ކޮވިޑް-19 ގެ ބިރުވެރިކަން ރާއްޖޭގައިވެސް ފެތުރި، ވެރިރަށް މާލޭގެ ތޮއްޖެހިފައިވާ އަވަށްތަކުގައިވެސް މިވަނީ ފެތުރެން ފަށާފައެވެ. އެއާއެކު މުޅި ރާއްޖެއަށްވެސް މި ވައިރަސް ފެތުރިގެން ދިއުމުގެ ބިރު މިވަނީ ހީވެފައެވެ. ރައްކާތެރިކަމުގެ ގޮތުން އެޅެން އޮތް ކޮންމެ ފިޔަވަޅެއް އެޅުމަށް ސަރުކާރުންވެސް ދަނީ މަސައްކަތް ކުރަމުންނެވެ. އެއާއެކު އެޅި ފިޔަވަޅުތަކުގެ ތެރެއިން ވެރިރަށް މާލެ ސަރަޙައްދުގައި ބަނދަރުކޮށްފައިވާ އުޅަނދުތައް ލަފާ ފުރުމާއި، ރާއްޖޭގެ އެއް ރަށުން އަނެއް ރަށަށް ދަތުރު ކުރުން މަނާ ކުރުމާމެދު އުސޫލުތަކެއް ޤާއިމުކުރެވިގެން ދިޔައެވެ. ދެން ފެނިގެން ދިޔައީ އެކަމުގެ ސަބަބުން ރައްޔިތުންނަށް އެކި ގޮތްގޮތުން ދިމާވި ތަކުލީފުތަކުން އަރައިގަތުމަށް ބައެއް ދިވެހިން ލާމަސީލު މިސާލުތަކެއް ދެއްކި މަންޒަރެވެ.

އޭގެ އެއްކަމެއްގެ ގޮތުން ދާދި ފަހުން ފ އަތޮޅު ބިލެއްދޫގައި ހިނގައި ދިޔަ ކަމެއް ފާހަގަކޮށްލެވެއެވެ. ފާނަ މަސްވެރިކަން ކޮށްގެން އާމްދަނީ ހޯދާ އެތައް ބަޔަކު ދިރިއުޅޭ މި ރަށުގައި ގާތްގަނކަށް 16 ވަރަކަށް މަސްދޯނި އޮންނައިރު، 1367 މީހުންގެ އާބާދީއެއް އޮންނަ މި ރަށުގެ ގިނަ އާއިލާތަކުގެ އާމްދަނީއާ ގުޅިފައިވަނީ މި މަސައްކަތެވެ. ނަމަވެސް ކޮވިޑް-19 އާއި ގުޅިގެން މާލެ ސަރަޙައްދު ލޮކްޑައުން ކުރުމާއެކު، މި ކުޑަކުޑަ ރަށަށްވެސް އިސާހިތަކު އެކަމުގެ އަސަރު ކުރީ ކުޑަ ހިނދުކޮޅެއްގެ ތެރޭގައެވެ.

ބިލެއްދޫ ފާނަ މަސްވެރިކަން ކުރާ ދޯންޏެއްގައި މަސައްކަތް ކުރާ ފަރާތެއް ރާއްޖެއެމްވީއަށް ވިދާޅުވީ، މާލެ ސަރަޙައްދު ލޮކްޑައުން ކުރި ޚަބަރު ލިބުނުއިރު، ގިނަ ދޯނިތައް ތިބީ ވާދަވެރިކަމާއެކު ފާނަ މަސްވެރިކަމަށް ނުކުމެ ކަމަށެވެ. ނަމަވެސް މި ޚަބަރު ލިބުމާއެކު، ކަންބޮޑުވާން ޖެހުނު އެއް ސަބަބަކީ އެ ރަށު ގިނަ ދޯނިތަކުން ބާނާ ފާނަ ގަތުމަށް ހުޅުމާލޭގެ ކުންފުންޏަކުން ހަފްތާއަކު ދެފަހަރު އައި ނަމަވެސް، މިފަހަރު ލޮކްޑައުންގެ ސަބަބުން އެ ކުންފުންޏަށް ނާދެވޭނެކަން އެނގުމާއެކުއެވެ.

އެއާއެކު، އުފެދިގެން ދިޔަ ސުވާލަކީ ބޭނި ފާނަ މަސްކޮޅު ކިރުމާއި، ވިއްކުމުގެ ކަންކަން ކުރާނީ ކިހިނެއްބާއެވެ. ނުވަތަ ބޭނި މަސްކޮޅު ނުކިރި، ބާކީވެގެން ދާނީބާއެވެ.

ލޮކްޑައުންގެ ޚަބަރު ލިބުނުއިރު، ތ އަތޮޅާއި، ވ އަތޮޅާއި، ދ އަތޮޅުގެ ސަރަޙައްދުތަކުގައި އެ ރަށުގެ ދޯނިތައް ތިބިއިރު، ބުރަ މަސައްކަތުން ބޭނި މަސްކޮޅު ނުކިރި އަނބުރާ ރަށަށް ދާން ޖެހިދާނެތީ އެންމެންވެސް ތިބީ މާޔޫސްކަމެއްގެ ތެރޭގައެވެ. ކުރިއަށް އޮތީ ރޯދަމަހަށް ވުމާއެކުވެސް، މިކަން ވެގެން ދިޔައީ އެންމެންނަށްވެސް ކުރިމަތިކުރުވި ބޮޑު ކަންބޮޑުވުމަކަށެވެ.

ނަމަވެސް، ދިވެހިންނަކީ ދިމާވާ މިފަދަ ހުރިހާ ވަގުތެއްގައިވެސް އެއްބައިވަންތަކަމާއި، އަޚުވަންތަކަމުގެ ނަމޫނާ ދައްކާ ބައެއްކަން ބިލެއްދޫ ފާނަމަސްވެރިން މިވަނީ ދައްކުވައިދީފައެވެ. މަސް ގަންނަ ކުންފުންޏަށް ނާދެވުމާއި، މާލެއަށް އަރާފޭމުން މަނާކުރިއިރު، ޚާއްސަ ހުއްދަ ތަކެއްގެ ދަށުން އެކަންކަން ކުރެވޭނެ ކަމުގެ މައުލުމާތު މިހާރު މިވަނީ ލިބިފައެވެ. ނަމަވެސް އޭރު ކޮންމެހެންވެސް މަސް ކިރަން ޖެހޭތީ އެކި ސަރަޙައްދުތަކުގައި ތިބި ދޯނިތަކުން މިވަނީ އަމިއްލައަށް އިސްނަގައިގެން އެރަށުގެ އެހެން ދޯނިތަކުގެ މަސްކޮޅު ކިރުމުގައި އެހީތެރިކަން ފޯރުކޮށްދީފައެވެ.

ކޮންމެ ސަރަޙައްދެއްގައިވެސް ރަށުގެ ގިނަ ދޯނިތަކެއް ތިބުމާއެކު، އަދި މާލެއާއި ހުޅުމާލެއަށް ލަފާ ފޭބުން އެވަގުތަށް މަނާ ކުރުމާއެކު، 3 ސަރަޙައްދުގައި ހަރަކާތްތެރިވި 3 ދޯންޏެއް ވަނީ އެހެން ދޯނިތަކުގެ މަސް ހިފައިގެން ހުޅުމާލެއަށް ގޮސް ކިރާދީފައެވެ. ދޮޅުލައްކައަށް ވުރެ ގިނަ ރުފިޔާގެ ގެއްލުމުން ސަލާމަތް ކޮށްދީފައެވެ. އެތައް އާއިލާތަކެއްގެ އާމްދަނީ ހޯދުމުގެ މަގު ބަންދުވިޔަނުދީ ހިފަހައްޓައިދީފައެވެ.

ކޮންމެއަކަސް، މިފަދަ ހައްސާސް ދަނޑިވަޅެއްގައި ބިލެއްދޫ ގުރުވަ ދޯންޏާއި، ކަޅިރަވަ 3 އާއި، ފުރާވަރު 3 މިވަނީ އެއްބައިވަންތަކަމުގެ ނަމޫނާ ދައްކާދީފައެވެ. އެތަކެއް މޭލު ދުރުން އެހެނިހެން ދޯނިތަކުގެ މަސްކޮޅު ހިފައިގެން ގޮސް ކިރާދިންކަމަށްޓަކައި އެރަށު ރައްޔިތުންވެސް އެކަމަށް ޝުކުރުވެރިވެއެވެ.

ތެދެކެވެ. ރާއްޖެއަށް ކުރިމަތިވެފައި މިވަނީ މުޅި ދުނިޔެއަށްވެސް ކުރިމަތިވެފައިވާ ޙާލަތެކެވެ. އެކި ގޮތްގޮތުން މުޅި ޤައުމަށް މިދަނީ ގޮންޖެހުންތައް ކުރިމަތިވަމުންނެވެ. އިޖުތިމާއީ ގޮތުންނާއި އިޤްތިސާދީ ގޮތުން ޤައުމަށް ކުރިމަތިވެފައި މިވާ ގޮންޖެހުންތަކުން އަރައިގަތުމުގައި ޤައުމު އެކަތިގަނޑަކަށް ވެގެން މަސައްކަތް ކުރުން މިވަގުތު ނުހަނު މުހިއްމެވެ. މިއީ ސަރުކާރުން ރައްޔިތުންނަށް އެހީވާންވީ ވަގުތެވެ. ރައްޔިތުން އެކަކު އަނެކަކަށް އެހީވެ އަޅާލަންވީ ވަގުތެވެ. ވިޔަފާރިވެރިން ސަރުކާރާއި ރައްޔިތުންނަށް އެހީތެރިކަން ފޯރުކޮށްދޭންވީ ވަގުތެވެ. ބިލެއްދޫ ފާނަ މަސްވެރިން ފަދައިން ނަމޫނާ ދައްކަންވީ ވަގުތެވެ.