އެއްބަސްވުމުގެ މައުލޫމާތު ލީކުވުމުން، ބަޔާން ދެކެ ނޯޔާ ހިތްހަމަނުޖެހިފައި

ބަޔާން މިއުނިކްގެ އެއްބަސްވުން އާކުރުމަށް ދެކެވުނު ވާހަކަތައް މީޑިއާގައި ލީކުވުމުން، ބަޔާން މިއުނިކް ދެކެ ޖަރުމަންގެ ތަޖުރިބާކާރު ގޯލްކީޕަރު މެނުއަލް ނޯޔާ ހިތްހަމަނުޖެހިއްޖެ އެވެ.

ޖަރުމަންގެ ޝަލްކާއިން 2011 ވަނަ އަހަރު ބަޔާނަށް ބަދަލުވި ނޯޔާ، އެކުލަބާއިއެކު ހަދާފައިވާ އެއްބަސްވުން އަންނަ ސީޒަނުގައި ހަމަވާނެއެވެ.

އުމުރުން 34 އަހަރުގެ ނޯޔާގެ އެއްބަސްވުން އާކުރަން ބަޔާނުން މަސައްކަތް ކުރަމުން އަންނައިރު، އެއްބަސްވުން އާކުރަން ނޯޔާ ބޭނުންވަނީ އިތުރު ފަސް އަހަރަށް ކަމަށް ރިޕޯޓުތައް ބުނެއެވެ. އެކަމަކު ބަޔާނުން ނޯޔާއާއެކު މަޝްވަރާ ކޮށްފައިވަނީ އިތުރު ދެ އަހަރަށް އެއްބަސްވުން އާކުރާށެވެ.

ބަޔާން އާއި ނޯޔާއާ ދެމެދު ދެކެވުނު ވާހަކަތައް މީޑިއާގައި ލީކުވުމުން، ނޯޔާ ބުނީ 2011 ވަނަ އަހަރު ބަޔާނަށް ބަދަލުވެ، މިއަދާއި ހަމައަށް އައިއިރު ބަޔާނުން އޭނާގެ އެއްބަސްވުން އިތުރުކުރި ކޮންމެ ފަހަރަކު އޭނާގެ އެއްބަސްވުމުހގެ މައުލޫމާތު މީޑިއާގައި ލީކު ކޮށްފައިނުވާ ކަމަށެވެ. އަދި ކުރިޔަށް އޮތް ތަނުގައިވެސް އޭނާގެ ފިޓްނަސް ތަންދޭނަމަ ބަޔާނަށް ކުޅެން ބޭނުންވާ ކަމަށާއި، އެކަމަކު ބަޔާނަށް ކުރި އިތުބާރު މިހާރު ގެއްލިއްޖެ ކަމަށްވެސް ނޯޔާ ބުންޏެވެ.

ނޯޔާ އިތުރަށް ބުނީ މިހާތަނަށް އައިއިރު ބަޔާނަށް ކުޅެދިން ކޮންމެ މެޗެއްގައިވެސް އޭނާ ވާނީ 100 އިންސައްތަ ދައްކާފައިވާ ކަމަށާއި، އެކަން އެހެން ކުރުމަށް އޭނާ ބޭނުންވާ ކަމަށެވެ.

ނޯޔާގެ އެއްބަސްވުން އާކުރަން ބަޔާނުން މަސައްކަތް ކުރަމުން އަންނައިރު، ނޯޔާ ގަތުމަށް ޗެލްސީންވެސް އަންނަނީ މަސައްކަތތް ކުރަމުންނެވެ.

ޝާލްކާއިން 2004 ވަނަ އަހަރު ކެރިއަރު ފެށި ނޯޔާ ބަޔާނަށް ބަދަލުވީ 2011 ވަނަ އަހަރުގައެވެ. އެ ފަހަރު ވެސް އޭނާ ހޯދުމަށް ޔޫރަޕުގެ ބޮޑެތި ކްލަބުތަކުން ވަނީ މަސައްކަތް ކޮށްފައެވެ. އޭގެ ތެރޭގައި މެންޗެސްޓާ ޔުނައިޓެޑާއި ލިވަޕޫލްވެސް ހިމެނެއެވެ.