މައްސަލާގައި ރައީސް ޓްރަމްޕްގެ ސަރުކާރާއި އެމެރިކާގެ ގާނޫނު ހަދާ މަޖިލީހާ އެކު ގުޅިގެން މަސައްކަތް ކުރާނެ ކަމަށެވެ.